6
Mbuna akaiki wawu mbukenan mepo wawu rokum koro tine nongan
1 Kapa hamou ta wawu kipepet nongan kiyapolo hamou, ara wawu mbuna akawiri nali wawu kiya mbulmara nongan kili hu ndramat hu kowu ta Yapan, para hu karasusut nonagn kiya kili hu, hapeko akawiriy kiya mbulmara hu ndramira Yapan.
2 Pe wawu kowu tehe hu ndramira Yapan, ara andre hu kaiki hu ndramat para kol pwan koro tine nongan, ndre pwi? Pe kapa wawu kaiki hu ndramat para kol pwan koro tine nongan, pwen tehen tapeh pe wawu kanlahiy para akaramwanye hu lohongai mendreheh pwi?
3 Pe tana wawu tehe worou andre kaiki hu angelou koro tine nongan, ndre pwi? Kapa tora, lohongai para mipwan para mahapo, ara ilahiy para akaramwanye!
4 Pwen tehen tora ko, kapa wawu tora pepet iya hu lohongai tora, ara ngara wawu kasok ndramat para tamwaniye para ngawan mepo kinho haiye pwi, para kiramwaniyani hu lohongai tehen tora, ndre pwi?
5 Upwai toro, ara para kiyki masirai kisa kili wawu. Paratapeh, hamou lohongan waison kinto mwalinga wawu pwi para kiramwanye pepet mwalinga hilu ndramat hilu pwotisingi lohonga hilu.
6 Hapeko akanmbusi toro pwi, ndramat hamou ipwotisingi lohongan ara iyki nalin mepo ipwotisingi lohongan, ara iro tine mbulmara nongan—pe irayah iro mbulmara hu ndramat mepo hu kanpwotisingi lohongahu pwi!
7 Ndrokonan para aliy, ara wawu kanmbusi mwomwan mwalinga wawu, pe ipwainganiy tehe wawu kankose masih. Paratapeh pe mbuwali wawu para akakuni nopwaran? Pe paratapeh akansomwiy para hu ndramat kapokaiwe kili wawu pwi?
8 Hapeko pwi, wawu pakarawani wawu mbukenan, pe wawu mbusi mwomwan, pe wawu mbusi kultuw aro iya kili hu nali wawu pe pisu wawu hu hayah mepo hupwotisingi lohongahu.
9 Pe tana wawu pwi tehe hu ndramat kultuwaye hu pwassin, ara andre hu kanna nondriya Kingtom ta Ngindrai pwi, ndre? Wawu mbuna akapwasike wawu mbukenan. Hu ndramat hu mbusi kultuw para pilah, ndre hu ndramat hu ngara katotohun kiya kili hu ngindrai pwasoyou, pe hu ndramat kapo memeng, pe kultuw para kamai kimatiliwani kamai,
10 ndre hu ndramat para pahana, ndre hu ndramat para mwolou, ndre hu ndramat para kuimwa ndran tunguyan, ndre hu ndramat para pwataranani nongan, ndre hu ndramat para pokaiwe—hu masih ara, ara andre hu kanna nondriya Kingtom ta Ngindrai pwi.
11 Pe mamu hayah tawawu ro tehe hu ndramat tora. Hapeko Ngindrai kinmbusi wawu kantayah howen, pe kinmbusi wawu kanna haiyan, pe wawu kantayah hu ndramat imwonen iya ngala Yapan Yesu Kristus, pe iyasura Mwoiwan Haiyan ata Ngindrai torou.
Kultuw para memeng
12 Pe ndramat hamou andre kipa, “Melit masih ara hiyan sato para kumbusiy”—hapeko melit masih andre kiniyki hiyan pwi. “Melit masih ara hiyan sato para kumbusiy”—hapeko melit handra andre kinmbusi yo kurayah pwandrendres para aliy pwi.
13 Pe ndramat hamou andre kipa,“Anandrinai ara para ndriya ndramat, pe ndriya ndramat ara para anandrinai hapeko Ngindrai andre kipwalngani malndra kene ara.” Nombuwe ndramat ara para kapomemeng kaliy pwi, hapeko nombuwe ndramat, ara ata Yapan, pe Yapan ara para nombuwe ndramat.
14 Pe iyau pwoke ta Ngindrai, ihingini Yapan isatine kimat, pe andre kihingini worou katine tehen aliy yi.
15 Pe tana wawu pwi tehe hu nombuwe wawu ara nombuwe Kristus hakai-hakai mbukenan, ndre pwi? Pwen pe andre kunwiri nombuwe Kristus hakai-hakai ara, pe kuiki kiyata pihin hamou para payangosai, ndre pwi? Pwukene masih!
16 Pe wawu kowu tehe ndramat mepo yiy mbukenan ippai iyapolo pihin hamou para payangosai, ara nombuwe hilu kintayah hamou, ndre pwi? Paratesah, pwayan kinpwai kinpa, “Nombuwe hilu andre kirayah hamou o.”
17 Hapeko yiy mepo ippai iyasura Yapan, ara mwoiwa hilu ara hamou o.
18 Pe akaro mawen kultuw para memeng. Hu pakut mwomwan masih mepo ndramat hamou ngara kimbusiy, ara iro ngawan nombuwen, hapeko yiy mepo kipomemeng kiya nombuwen mbukenan, ara imbusi pakut mwomwan.
19 Pe wawu kanpahasaniy pwi tehe nombuwe wawu, ara hu yumwa totohun namandran ata Mwoiwan Haiyan mepo ita kili wawu, ndre pwi? Yiy mepo ita nondriya wawu, pe wawu wiri yiy iyau kili Ngindrai. Pe wawu ara ata wawu mbukenan pwi.
20 Pe kene wawu mepo Ngindrai isowani wawu iya aliy, ara namandran iya. Pwen tehen torako, akaranuhuyani Ngindrai kiro nombuwe wawu.