7
Jwanꞌ ndli yalke lo men
(Mt. 15:1-20)
1 Re xaꞌ fariseo nde pla maestr nte'd ley xa' mbroꞌ yez Jerusalén, mdyop xaꞌ tenꞌ ndo Jesús.
2 Re xa' re', mbwiꞌ xaꞌ pla xinꞌ teꞌd Jesús tata nabew ya xaꞌ ncha xaꞌ pan, na'ntachta xa' ya' xa', jwanꞌna nak yalke mkeꞌ xaꞌ yek xinꞌ teꞌd Jesús.
3 Tak re xaꞌ fariseo nde reta men Israel, nxo'byek toz xaꞌ mod mtanꞌ re xaꞌ gox jwanꞌ mbre pola, tez naꞌyachta yaꞌ xaꞌ, natoyalta wa xaꞌ.
4 Nde lo mbere xaꞌ ngwa xaꞌ lo xbiꞌ, tez na'yachta yaꞌ xaꞌ na'wad xaꞌ. Nde na'r toz xaꞌga re jwanꞌ nkenap xaꞌ lo mod gox, xa nak yach re xi nchuꞌ xaꞌ nit, yach ré nde re yet yi'b jwanꞌ ndli rsinꞌ xaꞌ, nde axta re lon' xaꞌ, yacha.
5 Jwanꞌ nasa re xaꞌ fariseo nde re maestr nchak ley, mnabdiꞌs xaꞌ lo Jesús, nchab xaꞌ:
—¿Cho kwan liy sa re xinꞌ teꞌd la na'ntachta xaꞌ ya' xa' senꞌ ncha xaꞌ, na'nxo'byekta xaꞌ re mod jwanꞌ mtanꞌ re xaꞌ gox mbre pola, che'la tata ya' xa' ncha xa'?
6 Jesús mkab lo xaꞌ:
—Men kwinꞌ go', galꞌka mdej Isaías, jwan' xa ngeniga lo xkiꞌs Dios:
Yez reꞌ benꞌ ro xaꞌ nxo'byek xaꞌ na,
Le' lazoꞌ xaꞌ tij ndoy lon.
7 Benꞌ nale nxo'byek xa' na,
Ndloꞌ xaꞌ re yalte'd jwan' nak yalnyebe' chanꞌ men.
8 Tak mblaꞌ goꞌ re yalnyebeꞌ chanꞌ Dios, na leꞌ goꞌ ndyonke xis re mod gox jwanꞌ mtanꞌ re men gox pola, jwan' xa nak yach yet ré nde yach re xi jwanꞌ nchuꞌ goꞌ nit nde masraꞌ re jwanꞌ re' ndli goꞌ.
9 Noga nchab Jesús:
Thiptane mblo'tal goꞌ re yalnyebeꞌ chanꞌ Dios sa nxo'byek goꞌ re mod gox.
10 Tak Moisés nchab: “Bxo'byek xud la nde xnaꞌa;” nde: “Men jwanꞌ nke'de xis xud naꞌ o xnanꞌ, ndablo gaj xaꞌ.”
11 Leꞌ goꞌ mbez: Toyal gab men lo xud men o lo xnaꞌ men: “Na'lit na gan tan jwan' la'ston la tak reta jwanꞌ ngenon naka, korbán.” (Diꞌs reꞌ nak: “naka jwan' nayon lo Dios”.)
12 Nde lo ta gab xaꞌ, na'toyalta la'sto xa' xud xaꞌ o xnaꞌ xaꞌ.
13 Tamod ngo'tal goꞌ yalnyebeꞌ chanꞌ Dios, ndyonke goꞌ xis re mod gox jwanꞌ nden goꞌ. Nde na'r toz jwanꞌ tamod ndli goꞌ.
14 Nde mbrez Jesús reta men nzi tya, nchab Jesús lo xaꞌ:
—Reta goꞌ, pkeꞌnza jwanꞌ ni lo go' nde byen goꞌy.
15 Nekthib re jwan' ta nda len' men, na'ndlide narax lo men; per re xgab narax nde diꞌs narax jwanꞌ ndryoꞌ lazoꞌ men, jwanꞌna ndli narax lo men.
16 ¡Tez nzo goꞌ ngeno nzanꞌ sa gon go'y, bin goꞌy!
17 Senꞌ mbroꞌ Jesús xij reta men nde ngote Xaꞌ lenꞌ yo, zya mna'bdiꞌs re xin' te'd Xa' nyenꞌ xamod nak di's nabixa.
18 Jesús nchab lo xaꞌ:
—¿Cho noga' goꞌ nangyenta go'y? ¿Cho na'nyed goꞌ reta jwanꞌ ta ncha men na'ndlide narax lo men,
19 tak na'ndlyade lazoꞌ men, leꞌy nda lenꞌ men nde tya ndryoꞌtey nday wan?
