Pol iratuluwi nongan sahin imu iya kili
Hu Korin
Nongan imu
Pe iro tandrohonga lenge Pol, kol ngawan Korin ara kol hakol ita kol namandran hape Akaya ita kolo hu Krik. Pe Pol mbukenan ara yiy ndramat imu para pohoweya nongna Yesu iya kol ngawan Korin, pe iro mwonen ara, ara mbultere tahu ndramat hurokum ara irayah iro kol ngawan ara. Hapeko iro mwonen Pol itali hu pe iyapo mbulen iya hape yi, ara hu nopwaran hurayah kili hu ndramat mepo hurokum para kol ngawan Korin. Pwen tehen torako Pol iratuluwi nongan aro, ara para kiyki lohongai hiyan kiya kili hu, pe kiramwaniyani hu nopwaran tahu.
Pol ara koyun isikirani hu Kristen para Korin, matisan lohongai ndrisiyon tahu kinpwoke pwi. Pe matisan kultuw hiyan tahu kiya pwalngengei. Yiy iwong iya kultuw imwonen para hu yesowai koro mbusiy, pe iya hu nopwaran ngara karayah kiro mwonen yihu ndramat konho hilingi Mwoiwan Haiyan ata Ngindrai, mepo ngara kiluwani hu kiya tokuyai tahu, ara pwi. Pe iwong i iya kultuw hiyan para totohun, pe iya hu yuk-yuk mepo Mwoiwan Haiyan ngara kiykiy kiya kili hu Kristen. Pe iwong tehe yihu ndramat mepo hu kanmat, ara andre hu kasa tine paiwe yi.
Hu melit masih aro, ara ngara kiyki nopwaran kiya kili hu para Korin, pe Pol iwong iya nongan hiyan masih para kisopwat hu para hu kapahas kiya namiliwai pwokeyan ta Ngindrai. Nongan sahin para puk mepo yihu Kristen soyon ngara kanamiliy masih, ara sapta 13. Ita sapta ara, ara Pol iyingani tehe kultuw para ndriya ndramat kimbulihi hu ndramat hayah, ara yukyuk ihohin mepo Ngindrai ngara kiykiy kiya kili ndramiran hu.
1
1 Yo Pol, uratuluwi nongan iye, iyapolo nali worou Sostenes. Ngindrai kintakinima yolu iyau namiliwai pwokeyan atan tehe aposel ata Kristus Yesu.
2 Pe nongan iye iya kili hu mepo hurokum hutora kol ngawan Korin, mepo Kristus Yesu kiniyoh hu pe hu kanrayah hu ndramiran haiyan. Yihu pe hu masih mepo hutora masih kene mepo hu ngara kayoh kiya ngala Yapan Yesu Kristus torou—mepo Yapan tahu, pe torou i.
3 Pahas pe ndriya wayis iyau kili Ngindrai Tamarou pe ata Yesu Kristus kiro sura wawu.
Pol irawuloh
4 Yo lang masih ngara kurawuloh kiya kili Ngindrai sata wawu, paratesah, kiniyki pahas tan kinsa kili wawu iyau kili Kristus Yesu.
5 Paratesah, iyau kili yiy opu, wawu kanpep iya hu melit masih hiyan iyau sai masih—pe iya hu nongna masih handra-handra, pe iya hu lohongai iman masih—
6 paratesah titiye towu iya mbulya Kristus, ara Ngindrai kinmbusiy kintayah mannan ita mwalinga wawu.
7 Pwen tehen tora ko, akandroisi hu yukyuk para mwoiwa wawu pwi, iro mwonen wawu tora longe Yapan Yesu Kristus torou para kipwaingani yiy.
8 Pe yiy andre kipwokeyani wawu kipoo lang kiya hapwen, pwen pe andre akoro mwoimwoi kiya hu mwomwan kiro mwonen lenge Yapan Yesu Kristus torou.
9 Ngindrai mepo tesah ipwai, ara andre kimbusiy, pe iyoh wawu para akambultere kiyaharong kiyapolo Norun Yesu Kristus mepo Yapan torou.
Hu ndramat hu rokum hu masilpat mwalinga hu pohon
10 Pwen upwatisingi isa kili wawu nali pe pisu iya ngala Yapan torou Yesu Kristus, para wawu masih koro ndriya sih kiya kili hamou-hamou kiya tesah wawu pwai, pe wawu mbuna kamasilpat, hapeko lohonga wawu ara kiya wule handra ko, pe kiro mwonen.
11 Wawu nali pe pisu, yihu ndrai sih ta Klowe hayah, ara husa nese ndraingo tehe wawu rakokowai mwalinga wawu.
12 Ndroiyi lohongo ara tehen toro: Hamou ta wawu ngara kipa, “ Yo ngara kuro ndruwa Pol,” pe hamou kipa; “Yo ngara kuro ndruwa Apollos,” pe hamou kipa, “Yo ngara kuro ndruwa Kepas,” pe hamou i, ngara kipa, “Yo ngara kuro ndruwa Kristus.”
