11
1 Akoro ndruwa kultuwi tehe ngara kuro ndruwa kultuwayi Kristus.
Kultuw para kasumwa paya ndramat pe katotohun
2 Pe yo ara upwes isata wawu para wawu ngara koro lohongani yo iya melit masih, pe wawu pwotisingi hu hinonou mepo uhinuwani wawu iya aliy.
3 Hapeko unamili para wawu kayirowei tehe ndramat iya payan ta hu ndramat masih ara Kristus, pe kamai, ara yiy payan iyata pihin. Pe payan ata Kristus, ara Ngindrai.
4 Pe hu kamai masih mepo hu ngara kasumwa payahu pe hutohun ndre huwong nongna hu poropet, ara huiki masirai iya kili Kristus tehe yiy payan tahu.
5 Pe hu pihin masih mepo hu kansumwa paya hu pwi, pe hutohun ndre huwong nongna hu poropet, ara huiki masirai iya paya hu—pe iyawule ko tehe hunahi payahu.
6 Paratesah, kapa pihin hamou kinsumwa payan pwi, kiya, kisani kompayan kiyau. Hapeko kapa ara iyki masirai iya kili pihin hamou para kisani kompayan ndre kinahiy, kiya kisumwa payan.
7 Pe kamai hamou ara mbuna kisumwa payan, paratesah, yiy ara mwensen tehe Ngindrai opu, pe yiy nonowa Ngindrai. Hapeko pihin ara nonowa kamai.
8 Paratesah, Ngindrai imangsani kamai kinyau nombuwe pihin pwi, hapeko imangsani pihin iyau nombuwe kamai.
9 Pe tehen aliy o, Ngindrai imangsani kamai para kisopwat pihin, ara pwi, hapeko imangsani pihin para kisopwat kamai.
10 Pe tunan ara hu angelou hutora nimnim, pwen pihin hamou ara kisumwa payan, para kipwainganiy tehe ita pahandra pwoke nopwaran ta kamai tan.
11 Hapeko iya sai para mbultere iya harong iya kili Yapan, ara pihin ara para kisopwat kamai tan, pe kamai ara para kisopwat pihin tan.
12 Paratesah, pihin iyau kili kamai, pwen pe kamai i, ara pihin imwalahi iya atan. Hapeko melit masih, ara iyau kili Ngindrai pe yiy ara payan.
13 Pwen wawu mbukenan ara akaramwanye nongan iye. Paratesah, ara kultuw hiyan para pihin kinsumwa payan, pe kitohun kiya kili Ngindrai, ndre pwi?
14 Pe kultuwayi worou ara ihinuwani rou tehe kapa kamai hamou ma kompayan niwen, ara iyki masirai iya kili yiy, ndre pwi?
15 Hapeko kapa pihin hamou kompayan kiya niwen, ara nonowan, ndre pwi? Paratesah, kompai niwen, ara Ngindrai kiniykiy kinna kili yiy para ndrutuha payan.
16 Kapa ndramat hamou pakipepet kiya nongno iye, kipahasani hiyan tehe worou konho ndruwa kultuwayi kowaserou handra pwi—pe hu ndramat hurokum ata Ngindrai yi.
Pwahanou iya Anandrinai ata Yapan mepo konho haiyani pwi.
17 Pe iya nongan iye, nakupwahanou wawu, pe kunsap ngala wawu pwi, paratesah, hu mbultere tawawu, ara kinpo hiyan pwi, hapeko iyki mwomwan iya soyon pe hiyan ara hape ko.
18 Mamu uhilingi nongan tehe iro mwonen wawu ngara kambultere tehe hu ndramat hurokum tehe hapat, ara wawu ngara kahingas mwalinga wawu pe wawu ngara kamasilpat, pe upwotisingi lohongo iya nongan iye.
19 Pe kunhindrundru pwi, kapa mwele wawu ara ita, pwen andre kipwainganiy hiyeh ndrokonan ara ata Ngindrai.
20 Pwen pe kiro mwonen wawu ngara kasa mbultere kiya harong, ara wawu konho lohonganiy tehe ara Anandrinai ta Yapan pwi,
21 paratesah, iro mwonen wawu ngara kanamnam, ara wawu konho longe hu hayah pwi, wawu po ana wawu imu. Pwen tora ko ndramat hamou ngara kiro mundrui manau, pe hamou, ara ngara kiyin ndran tunguyan pe kiringi yiy.
22 Tehen tapeh, suwe wawu para akaro aliy pe akanamnam pe akayin ndran, ara pwi, ndre? Ndre wawu pa ndre hu ndramat hurokum ata Ngindrai ara, ara para akambusiy o mwaihei kiya kili hu, pe kiyki masirai kiya kili hu mepo anandrina hu pwi, ndre? Andre kupa tesah kisa kili wawu eh, kusap ngala wawu kiya aliy, pwi masih iya lohongai aro!
23 Paratesah, nongan uikiy isa kili wawu ara tesah uwiriy iyau kili Yapan. Pe nongan ara toro: Ping mepo andre karatuni Yapan Yesu, ara yiy iwiri ndrina nohun,
24 pe iro mwonen irawuloh iya kili Ngindrai, iramburungiy, pe ipa, “Iye ara nombuwe mepo uikiy isa kili wawu. Wawu koro mbusiy tehen toro para akorolohongani yo.”
25 Pe imbusiy tehen aliy iya mulan para hu namnam ihipwen, pwen iwiri pweniu i pe ipa, “Pweniu iye, ara ndreye para tapaniu howen, akambusiy toro para akoroyin pe akoro lohongani yo.”
26 Paratesah, lang masih wawu kayin kiro pweniu iye, pe akayan ndrina nohun iye, ara wawu koro pohowe kimat ta Yapan, kipoo kisa.
27 Pwen pe tunan aro ko, yiy mepo kiyan ndrina nohun ndre kiyin kiyau pweniu ta Yapan pe kinhaiyaniy pwi, ara mwomwan ita kili yiy, pe imbusi pakut mwomwan iya ndreye Yapan pe nombuwen.
28 Pwen pe ndramat hamou-hamou, ara kiyirowe yiy mbukenan kimu na, pwen pe kiyan ndrina nohun pe kiyin kiyau pweniu.
29 Paratesah, yihu mepo hukonho nimmwanyani hu pwi, pe huyan ndrina nohun ta Yapan pe huyin iyau pweniu ta Yapan, ara hu mbukenan, ara andre kawiri korahu.
30 Tunan ara kopu, hu soyon mwalinga wawu, pwoke tahu pwi pe hu mwa, pe hayah tawawu, ara hu kanmat.
31 Hapeko kapa tuka nimmwanye worou mbukenan, pe tukayan pe kayin, ara andre tukanwiri koratou pwi.
32 Hapeko kapa kiyau sai aro, pe Yapan kitamwanye kultuwayi rou, ara ipwahanou worou, pwen pe kiro mwonen Ngindrai kiyki kora hu ndramat para kol pwan, ara andre tukanwiri korarou pwi.
33 Pwen pe wawu nali pe pisu, kiro mwonen wawu nakasa mbultere para wawu nakanamnam, ara wawu masih kanamnam kiya harong o.
34 pe kapa hamou kimundrui, ara hiyan para kinamnam kiro ndron suwen. Pwen pe kapa wawu kaya mbultere kaya harong, ara andre akanwiri kora wawu pwi. Pe kiro mwonen kusa, ara andre kupo sura hu pwahanou para hu lohongai hayah i.