9
Mbulya Pol para hiyan tan tehe aposel hamou
1 Yo ara urupo mwoimwoi o, ndre pwi? Pe yo ara aposel hamou, ndre pwi? Pe yo kunnime Yesu mepo Yapan torou, ndre pwi? Pe mbulyo iya kili Yapan, ara wawu anandrinai para mbulyo, ndre pwi?
2 Konan kuntayah aposel hamou kinna kili hu hayah pwi, hapeko ndrokonan tehe urayah aposel isa kili wawu! Paratesah, wawu ara kinima mbulyo tehe aposel iya kili Yapan.
3 Pe yihu mepo hu ngara karasusut nongan kisa kili yo, ara nongno iye ngara kupenani yo kiya aliy.
4 Hiyan masih para worou kawiri anandrinai pe kayin ndran, ndre pwi?
5 Hiyan masih para tukawiri pihin hamou ipwotisingi lohongan, pe yiy yesowai para kiya sura tou, tehe hu aposel hayah, pe hu nali Yapan pe Kepas hu ngara kambusiy, ndre pwi?
6 Ndre yolu Parnapas o, ara yolu kanlahiy para kapo mbulen para mipwan hiyan tolu pwi, ndre?
7 Pe ndramat mepo ngara kipombulen tehe ndram hamou, ara yiy mbukenan ngara kisousou annan, ndre pwi? Pe yiy mepo ngara kihisi pinge wine hambut, ara yiy mbukenan andre kinyan hu krep kinyau aliy pwi, ndre pwi? Pe hiyeh ngara kipwokere hu sipsip hayoi, pe kinho yin sus kinyau kili hu pwi?
8 Nongan upwai aro, ara iyau pwoke nopwaran ta ndramat para kol pwan opu, ndre? Nongan para pwahanou ara iwong tehen aliy i, ndre pwi?
9 Paratesah, ita Nongan para Pwahanou ta Mose ara ipa: “Wawu mbuna kawasi poho mbulmwakau ma iro tapen pwisi wit.” Pe nongan iye, ara Ngindrai ilohongani mbulmwakau pe iwong.
10 Ndrokonan tehe yiy ilohongani worou pe imbusi nongan aro, ndre pwi? Ehe nongan aro, ara kanratuluwiy torou, paratesah, ndramat ngara kitaluwe pwan, pe ndramat ngara kisuwali pwisi wit kiya mawen, ara hilu malmou kene ara hilu mbusiy para melit hiyan itapo isa, ara andre hilu kapo hiyan kiyau aliy.
11 Pe kapa yowu kanhasi pwen anandrinai para mwoiwa wawu ita mwalinga wawu, pwen ara hiyan para yowu kawiri melit para nombuwe yowu kiyau kili wawu, ndre?
12 Kapa wawu kapa hiyan masih kiya kili hu ndramat hayah para hu kapo hu memelit tawawu, kiya andre wawu kapa hiyan para yowu kapo kipopo ko, ndre pwi? Hapeko yowu kanmbusiy toro tehe ara hiyan masih pwi, paratesah, yowupa pwi iya hu lohongai tora para mbuna kiyki songot kiya nongan hiyan ata Kristus.
13 Pe wawu kowu tehe yihu mepo ngara kapombulen kiro yumwa totohun namandran, ara hu ngara kapo anandrinahu kiyau aliy, ndre pwi? Pe yihu mepo ngara kapo mbulen kiro pere tuntun, ara ngara hu kapo anandrinahu kiyau hu yukyuk kiyau aliy, ndre pwi?
14 Pwen iya harong o, Yapan kinpwandrandrahaniy tehe yihu mepo hu ngara kapohowe nongan hiyan, ara andre hu kawiri sopwat para mipwan tahu kiyau nongan hiyan.
15 Hapeko yo kunmbusi tehe ara hiyan masih tehe andre kumbusi melit aro, ara pwi. Pe kunratuluwi nongan iye para wawu kambusi hu melit aro kisa kili yo ara pwi yi. Paratesah, hiyan para kumat, pwen hamou andre kinpwasosohou tehe usap ngolo para umbusiy toro pwi.
