12
Nongan para hu yukyuk ata Mwoiwan Haiyan.
1 Kiya wawu nali pe pisu, lohongai para hu yukyuk ata Mwoiwan Haiyan, ara unamiliy para wawu kapahasaniy.
2 Wawu pahasaniy tehe mamu wawu kowu ta Yapan, pe wawu yos iya hu kultuw mwomwan iyau sai soyon pe wawu ho ndruwa hu ngindrai pwasoyou mepo hu konho wong pwi.
3 Pwen tehen tora ko, unamiliy para wawu kapahasaniy tehe yiy mepo ngara kiwong kiyau kili Mwoiwan Haiyan ata Ngindrai, ara kinlahiy para kipa, “Kaniten ana Yesu,” pe hamou kinlahiy kipa, “ Yesu ara Yapan,” ara pwi, ndramat mepo Mwoiwan Haiyan ita kili yiy opu, ara andre kipwai.
4 Pe hu yukyuk ta Mwoiwan Haiyan, ara handra-handra, hapeko Mwoiwan Haiyan, ara yiy hamou opu ngara kitaingani hu.
5 Pe hu pohombulen, ara handra-handra, hapeko Yapan ara hamou opu mepo ngara kapombulyan.
6 Pe hu mbulen ara handra-handra, hapeko Ngindrai hamou opu imbusi mbulen masih iya kili hu ndramat masih.
7 Pe Mwoiwan Haiyan kiniyki hu mbulen ara handra-handra, ara para hiyan tahu ndramat.
8 Pe Mwoiwan Haiyan iykiy iya kili hamou, ara nongan handra para lohongai waison, pe iya kili hamou, ara nongan handra para lohongai iman, lohongai masih iyau kili Mwoiwan Haiyan hamou opu.
9 Pe iykiy iya kili hamou, ara lohongai ndrisiyon, pe iyau kili Mwoiwan Haiyan hamou opu, pe iykiy iya kili hamou ara yukyuk para kasopwoyani ndramat kiya hiyan, pe iyau kili Mwoiwan Haiyan hamou opu.
10 Pe iya kili hamou, ara pwoke para hu ndraikiya pwoke, pe iya kili hamou, ara para kiwong kiya nongna hu poropet, pe iya kili hamou, ara para kiyirowe hu mwoiwa melit handra-handra, pe iya kili hamou, ara para kiwong kiya nongna kol handra-handra, pe iya kili hamou i, ara para kirapaiwani hu nongna kol handra-handra.
11 Mwoiwan Haiyan hamou opu imbusi hu mbulen masih aro, pe itainganiy iya kili hamou-hamou, ara iyau namiliwan mbukenan.
Nombuwe ndramat ara hamou opu, pe hakai-hakai para aliy, ara soyon
12 Paratesah, nombuwe ndramat ara hamou opu, hapeko hakai-hakai para aliy ara soyon. Pe konan nombuwe ndramat ara hakai-hakai pe soyon, hakai-hakai ara, ara irayah tehe nombuwe ndramat hamou opu. Pwen pe Kristus, ara tehen aliy i.
13 Paratesah, Mwoiwan Haiyan ara hamou opu, pe worou masih tuwiri paptais iyau kili yiy, pe turayah hamou—konan worou Yutah ndre Krik, pe hu ndramat para pwandrendres ndre hutopo mwoimwoi—worou masih ara tuwiri Mwoiwan Haiyan iyawule ko, pe tuyin ndran iyau kili yiy.
14 Nombuwe worou ara kanmangsaniy hakai-hakai opu, ara pwi, hapeko soyon.
15 Pwen kapa ndrika ndramat kipa, “Paratesah, yo ara nima ndramat pwi, pwen pe yo ara para nombuwe ndramat pwi,” pwen pe tunan ara ko, ara andre kinkaituwe yiy tehe yiy nombuwe ndramat hakai pwi, ara pwi.
16 Pe kapa ndrainga ndramat kipa, “Yo parasura nombuwe ndramat pwi, paratesah, yo ara mara ndramat sih pwi” Pwen tunan ara pe yiy nombuwe ndramat hakai pwi, ara pwi.
