3
Luba Hainga Tang Diyamu Urana Tabinanganoa
1 Moxa kubolung murakkama dali asaxa abunging longgalo Toxoratamona Urana tongtongiadi. Ma xusunga hainga ba, “Maxuna Urana biliangtang ba, ‘Labu tang gaxang xai aningong longga duwa umangiau tai’?”
2 Baing hainga harua na moxua ba, “Sanga ba tam gaxang aningonadi mana xaidi duwa umangia,
3 ne Urana harua ba, ‘Labu tang gaxang xai aningonadi mana xaiya li lia mana umangau tai, xaung labu aringgu tai, nam tang gamati.’ ”
4 Ne moxua harua na hainga ba, “Tegu. Bagula amati te.
5 Urana harua bila ba namua na xabia ba bungina axang aningonoa bagula tang maxaimdi daxaxa ding, saing bagula awa bila Urana, axabia xai xaung diana.”
6 Hainga bagu xaiya ba aningondi daxai mana xangingua xaung bagungadinga xai sibuna maxania, saing muruna mana xabiangua bagula sina na. Baing ina naga, xap saing xang. Saking sina hatainoa na ayuanoa wa rangua, saing xang.
7 Baing tang maxadingdi daxaxa ding, saing tang dibagu daxabia ba duwa mulang. Binabu dahatu xaiya pik londi, saing dahaxam ba rangrang sanggadingdi.
8 Bungbung, longa xaringa, baing luba haininoa tang dilungu Toxoratamona Urana haxa maluxu umangia, baing dihisa mana Toxoratamona Urana liwe mana xaidi umangia.
9 Ne Toxoratamona Urana wagi mana luba ba, “Uwa bila?”
10 Baing haxuya ba, “Ngalungung uhaxa maluxu umangia, saing ngamaxuwa namua na ngawa mulang. Binabu ngahisa.”
11 Baing xusunga ba, “Gaxarea balaung ba uwa mulang? Oxong xaiya ngabiliung mana ba aningondi?”
12 Luba harua ba, “Haingga usina ba wa rangua nga ba—ina sina xai aningong hatainoa nanga, saing ngaxang.”
13 Saking Toxoratamona Urana xusunga hainga ba, “Uraxata ulibu bila ba?”
Hainga harua ba, “Moxua tuxu murak manga, saing ngaxang.”
14 Binabu Toxoratamona Urana harua na moxua ba, “Ulibu bila ba, binabu
“Mauxanganoa bagula xapkung ganim liwe mana moru longgalo
xaung asaxa abunging longgalo!
Bagula uhaxa gamomia
saing bagula oxong gagap
mana xaidap longgalo laing walingama sup.
15 Baing bagula ngata kubolu bixuama
wa liwe mana ung xaung hainga,
xaung wa liwe mana xuyama xaung xuyanoa,
bagula xuyanoa ruha toxoma,
saing bagula ugaxu king tambonga.”
16 Harua na hainga ba,
“Bagula ngalibu salak hayauxingama xapkung sabanga sibuna,
saing bagula uxunumia salak sabanga bungina uhayau garadi.
Bagula atim mana ayuam,
ne bagula wa etua maung.”
17 Baing harua na lupka ba, “Ulungulinga hainima saing oxong xai aningona ngabiliung mana ba, ‘Labu oxonggu tai.’ Binabu,
“Mana namua ulibu bila ba, mauxanganoa xap titia,
bagula umakasa sibuna ba oxop angingua mana bu oxong,
mana xaidap longgalo laing walingama sup.
18 Bagula waxu ruxunamdi xaung tatubang diandi dahaing umangamia,
saing bagula oxong anginga xumangamdi xaung anginga abungindi.
19 Bagula salaksalaga sok ramramomia,
bungina oxop angingua oxong,
laing umati saing ugoxoya mala muli titia,
ngatongtongiaung masok mana ba,
namua na uwa titi gagabina,
saing bagula ugoxoya mala titi gagabinia muli.”
20 Lupka Adam sina yaya Ip na haininoa, namua na bagula sok lipu walingam longgalo bauding.
21 Baing Toxoratamona Urana tongtongia iriapdi asaxa sanggania na Adam haininoa tang saing sausaudi.
22 Baing Toxoratamona Urana harua ba, “Tauna, hatata lipua sok bila kiria tela ba, namua na xabia xai xaung diana. Ne xai te nabu raria rimanoa saing xap xaiya sina walinga aningondi. Nam xang bu wa bungingbunginalo.”
23 Binabu Toxoratamona Urana soxi luba tang mala sangua Umanga Iden, ba hai xaung xuma titia Urana tongtongia mana ba.
24 Suka luba mala masup, baing ta kerubimdi mali Umanga Iden sanga karagia, xaung ta waxang sabanga yap mananam bilikbiliga saing xukxugia hataing hataina bu disoxauti daxanga ila mana xaiya sina walingua.