16 Paratesah, iro mwonen upohowe nongan hiyan, ara kinna hiyan para kusap ngolo kiya aliy, ara pwi. Pohoweya nongan ara mbulyo Ngindrai iykiy, pe andre kuwiri koran kapa kunpohowe nongan hiyan pwi!
17 Kapa ara namiliwai pwokeyan to para kupohowe nongan hiyan, ara andre kuwiri kene kiyau aliy. Pe kapa kumbusiy kinyau namiliwo pwi, pwen ara namiliwa Ngindrai iykiy para kumbusiy.
18 Pwen pe tesah hiyan andre kuwiriy kiyau kene? Mbulyo ara para kupohowe nongan hiyan, pe andre kuikiy o mwaihei, pe andre kumbusiy tehe ara namiliwai pwokeyan to, tehe yo ara ndramat hamou para pohoweya nongan hiyan.
Mbulya Pol para andre kiro mwoimwoi pe kimbusiy
19 Pe konan urupo mwoimwoi, yo ara ata hamou pwi, kunmbusiy yo mbukeno urayah tehe ndramat para pwandrendres hamou ta hu ndramat masih, para andre kuluwi lohongahu ndramat soyon kasa kili Kristus.
20 Pe uya kili hu para Yutah, ara urayah tehe hamou ta hu Yutah, para kuluwi lohongahu. Pe uya kili yihu mepo hutora pahandra nongan para pwahanou, ara urayah tehe hamou ta hu hutora pahandra nongan para pwahanou. Pe yo mbukeno, ara kunto pahandra nongan para pwahanou pwi, hapeko para kuluwi lohongahu mepo hutora pahandra nongan para pwahanou.
21 Pe uya kili yihu mepo hu konto pahandra nongan para pwahanou pwi, ara urayah tehe ndramat hamou mepo kunto pahandra nongan para pwahanou pwi, (pe yo ara kunto mwoimwoi kinna nongan para pwahanou ta Ngindrai pwi, hapeko urupo pahandra nongan para pwahanou ta Kristus). Pwen pe andre kuluwi lohongahu mepo nongan para pwahanou kinto kili hu pwi.
22 Pe uya kili hu mepo hu kanrahaini lohongahu pwi, ara urayah tehe hamou ta hu, para kuluwi lohongahu. Pe urayah melit masih iya sai masih iya kili hu ndramat masih, para andre kusopwat hayah tahu kiya hu sai aro.
23 Pe umbusi melit masih tehen toro, ara tunan ara nongan hiyan, pwen andre kupo hu lomwes kiyau aliy.
Pwahanou para karahatini lohonga ndramat
24 Pe andre wawu kowu tehe hu ndramat masih ngara hu kangap ngapilai sih, hapeko hamou opu ngara kiwiri kenen ndre, pwi? Pwen wawu kangap tora, pe kiyau sai ara, andre akawiri kene wawu kiyau aliy.
25 Hu ndramat masih mepo hu ngara kanonoyou para karamwaitini hamou-hamou, ara ngara hu kaya nondriya pwahanou pwokeyan para hinonou para kirahatini hu. Hu ngara kambusiy, ara para hukawiri kasapai sih mepo andre kinto ndranga niwen pwi, hapeko worou ngara kambusiy, ara para tukawiri kasapai sih mepo andre kinto-kinto.
26 Pwen tehen torako, yo ara kunmbusiy tehe ndramat mepo ita ngap pe lohongan kinro hapesah pwi, ara pwi yoh; pe kuntahatai tehe ndramat hamou mepo ita piyani niman o mwaihei, ara pwi yi.
27 Pwi, yo mbukeno, ara ngara kukaituwe namiliwai para nombuwe para kirayah pwandrendres to mbukeno, pwen pe kiyamulan para kunpohowe nongan kinna kili hu hayah, ara Ngindrai andre kiyki kene kiya mbulyo.