11
Jesús ndosin yez Jerusalén
(Mt. 21:1-11; Lc. 19:28-40; Jn. 12:12-19)
1 Senꞌ ndosin gaxla re xaꞌ yez Jerusalén, gax lo yez Betfage nde Betania, ngo' lo yi' Olib, Jesús mbloned chop xinꞌ teꞌd Xaꞌ,
2 nde nchab Jesús lo xaꞌ:
—Wa goꞌ yez lud ta nax ngo' lonꞌ reꞌ, senꞌ sin goꞌ tya, yosi'b goꞌ ti burr yenꞌ nkedoꞌ, ti burr jwanꞌ terka tyob xaꞌ xis naꞌ. Xak goꞌ maꞌ nde ye'dno goꞌ maꞌ.
3 Nde tez nzo xaꞌ nye lo goꞌ: “¿Cho kwan liy ta nya jwan' ndli go'?” Le' goꞌ gab lo xaꞌ: “Xaꞌ Nyebeꞌ nakinꞌ maꞌ, nde napa ye'dno Xaꞌ maꞌ.”
4 Zyasa ngwa rop xaꞌ nde mzyal xaꞌ ti burr yenꞌ nkedoꞌ ro ned gax ti ro yo nde mxak xaꞌ maꞌ.
5 Nde pla xaꞌ jwanꞌ nzi tya, nchab xaꞌ:
—¿Cho kwan liy ngexak goꞌ burr?
6 Zya nchab xaꞌ jwan' xa mnabe' Jesús lo xaꞌ, nde mdaꞌ xaꞌ diꞌs mbeꞌ xaꞌ burr.
7 Nde mzin no xaꞌ burr lo Jesús, mxo'b xaꞌ xab xaꞌ xis maꞌ nde mdob Jesús xis ma'.
8 Bro toz men mxen xaꞌ lar jwanꞌ nzo'b xis xaꞌ, mtogaꞌ xaꞌy ned, tipla xaꞌ taja mchoꞌ re xod la wan nde mblek xaꞌy ned.
9 Nde reta men jwanꞌ nda siblo nde reta men jwanꞌ ndanke xis, nyaga ne mbez xaꞌ, nchab xaꞌ:
—¡Naro Dios, Nayon nak Xaꞌ ta nde lo le Xa' Nyebe'!
10 ¡Nayon nak yalnyebe' ta nde lo bin xud na' David, ¡Naro toz nak Dios lo beꞌ!
11 Nde ngote Jesús lenꞌ yez Jerusalén, nde tenꞌ ndob yodoꞌ, mbwiꞌ Xaꞌ reta jwan' nzi tya, yaja ndekowla izyo, nda Xaꞌ yez Betania kon re tib sen xinꞌ teꞌd Xaꞌ.
Jesús ngosib ya hig ngenta ngud
(Mt. 21:18-19)
12 Mduxni izyo tedib wiz, senꞌ lo mbroꞌ xaꞌ yez Betania, laj ndo xaꞌ ned msi'b ndyanꞌ xaꞌ.
13 Nde mbwiꞌ xaꞌ tij ndob tib ya hig ndo la lonꞌ, zyasa ngwa twiꞌ xaꞌ lo ya nyenꞌ cho tozal xaꞌ ti ngud wa xaꞌ. Nde senꞌ lo mzin xaꞌ tenꞌ ndob ya, nek tib ngud ngenta benꞌta la ndo lo ya, tak nakte tiemp jwanꞌ ndaꞌy ngud.
14 Zyasa nchab Jesús lo ya hig:
—Nek tib ngud ya natyotra loa wa men.
Nde mbin re xinꞌ teꞌd Xaꞌ diꞌs jwanꞌ nchab Xaꞌ lo ya.
Jesús mtoxonꞌ re men jwanꞌ nzi tho cho yodoꞌ
(Mt. 21:12-17; Lc. 19:45-48; Jn. 2:13-22)
15 Senꞌ lo mzin xaꞌ yez Jerusalén, Jesús ngote tenꞌ ndob yodoꞌ, tolo mblote Xaꞌ re men, re xaꞌ jwanꞌ nzi tho nde re xaꞌ jwanꞌ nzi tiꞌ. Mxen Jesús re mes xaꞌ jwanꞌ nzi nsilꞌ tmi, mtub Xaꞌy, taga mtub Xaꞌ re yasil xaꞌ nzi tho palom.
