2
1 Baing ina naga, Urana sahi oxatua sabalunia xaung titia, xaung axamang longgalo duwa maluxu manadi.
2 Xaidap 7 ma, baing Urana bagu oxatandi tuxudi ba disup, baing yagua mana xaidapka 7 mana oxatang longgalo.
3 Binabu Urana sina guxama na xaidap 7 saing mogu naina, namua na xaidapka yagua mana oxatang longgalo tuxudi bungina tongtongia axamandi.
Urana Tongtongia Lup Xaung Haing
4 Naxuyanga li baxanga bungina sabaluna xaung titi disok, bungina Toxoratamona
5 Muga bing xai xaung xalaxala angingam dahaing teguyu, namua na Toxoratamona Urana sina kuya mari titia teguyu saing lipu tela wa teguyu bu hai xaung xuma titia.
6 Ning uxua haing sangua titia bu titi ubung longgalo langiding.
7 Baing Toxoratamona Urana tongtongia lipua mana titi gagabinoa. Yubua yaganga walingama maluxu yungxang ginanginia, saing lipua sok lipu walingama.
8 Baing Toxoratamona Urana tongtongia umanga tela sanga karagia, mana long tela yanoa Iden. La ba ta lipua tongtongia ba.
9 Baing Toxoratamona Urana libu xai xangxana disok titia, bagungadinga daxai sibuna xaung daxai mana xangingua. Maluxu mana umanga baguba xai luwa dili: xaiya sina walinga xaung xaiya sina xabianga mana xai xaung diana.
10 Lang tela luki masok sangua titia Iden ba sina langa na umangua. La ba maxania hata gatung luwa luwa.
11 Gatung mugamugangama yanoa Pison. Hokhogia maluxu titia Habila, titia gol wa mana ba.
12 Baing gol ba xai sibuna. Delium xaung oniks duwa la ba xauna.
13 Gatung luwa yanoa Gihon. Hokhogia maluxu titia Kus.
14 Gatung tuwa yanoa Taigris, luki maluxu Asiria rubinia sanga karagia. Baing gatung luwa luwa yanoa Yupretis.
15 Toxoratamona Urana xap lipua saing ta umangia Iden bu tuxu oxatua titia xaung wasa mana.
16 Baing Toxoratamona Urana tabina lipua ba, “Ung sanga ba oxong xai aningong longgalo umangia li,
17 ning labu oxong xai aningondi mana xaiya sina xabianga mana xai xaung dianau tai. Namua na bungina oxong, maxuna bagula umati.”
18 Baing Toxoratamona Urana harua ba, “Lipua wa olang bing xai te. Bagula ngatongtongia haulinganoa ba baba.”
19 Muga Toxoratamona Urana xap titia saing tongtongia asaxa xaung mang xangxana masup. Tauna, xapdi ma rangua lipua bu lungu yaya baruamtadi bagula uxudi. Baing baru yanta lipua uxu taining tainina bing ding yadingdi naga.
20 Lipua sina yayadi na moru longgalo, mang sabalunam longgalo xaung asaxa abunging longgalo. Ne ing haulingang tela ba baba Adam te.
21 Binabu Toxoratamona Urana hamati lipua ba kinu hadali. Kinu mua, baing xap uleng hataing tela saing usiti yabanoa muli xaung sangga.
22 Baing Toxoratamona Urana tongtongia haing tela mana uleng hataina xap sangua luba, saing xap ma rangua lipua.
23 Baing lipua harua ba, “Sup baing. Riagu naga!
Tuanoa sok mana tuaguadi,
xaung sangganoa sok mana sanggagua.
Bagula ngauxu ba, ‘Haing’,
namua na Urana xap sangua Lup.”
24 Mana namua baguli lup tela yunga baungtibundi saing taga rangua haininoa, baing tang disok lipu taininau.
25 Baing lipua haininoa tang duwa mulang, ne tang memeyading te.