Xailongga li naxuya mana Urana tongtongia axamandi xaung mogu Ebraham bakbagindi ba disok lipuxindi. Tauxu xailongga li ba,
Unggutinga
Namua Dibung Xailongga Li
Lipu buningama bung xailonginoa bu naxuya mana Urana tongtongia axamandi xaung waxata rangua bakbak tela baru xaung axamandi disok manadi. Naxuyangua ungguti mana lipua Adam ila ila laing Ebraham ila laing Yekop, saing sup mana Yekop garanoa Yosep matianoa mana Isip.
Xailongga li hatanga Urana bo ba rung rangua lipudi baru. Hatanga ba daxangadi lipudi ditongtongiadi ba duwa maringina Urana maxania ding longgalo didoa. Nabu lipudi disu mana ding murungadinga, dahanggalangia axamandi. Daxanga taininau ing ganina—daxangua Urana tongtongia, Yesu Kristo baing. Bungina tawaxata rangua Urana, baing ina naga, tarung xai rangua Urana.
Lipu Buningama
Lipu buningama bung yanoa mana xailongga li te, ne lipu xabiangam xumana dahatum ba Moses bung, bila dahatum ba bung xailong 5 dungguti Urana Xuang Mugamugangama (Unggutinga, Xapdi Muli, Lipu Hananiangam Oxatanoa, Titinga xaung Hanaunaunga). Axadi li disok niani xumana muga mana Moses sok, binabu naxuyangadi li ing sibunia te, lungudi saing bungdi mari. Niania bung mosi mana xabia te, bila liwe mana 1500 BC xaung 1230 BC.
Haruanga Tuandi
• Mugamugau sibuna (1:1–11:26)
• Unggutinga (1:1–2:3)
• Adam Ip tang duwa Iden (2:4-25)
• Adam Ip tang diyamu Urana (Hataina 3)
• Kubolu diana tubu (4:1-16)
• Ken bakbagindi (4:17-26)
• Adam bakbagindi (Hataina 5)
• Urana ayangana mana tongtongia lipudi (6:1-8)
• Silinga sabanga (6:9–9:29)
• Numanumadi disok (10:1–11:26)
• Isrel mugangading mugamugangamdi (11:27–50:26)
• Ebraham walinganoa (11:27–25:11)
• Ismael bakbagindi (25:12-18)
• Yekop walinganoa (25:19–35:29)
• Iso bakbagindi (36:1–37:1)
• Yosep walinganoa (37:2–50:26)
1
Unggutinga
1 Mugamugau sibuna, Urana xap sabaluna xaung titia masok.
2 Titia babun te, wa haxuging sibuna. Labiana kaukau miawa ubuna, saing Urana Aningonoa tangaxa etuaʼm tek ubuna.
3 Baing Urana harua ba, “Luliana sok,” baing lulianoa sok.
4 Urana bagu ba luliana xai. Baing hata luliana xaung labiana.
5 Urana uxu luliana ba, “xaidap,” saing uxu labiana ba, “yambong.” Yambonga ila sup, buraragina sok—xaidap mugamugangama.
6 Sup, baing Urana harua ba, “Ganangana sok liwe mana langa bu hata langdi.”
7 Baing Urana tongtongia ganangana saing hata lang hawama xaung lang etuama. Baing sok bila ba.
8 Urana uxu ganangana ba, “sabaluna.” Yambonga ila sup, buraragina sok—xaidap luwa.
9 Sup, baing Urana harua ba, “Langa wa hawa sabalunia gugunia mala mana long taininau, bu long mamasana sok.” Baing sok bila ba.
10 Urana uxu long mamasana ba, “titi,” saing uxu lang guguniangana ba, “tek.” Baing Urana bagu ba xai.
11 Baing Urana harua ba, “Titia ta axamang xangxana masok: anginga xuyanamdi xaung xai aningonamdi maradingdi duwa manadi, taining tainina disu mana xadingdi.” Baing sok bila ba.
12 Titia ta axamang xangxana masok: anginga xuyanamdi xaung xai aningonamdi maradingdi duwa manadi, taining tainina disu mana xadingdi. Baing Urana bagu ba xai.
13 Yambonga ila sup, buraragina sok—xaidap tuwa.
14 Sup, baing Urana harua ba, “Luliandi disok sabalunia bu dahata xaidap xaung yambong. Namuxidingdi bing dahatanga nianigesakkamdi, xaidapdi xaung nianidi.
15 Lulianadi disina sabalunia bu disaxaxangia titia.” Baing sok bila ba.
16 Urana tongtongia luliang sabanga luwa. Luliang sapsambagiak wasa mana xaidaba xaung luliang kaxukana wasa mana yambonga. Tongtongia hatungdi xauna.
17 Urana tadi sabalunia bu disaxaxangia titia,
18 duwasa mana xaidaba xaung yambonga, xaung bu dahata luliana xaung labiana. Baing Urana bagu ba xai.
19 Yambonga ila sup, buraragina sok—xaidap luwadi luwadi.
20 Sup, baing Urana harua ba, “Tega baxagi mana songdi xaung asaxa walingam xangxana ditalia. Mangdi disok doti makisi sabalunia etuaʼm titia.”
21 Binabu Urana xap masok asaxa sabanga tekkamdi xaung songdi xaung axalaxala walingam xangxang tekkamdi ditalia tega, disu mana xadingdi, xaung mang xangxana, disu mana xadingdi. Baing Urana bagu ba xai.
22 Baing Urana sina guxama nadi. Harua ba, “Ahayau asok xumana saing abaxagi tegia. Mangdi xauna disok xumana titia.”
23 Yambonga ila sup, buraragina sok—xaidap luwadi luwadi hiliadinga.
24 Sup, baing Urana harua ba, “Asaxa xangxana disok titia, disu mana xadingdi: morudi, asaxadi dahaxa mua titia, xaung abungindi, taining tainina disu mana xadingdi.” Baing sok bila ba.
25 Urana tongtongia asaxa abungindi disu mana xadingdi, morudi disu mana xadingdi, xaung asaxa longgalo dahaxa mua titia disu mana xadingdi. Baing Urana bagu ba xai.
26 Baing Urana harua ba, “Taxap lipudi masok bila kira sibura, babura wa manadi, bu duwa etua mana song tekkamdi xaung mang sabalunamdi, etua mana morudi xaung asaxa abunging longgalo, xaung etua mana axamang longgalo dahaxa mua titia.”
27 Binabu Urana xap lipudi masok bila ing sibuna,
maxuna, tongtongiadi disok bila ina,
tongtongiadi lup haing.
28 Baing Urana sina guxama nadi. Harua ba, “Ahayau asok xumana. Abaxagi titia saing awa etua mana. Awa etua mana song tekkamdi xaung mang sabalunamdi xaung axamang longgalo dahaxa mua titia.”
29 Baing Urana harua ba, “Alungu to, ngasina anginga xuyanam longgalo duwa titia nang xaung xai aningonam longgalo maradingdi duwa manadi nang. Bagula duwa angiaimdi.
30 Baing asaxa titiam longgalo, mang sabalunam longgalo xaung axamang longgalo dahaxa mua titia—axalaxala yagangam longgalo—ngasina tatubang xaung xailong gamatang longgalo nadi bu duwa angiadingdi.” Baing sok bila ba.
31 Urana bagu axamang longgalo tongtongiadi ba disok xai sibuna. Yambonga ila sup, buraragina sok—xaidap tuwa tuwa.