16 Nde naꞌndad Jesús diꞌs rid re men ndeno re jwanꞌ tenꞌ nak lo le chanꞌ yodoꞌ.
17 Nde mtoteꞌd Jesús re men, nchab Xaꞌ:
—Lo xkiꞌs Dios ngeniy nchaba: “Liz na ryole yo todiꞌsno men Dios ten' ndyop reta men.” ¡Nde goꞌ mblilal ncheꞌ xaja ti yo tenꞌ ndyop re xaꞌ wanꞌ!
18 Nde re xaꞌ nak maestr ndlo' ley xkiꞌs Dios nde re ngwleyꞌ xa' nyebe' mbin xaꞌ re jwanꞌ nchab Jesús, zyasa tolo mkwanꞌ xaꞌ mod kuj xaꞌ Jesús, tak nzyeb xaꞌ, men toz nzoyen re jwanꞌ ndloꞌ Jesús.
19 Senꞌ ndela yalꞌ, zya mbroꞌ re xinꞌ teꞌd Xaꞌ yez Jerusalén.
Mbiz ya hig
(Mt. 21:20-22)
20 Mduxni tedib wiz, tilꞌ toz mbrid re xaꞌ tenꞌ ndob ya hig nde mbwiꞌ xaꞌ axta dib lox ya mbiz.
21 Zyasa mtelaꞌs Pey nde nchab Pey lo Jesús:
—Maestr, bwiꞌ, leꞌ ya hig ta mkeꞌdea ya, mbiza.
22 Leꞌ Jesús nchab:
—Blipa lazoꞌ goꞌ Dios.
23 Tak nipa na lo goꞌ tez nzo xaꞌ naꞌakropta xgab naꞌ, nde li lazoꞌ xaꞌy tak jwanꞌ gab xaꞌ, toyal gab xaꞌ lo kox reꞌ: “Byib ncheꞌ nde wa yo lenꞌ nittoꞌ”, nde taka.
24 Jwanꞌ nasa nin lo goꞌ, reta jwanꞌ ta nya'b goꞌ lo Dios, bli lazoꞌ goꞌ ke taꞌ Xaꞌy nde ta aka.
25 Nde senꞌ lo ndyodiꞌsno goꞌ Dios, tez nzo kwan narax ndateno goꞌ ta men goꞌ, ndablo tiptane bri'd goꞌy yek goꞌ, tamod sa Xud naꞌ ndob lo beꞌ tonꞌ Xaꞌ re xken goꞌ.
26 Tak tez narita goꞌy tiptane yek goꞌ re jwanꞌ narax ndli men lo goꞌ, no Xud naꞌ ndob lo beꞌ, natonꞌta Xaꞌ re xken goꞌ.
¿Kon cho yalnyebeꞌ ndli Jesús re jwanꞌ?
(Mt. 21:23-27; Lc. 20:1-8)
27 Zyasa bere nda xaꞌ yez Jerusalén tedib gob. Nde laj ngete Jesús tenꞌ ndob yodoꞌ, tya mbyeꞌd re ngwleyꞌ xa' nyebe', re xaꞌ nak maestr ndlo' ley xkiꞌs Dios nde re xaꞌ nak sinꞌ lo men Israel.
28 Nde nchab xaꞌ lo Jesús:
—¿Kon cho yalnyebeꞌ ndlia re jwanꞌ reꞌ nde cho mdaꞌ diꞌs sa ndlia le?
29 Leꞌ Jesús mkab lo xaꞌ:
—Tej na lo goꞌ kon cho yalnyebeꞌ ndlin re jwanꞌ reꞌ, tez kab goꞌ ti jwanꞌ nyabdiꞌs na lo goꞌ.
30 ¿Lo mblole Juan men? ¿Cho naka jwan' nde lo be' o naka chan' men? Pkab goꞌ lon.
31 Zyasa mdodiꞌsno xaꞌ ta xaꞌ nde nchab xaꞌ:
—Tez gab naꞌ: Lo be' mbro'y, nye xaꞌ lonꞌ: “¿Cho kwan liy nandlid lazoꞌ goꞌ xkiꞌs xaꞌ sa?”
32 Nde tez gab naꞌ: Chan' mena
Per mzyeb xaꞌ ta gab xaꞌ, tak reta men ndli lazonꞌ ke Juan liga ngok tib xaꞌ mbyeꞌd mdaꞌ xkiꞌs Dios.
33 Zyasa nchab xaꞌ lo Jesús:
—Nanyet náꞌy.
Leꞌ Jesús mkab lo xaꞌ:
—Noga na natejta na lo goꞌ kon cho yalnyebeꞌ ndlin re jwanꞌ reꞌ.