8
Jesús ntowa thap mil men
(Mt. 15:32-39)
1 Lenꞌ wiz ya taxa mkata bro toz men lo Jesús nde naꞌngenta jwanꞌ wa re men. Zyasa mbrez Jesús re xinꞌ teꞌd Xaꞌ nde nchab Xaꞌ:
2 —Ndlat lazoꞌn ngwi'n re men reꞌ, tak ndala son wiz nzi xaꞌ kon na nche' nde naꞌngenod xaꞌ jwanꞌ wa xaꞌ,
3 tez tata tera wa xaꞌ goned na xaꞌ liz xaꞌ, naxkeꞌ mbiy yek xaꞌ ned, tak nzo xaꞌ xija nde tij.
4 Leꞌ re xa nak xinꞌ teꞌd Jesús nchab:
—¿Plo ya xinꞌ jwanꞌ wa reta men reꞌ, tak ncheꞌ ngenta kwan nak nde tij nzi re yez?
5 Zya mnabdiꞌs Jesús lo xaꞌ:
—¿Pla pan ngeno goꞌ?
Leꞌ xaꞌ mkab:
—Gaza.
6 Zyasa mnabeꞌ Jesús tyob reta men izyo; nde mxen Jesús re gaz pan, ngolo mdaꞌ Xaꞌ dyux lo Dios, mblirol Xaꞌy, nde mdaꞌ Xaꞌy lo re xinꞌ teꞌd Xaꞌ, sa yathi'd xaꞌy; nde ngwathi'd xa'y lo reta men.
7 Noga ngeno xaꞌ pla mbel tya; nde taga mbli le'y Xaꞌy nde mnabeꞌ Jesús yathi'd xaꞌy lo reta men.
8 Nde mda men axta kebeꞌ mze lenꞌ men; ngolo mne mda reta men, zyasa mthop xaꞌ reta jwanꞌ mbroxo'b nde mkata tib gaz chokwida.
9 Lo reta men jwanꞌ nzi tya, nzi ti thap mil xaꞌ, zyasa mchaꞌs Jesús reta men.
10 Nde ngwap Jesús lo bark kon re xinꞌ teꞌd Xaꞌ nde nda xaꞌ tenꞌ nak lo xyon Dalmanuta.
Re xaꞌ fariseo nya'b xaꞌ li Jesús yalnaro lo xaꞌ
(Mt. 16:1-4; Lc. 12:54-56)
11 Tya mzin pla xaꞌ fariseo, tolo chepa mbrez xaꞌ lo Jesús, mna'b xaꞌ yalnaro jwanꞌ nde lo beꞌ, sa libeꞌ xaꞌ nyenꞌ cho liga Dios mtelꞌ Jesús.
12 Zyasa axta mtiꞌ lazoꞌ Jesús nde nchab Jesus lo xaꞌ:
—¿Kwan sa re men nzi nche' ncholaꞌs xaꞌ lin yalnaro lo xaꞌ? Nipa na lo go', ke nekthib yalnaro na'lot na lo me ta nzi nche'.
13 Nde mblaꞌ Jesús re men ya, bere ngwap xaꞌ lo bark tedib gob, nda xaꞌ tedib lad ro nittoꞌ.
Lebadur jwan' nak re xa' fariseo
(Mt. 16:5-12)
14 Le' re xin' te'd Jesús mbyaj yek xaꞌ nkweꞌ xaꞌ pan, benꞌ thipta pan ngeno xa' len' bark.
15 Le' Jesús mnabe' lo xaꞌ, nchab Jesús:
—Pto nza go', nda wiꞌ toz goꞌ kon lebadur jwan' nak re xaꞌ fariseo nde lebadur jwan' nak Herodes.
16 Nde mdobte nchab xaꞌ lo ta xaꞌ:
—Tak na'ndenod naꞌ pan jwanꞌ nasa ta mbez Xaꞌ.
17 Zyaga mne Jesús jwan' ta nzi bez xaꞌ nde nchab Jesús lo xaꞌ:
—¿Kwan ta nzi bez go',cho tak naꞌndenod goꞌ pana? ¿Cho naꞌnchonta goꞌ diꞌs, neka tera yen goꞌ? ¿Tata ben' ne toz lazo' goꞌ?
18 ¿Ndob ngud lo goꞌ nde nangwi'd goꞌ, ndob nza goꞌ nde nanchonta goꞌ diꞌs? ¿Nde naꞌntelaꞌsta go'?
19 Senꞌ mdi'd na re gayꞌ pan xij re gayꞌ mil mbiꞌ, ¿pla chokwid pan jwanꞌ mbro'xo'b mthop goꞌ?
Leꞌ xaꞌ mkab:
—Tib sen na.
20 Nde senꞌ mdi'd na re gaz pan xij re tap mil men, ¿Pla chokwid pan mbro'xo'b mthop goꞌ?
Leꞌ xaꞌ mkab:
—Gaza.
21 Nde nchab Jesús lo xaꞌ:
—¿Cho kwan liy tera' yen goꞌ sa?
