3
Hu ndramat hurokum pe hu pohon tahu
1 Wawu nali pe pisu, andre kunwong kinsa kili wawu tehe hu ndramat mepo Mwoiwan Haiyan ngara kiluwani wawu, ara pwi, hapeko tehe hu ndramat para kol pwan—pe lohongai ndrisiyon tawawu, ara tehe ta hu mbunah malaman mepo hutora kili Kristus.
2 Pe uhang wawu sus, pe anandrinai mandrowan, ara pwi, paratesah, wawu kanlahi para akayan mapu, pe ndrokonan para aliy, ara wawu kanlahiy mapu yi.
3 Paratesah, wawu tora ndron pahandra kultuwaye wawu para kol pwan. Pe wawu ngara kamaimai pe takokowai mwalinga wawu, pwen iyinganiy tehe wawu tora ndron kultuw para kol pwan. Pe kultuwaye wawu ipwainganiy tehe wawu tora lohonga ndramat para kol pwan.
4 Paratesah, kiro mwonen ndramat hamou kipa,“Yo ngara kuro ndruwa Pol,” pe hamou i ara kipa, “Yo ngara kuro ndruwa Apollos,” pwen kultuwaye wawu ara iyinganiy tehe wawu tora ndron tehe hu ndramat para kol pwan.
5 Pwen kiya mulan para aliy, tesah hiyan ita kili Apollos, pe tesah hiyan ita kili Pol? Hilu ara hilu ndramat para poya mbulen opu mepo imbusi wawu pwotisingi lohonga wawu—tehe Yapan kinrakinima hilu pwen iya mbulya hilu.
6 Yo uhasi anandrinai, pe Apollos itilingi ndran iya ndritan, hapeko Ngindrai opu, ara ngara kimbusi anandrinai ara kimandra.
7 Pe tunan aro ko, yiy mepo ngara kihisiy, pe yiy mepo ngara kitilingi ndran kiya aliy, ara mwaihei o, hapeko Ngindrai opu, ara ngara kimbusi hu anandrinai ara kamandra.
8 Pe ndramat mepo ihisiy, pe ndramat mepo itilingi ndran iya aliy, ara mbulya hilu handra ko. Pe Ngindrai andre kiyki kene mbulen ta hamou-hamou tahilu, kiho ndruwa mbulen hilu mbusiy.
9 Paratesah, worou ara ngara kasusuye kiyaharong pe kapo mbulya Ngindrai, pe wawu ara pinge Ngindrai, pe yumwa Ngindrai.
10 Pe iyau pahas ta Ngindrai mepo kiniykiy kinsa kili yo, ara iyki lohongai waison isa kili yo tehe ndramat para puliya seu para kurandroyi ndroho seu, pe ndramat hamou ita pun seu iya aliy. Hapeko hamou-hamou kiponokulani seu ara hiyan pe kipun.
11 Paratesah, hamou kinlahiy para kirandroyi ndroho seu hawum tehe Yesu Kristus kinrandroyin pwen, ara pwi.
12 pe kapa ndramat hamou kipun seu kiro ndroho seu aro kiya pat kol, ndre pat siliwa, ndre hu pat lahayan, ndre kei, ndre sike wit, ndre ndromndriu,
13 pwen mbulya yihu ndramat ara, pe sehe mbulya hu mepo ngara kambusiy, ara Ngindrai andre kimbusiy kisa yelan kiro mwonen Lenge tamwanye. Pe mwan andre kitimwiy pe kiyingani sehe mbulen ndramat hamou-hamou ngara kimbusiy.
14 Pe kapa tesah mepo kanpuliy pwen ara kiro hiyan, pwen ndramat para puliya seu ara, ara andre kiwiri kenen.
15 Hapeko kapa mbulyan ara kisongut, pwen ndramat ipuliy ara, ara andre kikuni koran, hapeko andre Ngindrai kisopwat yiy—pwen tehe ndramat hamou mepo sopwat yiy isa mawen mwan.
16 Pe wawu pahasaniy tehe wawu mbukenan ara yumwa totohun namandran ta Ngindrai, pe Mwoiwa Ngindrai ara ita kili wawu.
17 Pe kapa ndramat hamou kipwalngani yumwa totohun namandran ta Ngindrai, ara Ngindrai andre kipwalngani ndramat ara, paratesah, yumwa totohun ta Ngindrai, ara haiyan, pe wawu mbukenan, ara yumwa totohun namandran ara.
18 Pe wawu mbuna kapakarawani wawu mbukenan. Kapa hamou ta wawu kipa ndre yiy ara ipahan iya lohongai para hasap para mahapo, pwen kirayah tehe ndramat hamou mepo “lohongan waison pwi,” pwen andre lohongan kirayah waison.
19 Paratesah, lohongai waison para kol pwan iye, ara irayah tehe lohongai mwaihei o iya mbulmara Ngindrai. Tehe pwayan kinpwai kinpa: “Irakokowi lohongai waison ta hu ndramat iya hu lohongai hiyan tahu, mepo hu ngara kapakarawani hu ndramat kiya aliy.”
20 Pe nongan haiyan handra yi, ipa, “Yapan ipahasani tehe lohongahu ndramat lohongahu waison, ara pwalngengei o.’
21 Pwen torako, wawu mbuna kasap ngala hu ndramat mepo hu pohon para kol pwan! Melit masih kene ara ata wawu,
22 konan Pol, ndre Apollos, ndre Kepas, ndre kol pwan, ndre kimat ndre taleh, ndre mahapo ndre kamulan—melit masih ara, ara ata wawu,
23 pe wawu ara ata Kristus, pe Kristus, ara ata Ngindrai.