5
Nongan iya lohongai para kultuw pwassin
1 Titiye ingau tehe kultuw para memeng ara ita mwele wawu, pe kultuw ara, ara handra masih mepo hu ndramat hukowu ta Ngindrai, ara hu konho mbusiy pwi yi. Kultuw ara, ara ndramat hamou ngara kimatiliwani nambuyu taman.
2 Pe wawu sikiye wawu iya aliy! Hiyan para koyu wawu kisikirani wawu pe akarangsi wawu, pe akarasse ndramat mepo imbusiy kultuw iye, ara kiro mawen hu mbultere tawawu.
3 Paratesah, ndrokonan tehe kunto sura wawu iya nombuwe pwi, hapeko uta sura wawu iya mwoiwo. Pe uta sura wawu ara iya sai aro. Pe iya ngala Yapan Yesu torou, yo ara kunuiki kora ndramat mepo ngara kimbusi kultuw aro.
4 Pwen pe kiro mwonen wawu kambultere wawu, ara uta sura wawu iya mwoiwo, pe pwoke ta Yapan Yesu torou, ara ita sura wawu,
5 pwen ndramat aro, ara akatali yiy kiya nima Sinai, pe namiliwai para nombuwen ara andre kipwalngani yiy, pwen pe Ngindrai andre kisopwat mwoiwan kiro mwonen lenge Yapan kimui.
6 Wawu sap ngala wawu mbukenan, ara hiyan pwi. Wawu kowu tehe yis lumou o, ara ilahi kimbusi palawa sih sesek kingas, ndre pwi?
7 Pe wawu kawiri yis para mamu kiya mawen, pwen pe wawu andre karayah tehe ndrinanohun hambut howen mepo yis aliy pwi–tehe mahapo wawu tora. Paratesah, Kristus irayah noru sipsip para Pasopa torou, mepo kaniyki yiy tehe yukyuk para mwan kitimwiy masih.
8 Pwen tehen torako worou kasolowani yon para Pasopa, pe mbuna kiyapolo yis para mamu, mepo kultuw mwomwan pe kultuw pwassin, hapeko kiyapolo ndrinanohun howen mepo kultuw hiyan pe ndrokonan.
9 Pe kuntatuluwi nongno kinsa kili wawu para wawu mbuna kasusuye kiya sura hu ndramat mepo ngara hu kapo memeng—
10 pe kunpa hu ndramat masih para kol pwan iye ara hu ngara kambusi kultuw para pilah, ara pwi, ndre hu masih hu para mwolou, ndre hu para pahana, ndre hu ngara katotohun kiya kili hu ngindrai pwasoyou, ara pwi. Kapa tora, ara akatali kol pwan iye.
11 Hapeko mahapo, uratuluwi nongan isa kili wawu para wawu mbuna kasusuye kiyasura yiy mepo ipohowe yiy nali wawu ndre pisu wawu hamou mepo ipwotisingi lohongan, hapeko kultuw para memeng, ndre mwolou, ndre ngara kitotohun kiya kili ngindrai pwasoyou, ndre ndramat hamou mepo ngara kipwataranani nongan, ndre ndramat hamou para kuimwa ndran tunguyan, ndre yiy hamou para pahana. Hu ndramat tora, ara konan, wawu mbuna kanamnam kiya sura hu.
12 Pwen yopo hiyeh, pe andre kuiki hu mepo hutora ngawan para hu ndramat mepo hukonho rokum pwi, para hukoro tine nongan. Pe wawu ara para akaiki hu mepo hutora rokum para hu koro tine nongan.
13 Pe Ngindrai andre kiyki yihu mepo hutora ngawan hu koro tine nongan. “Pe ndramat kultuwayin pwassin mwalinga wawu, ara akarasse yiy kiya mawen kili wawu.”