Jwanꞌ reꞌ mdej Jesús, nchab Xaꞌ ke reta jwanꞌ ncha men na'dlide narax lo men.
20 Per nchab Jesús:
—Reta xgab narax nde diꞌs narax jwanꞌ ndryoꞌ lazoꞌ men, jwanꞌna ndli narax lo men.
21 Tak lazoꞌ men nchal reta xgab narax, xa nak, re xaꞌ jwan' ncha'xno tedib men na'nakta sal' xa', re xaꞌ ta ndli re ned yalxkap nde re xaꞌ nguj men,
22 yalwanꞌ, yaltablaꞌs, yalxinlaꞌs, yalkwinꞌ, jwan' thiptane ndlya men lo jwan' narax, nayiꞌ xaꞌ nye xaꞌ chanꞌ ta xaꞌ, yaltodiꞌsyix, yalbxalꞌ nde yalneyek.
23 Reta jwan' narax reꞌ, lazoꞌ men ndryoꞌy nde ndliy narax lo men.
Ti ngol na'nakta men Israel, mblipa lazoꞌ xaꞌ Jesús
(Mt. 15:21-28)
24 Mbroꞌ Jesús tya, nda Xaꞌ lo xyon Tiro nde Sidón. Senꞌ mzin xaꞌ, mbla Xa' len' yo, na'nchola'sta Xaꞌ nye nek thib mena, per na'ndlid Xaꞌ gan nka'slo Xa'.
25 Tak ngo ti ngol ngeno xaꞌ ti mzaꞌ xinꞌ xaꞌ nzo mbi narax lazo'r, sen' mbin xaꞌ mzin Jesús, mbyeꞌd xaꞌ lo Jesús nde mdoxub ngol lo ni Jesús.
26 Ngol reꞌ nanakta xaꞌ men Israel, leꞌ xaꞌ nak men lo xyon Sirofenicia. Nde mna'b toz xa' lo Jesús sa kote Jesús mbi narax nzo lazoꞌ mza'.
27 Leꞌ Jesús nchab lo ngol:
—Btaꞌ diꞌs sa nerla wa re mdyenꞌ, tak nawenta kib men jwanꞌ ndob yar nde taꞌ mena lo mbak.
28 Leꞌ ngol mkab:
—Taga naka Xaꞌ Nyebeꞌ; per re mbaka ndlya maꞌ xanꞌ mes nde ncha maꞌ re kos jwanꞌ nchab lo yaꞌ mdyenꞌ.
29 Zyasa nchab Jesús lo ngol:
—Lo di's ta mkab la re', bya, leꞌ mbi narax mbroꞌtelay lazoꞌ xinꞌ la.
30 Nde senꞌ mzin ngol liz ngol, mbwiꞌ ngol mbro'tela mbi narax lazoꞌ mzaꞌ nde xe nax mzaꞌ lo lonꞌ.
Jesús mtodanꞌ tib xaꞌ nka ronꞌ nde nkweꞌ
31 Tya bere mbro' Jesús lo xyon Tiro, mbri'd xaꞌ yez Sidón nde nda xaꞌ ro nittoꞌ chan' Galilea, tya mbri'd xaꞌ lo xyon Decápolis.
32 Nde tya mbye'dno xa' lo Jesús ti mbiꞌ nkwe' nde nka ro xa', nde mna'b toz xaꞌ sa xo'b yaꞌ Jesús yek mbiꞌ ta nayiza.
33 Nde xa'ta mbeꞌ Jesús mbiꞌ ya, mblo Jesús kwenyaꞌ Xaꞌ rop lenꞌ nza mbiꞌ nde kon lud xit suk Xaꞌ mdob Xaꞌy lo loz mbiꞌ.
34 Nde mbwiꞌ Jesús lo beꞌ, mdiꞌ lazoꞌ Xaꞌ, nde nchab Xaꞌ:
—¡Efata! (Diꞌs ya nak: ¡Pxyalꞌ!)
35 Zyaga mxyalꞌ rop nza men yiza nde mxyalꞌ ro xaꞌ nde mdobte nawe mdodiꞌs xaꞌ.
36 Nde mnabeꞌ Jesús ngen cho lo men gab xa'y, per senꞌ nya'b toz Jesús na'tejta xa'y, masraꞌ ndej xa'y lo re men.
37 Nde jwan' toz tir nzoyen reta men, nchab xaꞌ:
—¡Wen toz ndli Xaꞌ, ndli Xaꞌ nxyalꞌ nza men nkweꞌ nde ndli Xaꞌ ndyodiꞌs re men jwanꞌ naꞌakta todiꞌs.