Jesús mxalꞌ ngudlo ti xaꞌ naꞌakta wiꞌ nzo yez Betsaida
22 Zyaga mzin Xa' yez Betsaida; tya mbye'dno men ti xaꞌ naꞌakta wiꞌ nde mna'b xaꞌ lo Jesús sa gal Jesús men ta nayiza.
23 Zyasa mxen Jesús yaꞌ mbiꞌ ta nayiz ngudlonꞌ ya, mbeꞌ Jesús xaꞌ lad ro yez; tya mzuk Jesús ngudlo xaꞌ nde mbwal Jesús ngudlo xaꞌ nde mnabdiꞌs Jesús lo xaꞌ, cho toyala wi' xa' lud
24 Zya mbwiꞌ xa' nde nchab xaꞌ:
—Xanya ya nya re mena ndyak na, per ngwi'n ndye xaꞌ.
25 Zyaga bere mbwal Jesús ngudlo xaꞌ tedib gob, nde mbli Jesús mbwi' xa'; nde nawe mxyal' lo xa', tij nchoni lo xa' nde nambi ngwi' xa' reta men.
26 Nde mbloned Jesús xaꞌ liz xaꞌ, nchab Jesús lo xaꞌ:
—Naꞌlyad la lenꞌ yez nde nagapta luy nek tib lo men nzo yez.
Pedr ndej ke Jesús nak Xaꞌ Mtelꞌ Dios
(Mt. 16:13-20; Lc. 9:18-21)
27 Jesús mbroꞌ kon re xinꞌ teꞌd Xaꞌ nda xaꞌ re yez jwanꞌ nzi lo xyon Cesarea chan' Filipo. Nde ned mnabdiꞌs Jesús lo re xinꞌ teꞌd Xaꞌ, nchab Xa':
—¿Cho nak na mbez re men?
28 Leꞌ xinꞌ teꞌd Xaꞌ nchab:
—Nzo men mbez nak la Juan Bautist, nzo men mbez nak la Elías nde nzo men mbez nzo cho ti profet nak la.
29 Zyasa nchab Jesús lo xaꞌ:
—Mbay goꞌ, ¿Cho nak na mbez goꞌ?
Le' Pedr mkab
—Lu nak Xaꞌ Mtelꞌ Dios.
30 Per mnabeꞌ Jesús lo xaꞌ nek thib lo men na'tejta xaꞌ jwanꞌ reꞌ.
Jesús ndej gaj Xaꞌ
(Mt. 16:21-28; Lc. 9:22-27)
31 Nde mdobte mblo' Jesús lo xa' nakin' le' Xinꞌ Mbiꞌ rid Xa' brotoz yalti, nde re xaꞌ gol nak sinꞌ lo men Israel, re xaꞌ nak ngwleyꞌ ro nde re xaꞌ nak maestr ndlo' ley. nde kuj men Xin' Mbi', per yoxo'b mbyon wiz ryo'xban Xa'.
32 Nambi toz mdej Jesús re jwan' re'. Zyasa mbeꞌ Pey Jesús tedib lad nde mbrez Pey yek Xaꞌ.
33 Leꞌ Jesús mbyek, mbwiꞌ Xaꞌ lo re xinꞌ teꞌd Xaꞌ nde mbrez Xaꞌ yek Pey, nchab Xaꞌ:
—¡Bike lon Maxuꞌ! tak nandobta xgab la lo chanꞌ Dios, leꞌ xgab la ndob lo chan' men.
34 Zya mbrez Jesús re xinꞌ teꞌd Xaꞌ kon reta men nzi tya nde nchab Xaꞌ:
—Tez nzo goꞌ ncholaꞌs tyonke xis na, bla' go' re jwan' nak go', nde beꞌ goꞌ kruz goꞌ, nde ptonke goꞌ xis na.
35 Tak re men jwanꞌ ncholaꞌs tolaꞌ yalnaban chanꞌ xaꞌ lo izyo reꞌ, xaꞌ ya taꞌb yalnaban adiꞌ jwanꞌ ndaꞌ Dios; nde re men jwanꞌ taꞌb yalnaban chanꞌ xaꞌ lo izyo reꞌ por ndli lazoꞌ xaꞌ na nde diꞌs wen chanꞌ Dios, xaꞌ ya ligan yalnaban adiꞌ jwanꞌ ndaꞌ Dios.
36 Tak, ¿cho sinꞌ liy lo men keno men reta jwanꞌ nzo lo izyo reꞌ nde ta'b men yalnaban adiꞌ ndaꞌ Dios?
37 Ngenta cho men li gan kix par lyaꞌ xbin men.
38 Nde tez nzo xaꞌ ndyolaꞌs gab, ke ndli lazoꞌ xaꞌ na nde natejta xaꞌ xkiꞌs na lo re men jwanꞌ nzo'b xkenꞌ, men jwanꞌ mblaꞌ xkiꞌs Dios ta nzi naya, no na, Xinꞌ Mbiꞌ mbyeꞌd lo izyo reꞌ tolaꞌs na nyen men ya senꞌ yal na kon yalnaro chanꞌ Pay nde kon re áng Nayon.