8
Pwahanou para anandrinai mepo ngara kaikiy tehe yukyuk iya kili hu ngindrai pwasoyou
1 Kiya, iya lohongai para anandrinai mepo ngara kaikiy tehe yukyuk kiya kili hu ngindrai pwasoyou ara: Worou pahasaniy tehe “Worou masih tuhitek lohongai iman.” Hapeko lohongai iman ngara kimbusi ndramat kisap ngalan, pwen tehen tora ko, kultuw para ndriya ndramat kimbulihi ndramat, ara ngara kipwokeyani ndramat i.
2 Pe yihu mepo hupa hupahasani melit, ara hu kanpahasaniy mapu, konan hu kapa hupahasaniy.
3 Hapeko yiy mepo ndriyan imbuluhi Ngindrai, ara Ngindrai kinpahasani yiy pwen.
4 Pwen pe iya lohongai para kayan anandrinai mepo kaniykiy tehe yukyuk kinna kili hu ngindrai pwasoyou: Worou tupahasaniy tehe “ngindrai pwasoyou hamou, ara melit mwaihei o iripo kol pwan,” “pe Ngindrai ara hamou opu.”
5 Paratesah, konan ngara kapa hu ngindrai soyon, mepo hutora kol paingan yang, pe hu topo kol pwan, (pe ndrokonan, hu “ngindrai” ara soyon, pe hu “yapan” ara soyon),
6 hapeko worou, ara Ngindrai torou ara hamou opu, yiy mepo Tamarou, pe melit masih hurayah huyau kili yiy opu, pe yiy opu tutopo mwalen. Pe Yapan ara hamou opu, yiy mepo Yesu Kristus, yiy opu pe melit masih huyau kili yiy, pe iyau kili yiy opu, pe tutopo mwalen.
7 Hapeko hu ndramat masih, ara hu kanhitek lohongai iman iye pwi. Hu ndramat hayah, ara hu ngara kaiki lohongahu kiya kili hu ngindrai pwasoyou ndron, tehe hu ara ndrokonan. Pwen iro mwonen hu yan anandrinai hu lohonganiy tehe kaniyki tehe yukyuk kinna kili ngindrai pwasoyou hamou, pe hu kanrahatini lohongahu pwi, pwen anandrinai ara, ara kinpwalngani hu.
8 Hapeko anandrinai, ara kinhoiki worou kanna pakeh kili Ngindrai pwi. Pe kapa tukanyan anandrinai hayah pwi, ara andre kiniyki mwomwan kinsa kiltou pwi, pe kapa tukayan, ara kinmbusi worou kaya hiyan kiya mbulmara Ngindrai, ara pwi yi.
9 Pwen pe mara wawu kiro, lohonga wawu mepo melit masih ara ita hiyan kili wawu, ara mbuna kisingori hu mepo lohongahu kinpwoke pwi iya lohongai ndrisiyon tahu, para hu kayos kiya pakut mwomwan.
10 Paratesah, kapa hamou mepo kintahatini lohongan pwi, pe kinime wou mepo lohongam iman masih, pe aro yan anandrinai nondriya yumwa totohun hawum ta ngindrai pwasoyou hamou, ara matisan tesah ambusiy, ara kimbusi ndriyan kitine para kiyan anandrinai mepo kaniykiy pwen tehe yukyuk kinna kili hu ngindrai pwasoyou.
11 Pwen nalim ndre pisum mepo kinrahantini lohongan pwi mepo Kristus kinmat kina tan ara, pwen lohongai iman tam ara, ara andre kipwalngani yiy.
12 Pe kiro mwonen ambusi pakut mwomwan kiya kili hu kiyau sai aro pe ambusi hu kanpwotisingi lohongahu pwi, pe kiratti hingorowan, ara ambusi pakut mwomwan iya kili Kristus.
13 Pwen tehen torako, kapa tesah kuyan ara kimbusi nali ndre pisu ara kiyos kiya pakut mwomwan, ara mbuna kuyan yohou ara paiwe. Pwen andre kunmbusi hu kayos pwi.