7
Pwahanou para yesowai
1 Pe iya lohongai para nongan wawu kanratuluwiy kinsa kili yo pwen, ara toro: “Hiyan para kamai hamou mbuna kimatiliwani pihin hamou.”
2 Hapeko kultuw para memeng ara ita rayah namandran, pwen hiyan para aliy, ara kamai hamou-hamou ara kimatiliwani nambuyun mbukenan, pe pihin hamou-hamou ara kimatiliwani nambuyun mbukenan.
3 Pe kamai hamou, ara nombuwen, ara para namiliwa pihin tan, pe pihin tan tehen aliy yi, nombuwen ara para namiliwa kamai tan.
4 Pe pihin, ara mbuna kihimbusani nombuwen mbukenan, hapeko kikiy kiya kili kamai tan. Pe tehen aliy opu, kamai mbuna kihimbusani nombuwen mbukenan, hapeko kikiy kiya kili pihin tan.
5 Kultuw para yesowai, ara walu mbuna kapa pwi kaliy, kapa walu kasomwi tehe kiro hape na, pe walu andre kaiki walu mbukenan para katohun. Pwen walu kamui kaya harong paiwe yi, pwen pe Sinai andre kinnohonou walu pwi, paratesah, akanlahiy para akarahatini namiliwai para nombuwe walu pwi.
6 Hapeko nongan iye ara lohongai o, pe para kipwandrandrahani wawu, ara pwi.
7 Pe lohongo iya kili hu ndramat masih, ara para hukoro ko tehe yo. Hapeko Ngindrai iyki yukyuk iya kili ndramat hamou-hamou para hu koro ndruwa namiliwahu. Pe hamou ara yukyuk tan handra iyata hamou.
8 Hapeko nongno iye, ara iya kili hu ndramat mepo hu kanyesou pwi, pe hu pihinau: Hiyan para wawu mbuna kayesou pe akamin o tehe yo.
9 Hapeko kapa wawu kanlahiy para wawu karahatini namiliwa nombuwe wawu mbukenan pwi, ara wawu kayesou. Paratesah, hiyan para wawu kayesou, pwen kendres para nombuwe wawu, ara andre kinpwoke pwi.
10 Pe upwandrandrahani wawu yesowai toro, (yo pwi, hapeko Yapan ipwandrandrahaniy): Pe pihin hamou, ara mbuna kitali kamai tan.
11 Hapeko kapa pihin hamou kitali kamai tan, ara mbuna kiyesou. Ndre pwi, kirakonuh pe kimui kiya kili nambuyun paiwe. Pe kamai hamou, ara mbuna kitali nambuyun.
12 Pe nongno iye iya kili wawu masih, (iye ara nongno, hapeko nongna Yapan pwi): Kapa nali wawu hamou ma pihin tan hamou, pe pihin ara kinpwotisingi lohongan pwi, pe inamiliy para kiro sura kamai tan, ara kamai ara mbuna kitali yiy.
13 Pe kapa pihin hamou kiyesou pe kamai tan ara kinpwotisingi lohongan pwi, pe inamiliy para kiro sura pihin tan, ara pihin ara mbuna kitali yiy.
14 Paratesah, kamai mepo kinpwotisingi lohongan pwi, ara nambuyun kinmbusi yiy kintayah howen, pe pihin mepo kinpwotisingi lohongan pwi, ara kamai tan mepo ipwotisingi lohongan kinmbusi yiy kintayah howen. Kapa pwi, ara noru hu andre hu konto howen pwi, hapeko mahapo yihu kantayah haiyan.
15 Hapeko kapa kamai ndre pihin mepo kinpwotisingi lohongan pwi ara, pakiyau, ara konan kiyau. Kamai ndre pihin ara hilu konto pahandra lohongai iye pwi. Pe Ngindrai kiniyoh worou, ara para tukoro nondriya ndriya wayis.
16 Pwen wawu pihin, andre wawu kapahasaniy tapeh, para andre akasopwat hu kamai tawawu. Pe wawu kamai, ara andre wawu kapahasaniy tapeh, para andre akasopwat hu pihin tawawu.
Pwahanou para kultuwayi ndramat
17 Pwen kapa tora, hamou-hamou ta wawu ara kiro tehe ndramat mepo ipwotisingi lohongan, kiro nondriya sehe nopwaran mepo Ngindrai kintakiniman para hu koro ndruwan, pwen tehe Ngindrai kiniyoh hu pwen. Pwahanou to iye, ara uikiy iya kili hu ndramat masih mepo hurokum hutora masih kene.
18 Kapa ndramat hamou kansosondrih kinnatan pwen, pe kiro mwonen Ngindrai kiyoh yiy, ara mbuna kirayah tehe ndramat mepo kansosondrih kinna tan mapu. Pe ndramat hamou Ngindrai kiniyoh yiy, pe kansosondrih kinna tan pwi, ara mbuna kasosondrih kiyatan.
19 Paratesah, kultuw para sosondrih sangi ndramat, ndre kultuw para kansosondrih pwi, ara mwaihei o. Hapeko melit namandran, ara akaro ndruwa hu nongan para pwahanou ta Ngindrai.
20 Pe wawu hamou-hamou ara akoro ndruwa sai, mepo Ngindrai kiniyoh wawu iya aliy para akoro ndruwan.
21 Pwen iro mwonen Ngindrai iyoh wawu, ara wawuro ndron tehe ndramat hamou para pwandrendres, ndre pwi? Lohonga wawu mbuna kiporu–hapeko kapa akalahiy para akaro mwoimwoi, ara akambusiy tehen aliy.
