2
1 Wawu nali pe pisu, irayah isa kili yo tehen toro yi, iro mwonen usa pohowe titiye kokohon ata Ngindrai usa kili wawu, ara kunsa kinna polo hu nongan ndripiron ihohin pwi, ndre kinna polo lohongai waison ata ndramat, ara pwi.
2 Paratesah, tandrohongan uro sura wawu, ara umbusi lohongo para kunlohongani melit handra pwi, hapeko kuro lohongani Yesu Kristus opu mepo kanrapaingi yiy iho kei tondrih.
3 Yo usa kili wawu ara pwoke to pwi, pe unoh turuwe yo pe ulelen.
4 Pe nongno pe hinonou uro wiriy, ara kinna sura lohongai waison ndre nongan para kiluwi lohonga wawu, ara pwi, hapeko ipwaingani pwoke ta Mwoiwan Haiyan,
5 pwen pe lohongai ndrisiyon tawawu, ara andre kinto ndruwa lohongai waison ta ndramat, ara pwi, hapeko andre kiho ndruwa pwoke ta Ngindrai.
Lohongai waison ta Ngindrai ara Mwoiwan Haiyan ngara kipwainganiy
6 Pe ndrokonan tehe yowu pohowe nongan handra para lohongai waison iya kili hu mepo lohongahu iman, hapeko lohongai waison aro, ara ta hu hasap para mahapo, ndre ta hu pohon para hasap para mahapo pwi, mepo lohongai waison ta hu andre kihipwen o mwaihei, ara pwi.
7 Pukene, yowu pohowe lohongai waison ta Ngindrai, lohongai kokohon mepo Ngindrai ikulaniy pe kinrakiniman para andre kihari ngalarou kiya aliy ma kol pwan kintayah mapu.
8 Hapeko hamou tahu pohon para hasap para mahapo, ara lohongan kinleu kinna aliy pwi, paratesah, kapa hu kapahas kiya aliy, ara andre hu kanrapaingi Yapan para ngana pwoke ara pwi.
9 Hapeko pwayan kinpwai pwen kinpa:
“Tesah mara ndramat kinnimei mapu,
pe tesah ndrainga ndramat kinhilingiy mapu,
pe kinleu kinna lohonga ndramat hamou mapu,
ara hu melit mepo Ngindrai kinmwanyaniy pwen ata hu mepo ndriyahu imbulihi yiy—
10 pe hu melit ariyo, ara Ngindrai kinpwainganiy pwen kinsa kili worou iyau kili Mwoiwan Haiyan atan.
Pe Mwoiwan Haiyan ngara kisehe hu melit masih, pe hu melit kokohe masih i, ata Ngindrai.
11 Paratesah, hamou kinlahi kipahasani hu lohonga ndramat hamou, ara pwi, mwoiwa ndramat mbukenan opu mepo ita kili yiy, ara ipahasaniy. Pe iya harong o tehe hu lohonga Ngindrai ara hamou kinpahasaniy pwi, Mwoiwa Ngindrai opu ipahasaniy.
12 Pe tesah worou kanwiriy, ara mwoiwa ndramat para kol pwan, ara pwi, hapeko Mwoiwa Ngindrai mepo iyau kili yiy, para andre lohongarou kileu kiya hu melit masih mepo Ngindrai kinikiy mwaihei opu, kinsa kiltou.
13 Nongan yowu wong iyaliy ara iye, ara yowu kanwong kinna lohongai waison mepo ndramat para pwan ihinuwani yowu iyaliy, ara pwi, hapeko nongan mepo Mwoiwan Haiyan ihinuwani yowu iya aliy. Yowu ratiyani nongan ndrokonan para mwoiwarou, iyapolo hu nongan mepo Mwoiwan Haiyan ihinuwani worou iya aliy.
14 Ndramat mepo lohonga Mwoiwan Haiyan kinto kili yiy pwi, ara andre kinwiri hu melit Mwoiwa Ngindrai kikiy kiya kili yiy pwi, hapeko andre kiyirowei tehe ara lohongai waison kinto aliy pwi. Pe lohongan andre kinileu kinna aliy pwi yi, paratesah, hu melit ara, ara andre kanimwaniyaniy kiyau kili Mwoiwan Haiyan opu.
15 Pe ndramat mepo Mwoiwan Haiyan iro kili yiy, ara ilahiy para kiramwayani hu melit masih, hapeko yiy mbukenan, ara hamou para kol pwan kinlahiy para kiramwayani yiy, ara pwi.
16 Paratesah, “Hiyeh ipahasani lohonga Yapan,
pe ilahi para kipwahanou yiy eh?”
Hapeko lohonga Kristus ara iripo kiltou.