13 Pe kinlahiy para Kristus kimasilpat pwi. Pe yo Pol uho ndrungak kei tondrih sata wawu, ndre? Pe wawu wiri paptais ara iya ngala Pol, ndre?
14 Yo urawuloh iya kili Ngindrai tehe hamou tawawu kinwiri paptais kili yo pwi, Krispus pe Kayus opu,
15 pwen tehen tora ko, hamou tawawu mbuna kipa iwiri paptais iya ngolo.
16 (Ndrokonan, tehe hu ndrai sih ata Stepanas, ara hu wiri paptais kili yo, hapeko hamou hira ndron kapa kiwiri paptais kili yo, ara kunlahiy para kulohonganiy pwi.)
17 Paratesah, Kristus ara kinpwandrisa yo para kusa pe kusumuluwani hu ndramat, ara pwi, hapeko para kupohowe nongan hiyan—pe kinna sura hu nongan para lohongai waison ta ndramat mepo para kiluwi lohonga ndramat, ara pwi, paratesah, matisan pwoke para kei tondrih ta Kristus kirayah mwaihei o.
Rapaingi Kristus iho kei tondrih, ara lohongai Waison ta Ngindrai pe Pwoke tan
18 Paratesah, nongan hiyan para kei tondrih, ara nongan mwaihei o iya kili hu ndramat mepo andre hu kasongsin. Hapeko worou mepo Ngindrai kinsopwat worou, ara pwoke ta Ngindrai isa kiltou.
19 Paratesah, pwayan kinpwai toro: “Andre kupwalngani lohongai waison tahu mepo lohonga hu waison; pe lohongai iman ta hu ndramat mepo lohongahu iman, ara andre kumbusi hu para hu kamakokowu.”
20 Ndramat lohongan waison, ara aleheh? Pe ndramat para hinuwani nongan para pwahanou, ara ita aleheh? Ndramat lohongan iman para lang hasap mahapo, ara aleheh? Ngindrai kinmbusi lohongai waison ta hu ndramat para kol pwan kinna mwaihei opu, ndre pwi?
21 Paratesah, nondriya lohongai waison ta Ngindrai, hu ndramat para kol pwan mepo lohongahu waison, ara hu kanpahasani yiy pwi. Pe Ngindrai ara ipwes iya nongan mepo pohowei pe lohongai waison kinto aliy pwi, para kisopwat yihu mepo hu pwotisingi lohongahu.
22 Pe hu Yutah hunamiliy para hu kanimei hu kaipisa pwoke, pe hu para Krik hu ngara kaseyeh lohongai waison,
23 hapeko yowu ara topo pohowe Kristus mepo kanrapaingi yiy iho kei tondrih, pwen nongan iye iya kili hu Yutah, ara iratti hingorowa hu, pe iya kili hu Ndramira Lah, ara nongan mwaihei o.
24 Hapeko iya kili hu mepo Ngindrai kiniyoh hu, yihu para Yutah pe hu para Krik, ara nongna Kristus ara pwoke ata Ngindrai pe lohongai waison ata Ngindrai.
25 Paratesah, lohongai mepo waison pwi ata Ngindrai, ara lohongai waison iya mepo iramwaitini lohonga ndramat waison para kol pwan, pe hu mbulya Ngindrai mepo pwoke para aliy pwi, ara pwokeyan iya, iya pwoke ta ndramat para kol pwan.
26 Pwen wawu nali pe pisu, wawu kalohongani wawu ro tapeh iro mwonen Ngindrai iyoh wawu. Pe wawu soyon pwi, ara lohonga wawu waison iya nimnim ta hu ndramat, pe hu soyon pwi, ara ndruwa hu ara hiyan pwi.
27 Hapeko Ngindrai kintakinima lohongai waison pwi ta ndramat para kol pwan, para kiyki masirai kiya kili hu ndramat lohongahu waison. Pe Ngindrai kinrakinima hu melit mepo pwokeyahu pwi para kol pwan, para kiyki masirai kiya kili hu mepo hu pwokeyan.
28 Pe Ngindrai kinrakinima hu melit mepo hu ndramat para kol pwan hunimei ara mwaihei o—pe hu melit ngalahu pwi para kol pwan—para kipwalngani pwoke para hu melit mepo ma ngala hu,
29 pwen pe andre hamou kisap ngalan kiya mbulmara Ngindrai, ara pwi.
30 Hapeko tunan yiy opu, pwen wawu tora kili Kristus Yesu. Yiy mepo isarayah lohongai waison torou iyau kili Ngindrai—mepo imbusi kultuwayirou imwonen, pe turayah haiyan, pe irakonuhi rou.
31 Pwen tehen tora ko, tehe pwayan kinpwai pwen toro: “Yiy mepo pakisap ngalan, ara kiro kili Yapan pe kisap ngalan.”