1 Pe kapa kuwong kiya hu nongna kol handra-handra ata hu ndramat para kol pwan, ndre kuwong nongna hu angelou i, hapeko ndriyo kinmbulihi hu ndramat hayah pwi, ara yo tehe melit ngasangasan soyon, ndre ndramiy mepo ngasan itapo iya ko mwaihei. 2 Pe kapa yukyuk para kuwong nongna poropet ara iripo kili yo, pe upahasani hu nongan kokohon masih, pe hu lohongai iman masih iripo kili yo, pe kapa lohongai ndrisiyon iripo kili yo, pe ulahiy para kusilani hu ngondron, hapeko ndriyo kinmbuluhi hamou pwi, pwen yo, ara mwaihei o. 3 Pe kapa kuiki menmeno masih mepo atto mbukeno kiya kili hu ndramat hu ndroisiy, pe kuiki nombuwe para kuwiri nopwaran kiya aliy, ara ulahiy para kusap ngolo kiyau aliy, hapeko kultuw para ndriya ndramat kimbuluhi hu ndramat kinto kili yo pwi, ara andre kunpo hiyan kinyau aliy pwi.

4 Kultuw para ndriya ndramat kimbulihi ndramat, ara para koro wayis o, pe para kapahas, pe andre kimaimai pwi, pe para kasap ngala ndramat pwi, pe para kasomwani ndramat pwi. 5 Pe kultuw para ndriya ndramat kimbulihi ndramat, ara ngara kimbusi ndramat hamou kiranuhuyani hamou, pe kinho mbusi melit para hiyan tan o, ara pwi, pe kinho mbusi ndramat ndrinan kilokuh kileh pwi, pe kinho lohongani mwomwan ta ndramat hamou pwi. 6 Pe kultuw para ndriya ndramat kimbulihi ndramat, ara kinho pwes kinna kultuw pwassin pwi, hapeko ngara kipwes kiya nongan ndrokonan. 7 Pe lang masih ngara kipenani hu ndramat, pe lang masih ngara kipwotisingi lohongan, pe lang masih ngara kiyki lohongan kiya melit hiyan itapo isa, pe lang masih ngara kiro tine pwokeyan.

8 Pe kultuw para ndriya ndramat kimbulihi ndramat, ara kinho kose pwi. Hapeko hape aleheh mepo hu nongan para poropet koro aliy, ara andre hu kamun o, pe hape aleheh mepo kawong kiya nongan handra-handra kiro aliy, ara andre kihun o, pe hape aleheh mepo lohongai iman kiro aliy, ara andre kihipwen. 9 Paratesah, worou tupahasaniy tahape-tahape ko, pe tuwong iya nongna hu poropet ara hape-hape ko yi, 10 hapeko kiro mwonen melit ndrokonan kirayah, pwen tesah mepo andre kiro hape-hape ko, ara andre kihipwen. 11 Pe iro mwonen uro mbunah hamou, ara uwong tehe mbunah hamou, pe ulohonge tehe mbunah hamou, pe umbusi melit tehe mbunah. Hapeko iro mwonen urahatini yo tehe ndramat namandran, ara utali kultuwayi mbunah iya mawen. 12 Paratesah, mahapo ara tutopo nime sumwoiwa hu melit opu, tehe tunime sumwoiwa worou iya kemet sih; pwen andre tukanimei kiya mara worou imwonen. Pe mahapo ara upahasani hape-hape ko, pwen andre kupahasani melit masih, pwen tehe Ngindrai ipahasani yo masih.

13 Pwen mahapo ara hu kultuw matindra aro ko hutopo: Lohongai ndrisiyon, lohongai para koro longe melit hiyan itapo isa, pe kultuw para ndriya ndramat kambuluhi ndramat. Hapeko kultuw ihohin masih iya hu kultuw masih aro, ara kultuw para ndriya ndramat kimbulihi ndramat.