10
Hu pwahanou iyau titiye tahu para Yisrayel
1 Pwen wawu nali pe pisu, mbuwali para wawu kalowani nongan ndrokonan, paratesah, hu tumburou masih ara huro pahandra kokom pe hu masih hu singondriti ndras.
2 Pe hu masih huro nondriya kokom huro nondriya ndras pe hu kanwiri paptais tehe yihu ara yihu ndramira Mose.
3 Pe hu masih hu kanyan anandrinai handra ko mepo Mwoiwa Ngindrai kinhang hu.
4 Pe hu masih ara huyin ndran handrang o, mepo Mwoiwa Ngindrai ihang hu. Paratesah, yihu kanyin kinyau pat yin mepo pwoke ta Mwoiwan Haiyan iro aliy, pe iro surahu. Pe pat yin ara, ara Kristus.
5 Hapeko Ngindrai kinipwes kinnata soyon ta hu pwi, pe humat, pe nombuwe hu ara humasumbuwe huro kene kol ndrohoyin.
6 Pe hu melit aro, ara hu kantayah tehe pwahanou isa kiltou para mbuna tukaiki ndriyatou kiya hu kultuw pwassin ara, tehe yihu kanmbusiy pwen.
7 Pwen wawu mbuna katotohun kiya kili hu ngindrai pwasoyou, tehe hayah tahu hu kanmbusiy. Pwayan kinpwai toro: “Hu ndramat ara hupwan pe hu namnam, pe hu yin ndran ngahan, pwen hutine pe hundran pe hupo memeng.”
8 Pe worou mbuna kapo memeng tehe hayah tahu hu kanmbusiy—pe nondriya lang sih opu, hu pulungat pe tipou tahu, ara hu mat.
9 Pe mbuna tuka nohonou Kristus, tehe hayah tahu kanmbusiy—pe hu mwat hu kantingundru hu.
10 Pe wawu mbuna kakokou anna Ngindrai tehe hayah tahu hu kanmbusiy—pe angelou para pwalngani hu ndramat isa pe kinitingundru hu kanmat.
11 Hu melit aro hu kantayah kinna kili hu, para tukaro nimnim kiya aliy, pe hu kantatuluwiy tehe pwahanou isa kiltou, pe para kiyki pwahanou kisa kiltou kiya lang mepo kinsahapwen mahapo.
12 Pwen pe kapa apa ata rahatini wou pwokeyan, kiya maram kiro tam pe mbuna ayos!
13 Hu nohonou ngara karayah kili wawu, ara hu nohonou handra pwi, nohonou masih ara iya harong o, pe irayah iya kili hu ndramat masih iya harong o yi. Pe tesah Ngindrai kipwai, ara andre kimbusiy, pe andre kiniyki nohonou kinramwaitini tesah wawu kanlahiy para akakuniy, ara pwi. Hapeko kapa wawu kaya nondriya hu nohonou, ara andre kirasaya wawu para wawu kasa mawen aliy, pwen andre wawu kalahiy para wawu koro tine pwokeyan.
Anandrinai ta ngindrai pwasoyou, pe anandrinai ta Yapan
14 Pwen tehen tora ko wawu kowase para nere imwonen, wawu koro mawen kultuw para katotohun kiya kili hu ngindrai pwasoyou.
15 Pe yo ara urupo wong iya kili hu ndramat malohongahu, pe wawu mbukenan kanimwaniyani wawu kiya tesah upwai.
16 Pwen pe pweniu mepo lomwes iro aliy pe turawuloh iya aliy, ara ipwaingani ndreye Kristus turahihiriy. Pe ndrina nohun mepo turamburungiy, ara ipwaingani nombuwe Kristus turahihiriy.
17 Paratesah, ndrina nohun ara hambut opu, pe worou ara soyon, pe nombuwe worou ara hamou opu, paratesah, worou masih ara turahihiri ndrina nohun hambut o.
18 Pe wawu kayirowe kultuwayi hu ndramira Yisrayel; Hu mepo hu ngara kayan hu yukyuk para mwan kitimwiy kiro pere tuntun, ara ngara hu kayan tehe hu hamou opu.
19 Pe kunpa anandrinai masih para kaikiy tehe yukyuk kiya kili ngindrai pwasoyou hamou, ara pwi. Ndre, sehe melit ara masih ngindrai pwasoyou, ara pwi.
20 Pwi, hapeko hu yukyuk tahu ndramat hu kowu ta Yapan, ara ngara hu kayukyuk kiya kili hu payit, pe hu konho yukyuk kinna kili Ngindrai pwi. Pe yo ara mbuwali para wawu kasusuye kiyapolo hu payit.
21 Pe kinlahiy para wawu kayin kiyau pweniu ta Yapan pe ta payit i, ara pwi. Pe kinlahi para wawu kanamnam kiro keyeu ta Yapan pe kiro keyeu ta payit kiyawule, ara pwi yi.
22 Worou topo nohonou para kambusiy para Yapan ndrinan kilokuh, ndre? Pe worou pwoke torou iramwaitini yiy, ndre?
Hu ndramat hu pwotisingi lohonga hu ara andre hu koro mwoimwoi
23 Pe hayah ta wawu pa, “Melit masih ara hiyan masih ara andre tuka mbusiy,” hapeko melit masih ara, ara andre kinsopwat worou koro hiyan pwi. “Melit masih ara hiyan masih ara andre tuka mbusiy,” hapeko melit masih, ara andre kinmbusi worou tukamandra, ara pwi.
24 Pe hamou mbuna kilohonganiy para kisopwat yiy mbukenan, hapeko kilohonganiy para kisopwat hu ndramat hayah i.
25 Pe sehe yohou kiro ndrohopehei pe akasou pe akayan, ara lohonga wawu kiro mwoimwoi pe akayan, pe lolohonga wawu mbuna kihindrundru pe akasoksok.
26 Paratesah, “Kol pwan pe melit masih hutopo aliy, ara masih ata Yapan opu.”
27 Pe kapa ndramat hamou kinpwotisingi lohongan pwi, pe kirawulohani wawu para akayan anandrinan pe wawu namiliy para kaya, ara akayan tesah kinmwaniyaniy iro mbulmara wawu, pe lohonga wawu mbuna kihindrundru pe akasoksok.
28 Hapeko kapa ndramat hamou kipwai kisa kili wawu kipa toro, “Sangi yohou aro, ara hu kantimwiy tehe yukyuk,” pwen mbuna akayan, ara para hiyan ta ndramat mepo ipwai isata wawu ara, pe para lohongai hiyan, ara kiro.
29 Pe urupo pwai, ara para lohonga ndramat hamou, pe tawawu pwi. Paratesah, urupo mwoimwoi, pe ndramat hamou ara iripo nimmwanye yo.
30 Pe kapa kuyan anandrinai mepo kantohun kinna aliy pwen, pwen paratapeh pe andre kunyan pwi, paratesah, Ngindrai ara kintoholiy pwen.
31 Pwen kapa akayin ndran, ndre akayan anandrinai, ndre tesah akambusiy, ara masih akambusiy para kisap ngala Ngindrai.
32 Pe wawu mbuna kambusi ndramat hamou kiyos kiya pakut mwomwan, hu ndramira Yutah, ndre hu ndramira Krik, ndre hu mepo hu ngara karokum ata Ngindrai —
33 pe konan kunohonou para kupwesani hu ndramat kiya hu sai masih. Paratesah, kunmbusi melit para hiyan ato mbukeno ko, ara pwi, hapeko para hiyan ta hu ndramat soyon, para Ngindrai kisopwat hu yi.