22 Paratesah, yiy mepo irayah ndramat hamou para pwandrendres iro mwonen Yapan iyoh yiy, pe iyki lohongan ndrisiyon, ara yiy ndramat ita mwoimwoi iya kili Yapan. Pe iyawule ko, yiy mepo ita mwoimwoi iro mwonen Yapan iyoh yiy, ara yiy ndramat para pwa, ndrendres ata Kristus.
23 Pe kene wawu mepo Ngindrai isowani wawu iya aliy, ara namandran iya, pwen wawu mbuna karayah ndramat para pwandrendres ta hu ndramat.
24 Pwen wawu nali pe pisu mepo wawu pwotisingi lohonga wawu, iro mwonen Ngindrai iyoh wawu, ara wawu hamou-hamou katotohun kiya kili Ngindrai, pe akoro manau kultuw ara.
Pwahanou iya kili hu ndramat kanyesou pwi
25 Nongan iya kili hu pihin mepo hu mepo hu kanmatiliwani kamai mapu: Kunpa handra nongan para pwahanou kinyau kili Yapan kinsa kili yo pwi, hapeko nakuiki lohongo mbukeno para tamwaniye, pe iyau koisirai ta Yapan, pe uwong tehe ndramat ngara kiwong nongan ndrokonan opu.
26 Paratesah, lang mahapo ara lenge nopwaran, pwen ulohonganiy tehe hiyan para kamai hamou kiro ko mwaihei tehe mahapo ita.
27 Kapa anyesou pwen, ara mbuna alohonganiy para atali pihin tam. Pe kapa anyesou pwi, ara mbuna alohonge para ayesou.
28 Hapeko kapa anyesou, ara pakut mwomwan kinto kili wou pwi. Pe kapa pihindrahin hamou kiyesou, ara kinmbusi pakut mwomwan pwi. Hapeko yihu mepo hu yesou, ara andre hu kaya nondriya nopwaran soyon nondriya mipwan para mahapo, pwen nakusopwat wawu para wawu mbuna kaya nondriya hu nopwaran aro.
29 Hapeko wawu nali pe pisu, upwai toro, ara ndroiyin lang kinna mulai. Pe kiro mahapo kiya, ara hu mepo mapihin ta hu, ara andre hukaro tehe hu kanyesou pwi;
30 pe hu mepo hutora rang mali hu, ara tehe hu konho rang pwi, pe hu mepo hutora pwes, ara tehe hu kanpwes pwi, pe hu mepo hu ngara hu kasousou hu melit, ara tehe hu mbukenan melit ara pwi;
31 pe yihu mepo ngara hu kapombulen kiyau hu menmena kol pwan, ara tehe hu konhoiki lohongahu kinna aliy pwi. Paratesah, kol pwan para mahapo, pe hu melit para aliy, ara andre kihipwen.
32 Yo ara unamiliy para lohonga wawu kiro mwoimwoi kiya hu melit para kol pwan. Kamai hamou kinyesou pwi, ara ngara kiyki lohongan kiya mbulya Yapan—pe andre kipwesani Yapan tapeh.
33 Hapeko kamai hamou mepo iyesou, ara ngara kilohonge soyon kiya hu melit para kol pwan iye—pe andre kipwesani nambuyun tapeh—
34 pwen hu namiliwan, ara imasumbuwe. Pe pihin hamou kinyesou pwi, ndre pihin mepo kinmatiliwani kamai mapu, ara lohongan ngara kiyki masih kiya kili Yapan, pe iyki nombuwen pe mwoiwan masih iya kili Yapan. Hapeko pihin mepo iyesou, ara lohongan ngara kiro hu melit para kol pwan—pe andre kiro pwesani nambuyun tapeh.
35 Yo urupo wong tehen toro, ara para hiyan tawawu, pe para kuiki songot sata wawu, ara pwi. Hapeko uwong, ara para mipwan tawawu kiro hiyan pe kiro mwonen, pe totohun ta wawu kiya kili Yapan, ara mbuna kimasumbuwe.
36 Pe kapa kamai hamou kilohonganiy tehe kinmbusi mwomwan, kinna kili pihin mepo kinmatiliwani kamai mapu, pe kinsokombut kinna tan, pe kapa hingirowan iya kili yiy ara kinpwoke, pe inamiliy para hilu kayesou, ara kimbusiy kiro ndruwa namiliwan. Pe kamai ara kinmbusi pakut mwomwan pwi, hilu kayesou.
37 Hapeko kapa kamai hamou ndriyan kipwoke pe ilahi para kikaituwe hingorowan mbukenan para andre kinyesou pwi, pe kinramwelehani yiy pwi, hapeko irahatini hingorowan pe namiliwan pwokeyan, ara imbusi hiyan para mbuna kiyesou kiya kili pihin mepo kinmatiliwani kamai mapu ara.
38 Pwen pe kamai mepo kiwiri pihin hamou mepo kinmatiliwani kamai mapu, ara imbusi kultuw imwonen, hapeko yiy mepo kinyesou kinna kili pihin ara pwi, ara imbusi kultuw mwayih masih.
39 Pihin hamou ara yiy ata nambuyun kapa nambuyun kinimat mapu, hapeko kapa kamai tan kimat, ara pihin ara ita mwoimwoi. Pe ilahiy para kiyesou kiya kili hiyeh inamiliy. Hapeko kamai mepo nakiyesou kiya kili yiy, ara yiy kinamili Yapan.
40 Hapeko lohongo mbukeno, ara pihin ara andre kiro nondriya pwesai kapa kiro mwoimwoi o—pe upa ndre Mwoiwa Ngindrai ara iripo luwani lohongo.