4
Kultuw ndrokonan para mbulya aposel
1 Pwen aro ko, ara wawu kanime yowu tehe hu ndramat para poya mbulya Kristus tapeh, pe iyki mbulen para yowu kapohowe hu nongan kokohon ta Ngindrai.
2 Pe mbulen Ngindrai kiniykiy kinna kili hu ndramat, ara hu kapombulen kiyapolo lohongai ndrisiyon.
3 Pe kuniyki lohongo kinna nongan wawu rasusut isa kili yo iya aliy, ara pwi, ndre iya lohonga ndramat para kol pwan, para kuro tine nongan. Pe ndrokonan para aliy, ara yo mbukeno kunho rasusut nongan kinsa kili yo pwi.
4 Paratesah, kunlahiy para kulohongani melit handra mwomwan umbusiy pwi, hapeko ara kinmbusiy tehe mwomwan kinto kili pwi, ara pwi. Yapan opu andre kiramwanyani yo.
5 Pwen tehen torako ma lang kinsa mapu, wawu mbuna kapiye nongan para kiyki kora ndramat, akalonge kipoo Yapan kisa. Pwen yiy andre kimbusi lohongai kokohon ta hu ndramat mepo ita lokuhan, ara andre kiwiri kisa yelan ngawan. Pe kiro mwonen lang ara, Ngindrai andre kihari ngala ndramat hamou-hamou.
6 Pwen wawu nali pe pisu, hu melit aro, ara kunmbusiy pwen kinsa kili yo mbukeno pe Apollos para hiyan ta wawu, pwen andre wawu kawiri hinonou kiyau kili yowu kiya ndroiyi nongan mepo kanpwai ipa; “ Mbuna akambusi melit kiramwaitini tesah mepo kanratuluwiy.” Pwen andre wawu kansikiye hamou kihohin kili hamou, ara pwi.
7 Paratesah, hiyeh imbusi wawu pe wawuro hin kili hu hayah? Pe tesah ita kili wawu mepo wawu konho wiriy pwi? Pe kapa wawu kanwiriy, pwen paratapeh pe wawu hari ngala wawu tehe wawu ara pwi masih?
8 Melit masih wawu ndroisiy, ara akanwiriy topwei! Pe menmena wawu ara kinhon! Pe wawu kantayah hu king—pe konan yowu ara pwi! Yo ulohonganiy tehe wawu karayah hu king, pwen pe yowu andre karayah hu king kasura wawu yi.
9 Paratesah, nimnim paraliy isa kili yo, ara tehe Ngindrai iyki mbulen para aposel, ara isa mulan masih, tehe hu ndramat kanrakinima hu pwen para hu kamat kiro ngawan mbulmara hu ndramat, para hu angelou kanimei, pe hu ndramat i.
10 Yowu rayah tehe ndramat lohonga hu pwi iya mbulya Kristus, hapeko wawu, ara tehe hu ndramat mepo lohongahu waison iya kili Kristus! Pe yowu ara yowu mbuyei, hapeko wawu pwokeya wawu! Pe wawu ara hu ndramat huranuhuyani wawu, hapeko yowu ara hu ndramat kanranuhuyani yowu pwi!
11 Pe iro mwonen ipoo isa matnen paramwandrai mahapo, ara yowu ngara kamundrui pe koyu yowu ngara kisapak, pe koiwe yowu ara ndramwirin, pe hu ndramat hu mwiriyani yowu iya mwomwan, pe hape aleheh para yowu kakuw koro aliy, ara pwi.
12 Pe yowu ngara kapombulen pwokeyan kiya nima yowu mbukenan, pe hu ndramat ngara katten ana yowu, hapeko yowu ngara katoholi hu, pe iro mwonen hurandroyani yowu, ara yowu ngara koro tine pwokeyan.
13 Pe iro mwonen hu ndramat ngara kapwataranani yowu, ara yowu somwi hu hiyan o. Pe yowu rayah tehen konkon para kol pwan, pe iro tandrohongan ara ipoo isa mahapo, ara yowu rayah tehe ndramat o mwaihei—iya kili hu ndramat para kol pwan.
Pol ipwahanou pe iyuk lohongai
14 Yo kunratuluwi nongan iye para kiyki masirai kisa kili wawu, ara pwi, hapeko para kipwahanou wawu tehe wawu ara noru para nere imwonen.
15 Paratesah, konan kapa hu ndramat para memere tawawu iyau kili Kristus ara hu mapusangat, hu tama wawu, ara soyon pwi, yiy hamou opu, paratesah, iyau kili Kristus Yesu opu, yo urayah tehe tama wawu iya nongan hiyan.
16 Pwen tehen torako, urakamam tehe akoro ndruwa kultuwayi.
17 Pwen tunan aro ko, upwandrisa noru Timoti isa kili wawu. Yiy mepo noru, pe ndriyo ara imbulihi yiy, pe yiy ara iyki lohongan ndrisiyon iya kili Yapan. Pe andre kirakelehani lohonga wawu kiya tokuyo iya kili Kristus Yesu, mepo iho ndruwa hinonou to mepo ngara kuwiriy kiro hu mbultere tahu ndramat masih mepo hu ngara karokum koro masih kene.
18 Pe hayah tawawu ara wawu pa ndre andre kunsa saisai kunsa kili wawu pwi, pwen pe wawu ngara kasomwani wawu.
19 Hapeko pakeh andre kusa kili wawu, kapa ara namiliwai pwokeyan ta Yapan, pwen andre kuyirowe hu mepo hutora somwani hu pe hu tora wong, hapeko sehe pwoke ita kili hu.
20 Paratesah, Kingtom ata Ngindrai, ara para hu nongan pwi, hapeko para pwoke.
21 Kiya wawu namiliy tesah? Kusa kiyapolo wasiu hamou para kumwiriyani wawu, ndre kusa kiyapolo kultuw para namiliwai pe kultuw para ndriyai waison.