17 Pe kapa nombuwe ndramat masih ara mara ndramat opu, pwen tehen tapeh, hingorou para tahilong nongan, ara ita aleheh? Pe kapa nombuwe ndramat masih ara ndrainga ndramat hakip opu, pwen tehen tapeh, hingorou para kahingi melit ara ita aleheh?
18 Hapeko ndrokonan, nombuwe ndramat ara hakai-hakai pe soyon, pe Ngindrai imwaniyani nombuwe ndramat hakai-hakai para aliy iro hape aleheh inamiliy.
19 Pe kapa nombuwe ndramat masih, ara nombuwe ndramat hakai opu, pwen nombuwe ndramat hamou ara andre kiro aleheh?
20 Pwen tehe akanpwai, nombuwe ndramat ara hakai-hakai pe soyon, hapeko nombuwe ndramat ara hamou opu.
21 Pe mara ndramat andre kinpwai kinnata nima ndramat kipa, “Wou ara mbulyam pwi,” ara pwi. Pe paya ndramat i andre kinpwai kinnata ndrika ndramat kipa, “Wou ara mbulyam pwi,” ara pwi.
22 Pe ndrokonan para aliy, hu nombuwe ndramat mepo tupandre hu pwokeyahu pwi, ara mambulya hu,
23 pe hu nombuwe ndramat mepo tulohonganiy tehe andre kanranuhuyani hu tehe hayah pwi, ara turanuhuyani iya hiyan. Pe hu nombuwe ndramat mepo ngara kakulaniy, ara ngara kahaiyaniy iya hiyan,
24 hapeko hu nombuwe ndramat mepo hu ndramat ngara kanimei, ara nuhuyani hu. Pe Ngindrai ara imbusi nombuwe ndramat hakai-hakai irapairaniy iyawule, pe iranuhuyani nombuwe ndramat mepo nimei tehe mbulyan pwi.
25 Pwen tehen tora ko, nombuwe ndramat hakai-hakai mbuna kimasumbuwe. Hapeko nombuwe ndramat hakai-hakai, ara kipwokere hamou-hamou kiya harong o.
26 Pwen kapa nombuwe ndramat hakai kihingorowe ngandran, ara nombuwe ndramat masih andre kahingorowe ngandran kiyawule ko kiya sura yiy. Pe kapa karanuhuyani hakai, ara nombuwe ndramat hakai-hakai masih andre hu kapwes kiyasura yiy.
27 Pwen wawu masih, ara wawu nombuwe Kristus, pe nombuwe wawu hakai-hakai, ara para sura nombuwen.
28 Pe Ngindrai irakinima hu ndramat hurokum huho mu ara hu aposel, pe huho mulan ara hu poropet, pe huho mulan hape, ara hu ndramat para hinuwani nongan, pe hu para kayingani hu ndraikiya pwoke, pe hu mepo yukyuk para kasopwoyani hu ndramat ita kili hu, pe hu mepo para kasopwat hu hayah, pe hu mepo yukyuk para koho mu kiya meresaya mbulen, pe hu mepo para kawong kiya hu nongna kol handra-handra.
29 Tehen tapeh, hu masih ara hu aposel ko, ndre? Pe hu masih hu poropet ko, ndre? Pe hu masih hu ndramat para hinuwani hu ndramat ko, ndre? Pe hu masih ara andre hu kambusi ndraikiya pwoke ko, ndre?
30 Pe hu masih, ara yukyuk para kasopwoyani mwamwa ita kili hu ko, ndre? Pe hu masih ngara kawong kiya nongna kol handra-handra ko, ndre? Pe hu masih hulahi karapaiwani hu nongna kol handra-handra ko, ndre?
Kultuw para ndriya ndramat kimbuluhi ndramat ara mwayih masih
31 Pwen pe wawu ara akanamiliy para akawiri yukyuk para pahas mepo ihohin masih. Hapeko andre kupwaingani meresai mepo mwayih masih ndron kisa kili wawu.