10
Jesús ndlo' yalke naka laꞌ men salꞌ men
(Mt. 19:1-12; Lc. 16:18)
1 Mbroꞌ Jesús yez Capernaum, nda Xaꞌ lo xyon Judea nde mzin Xaꞌ tedib lad ro yoꞌ Jordán, nde taxa mdyop re men lo Xaꞌ tya, nde bere mtote'd Xa' reta men mod jwanꞌ ndliga Xaꞌ.
2 Zyasa mbike pla xaꞌ fariseo mnabdiꞌs xaꞌ lo Jesús benꞌ sa kwanꞌ xaꞌ mod keꞌ xaꞌ yalke yek Jesús, sa nchab xaꞌ:
—¿Cho galꞌ naka laꞌ xaꞌ biꞌ ngol xaꞌ?
3 Le' Jesús mkab lo xaꞌ:
—¿Xomodka nchab ley jwanꞌ mnabe' Moisés?
4 Leꞌ xaꞌ nchab:
— Moisés nta' di's toyal laꞌ men salꞌ men, benꞌ tyoxkwaꞌ yeꞌs jwanꞌ nyebeꞌ ke laꞌ xaꞌ biꞌ salꞌ xaꞌ.
5 Leꞌ Jesús mkab lo xaꞌ:
—Por yalneyek chanꞌ goꞌ jwanꞌ nasa mkeꞌ Moisés yalnyebeꞌ ya.
6 Tak sen' mdobte ner mtoxkwaꞌ Dios reta jwanꞌ, mbi' nde ngol mtoxkwaꞌ Dios.
7 “Jwanꞌ nasa la' men biꞌ xud xaꞌ nde xnaꞌ xaꞌ nde tyobno xaꞌ ngol xaꞌ,
8 nde rop xaꞌ, thipta bel' ak xaꞌ.” Jwanꞌ nasa na'nakta xaꞌ chop, che'la thipta nak xa'.
9 Jwan' nasa, xa' jwanꞌ mtenta Dios, ngenta cho men li sa laꞌ xaꞌ salꞌ xaꞌ.
10 Senꞌ mzin re xaꞌ yo re xinꞌ teꞌd Jesus bere mnabdiꞌs xa' jwanꞌna.
11 Nde nchab Jesús lo xa':
—Choja men jwan' laꞌ ngol na' nde ka xaꞌ tedib ngol, nak xa' men ndli jwan' xkap kon ngol xaꞌ jwan' nak ner.
12 Nde noga ngol, tez laꞌ xaꞌ salꞌ xaꞌ nde ka ngol tedib mbiꞌ, nak xa' ngol ndli jwan' xkap kon xa' bi' jwan' nak sal' ner xa'.
Jesús ndli leyꞌ re or bix
(Mt. 19:13-15; Lc. 18:15-17)
13 Nde ndano xa' re or bix lo Jesús sa xo'b ya' Xaꞌ yek or; leꞌ re xaꞌ nak xinꞌ teꞌd Jesús mbrez xaꞌ yek re men ta ndeno or bixa.
14 Senꞌ lo mbwiꞌ Jesús ta nzi li xaꞌ, ngok nayiꞌ Jesús nde nchab Xaꞌ:
—Btaꞌ goꞌ diꞌs ye'd re or bixa lon nde nakad goꞌ diꞌs; tak Dios nyebeꞌ lazoꞌ men jwanꞌ nak xaja or bix reꞌ.
15 Nipa na lo goꞌ, men jwanꞌ nakayaꞌda yalnyebeꞌ chanꞌ Dios, xaja ti or bix reꞌ, men ya naꞌlyada lo yalnyebeꞌ chanꞌ Dios.
16 Nde mdob Jesús or lo ya' Xa', mxob Xa' yaꞌ Xaꞌ yek or nde mbli leyꞌ Xaꞌ or.
Ti mbiꞌ rik
(Mt. 19:16-30; Lc. 18:18-30)
17 Laj ndoroꞌ Jesús sa nda xaꞌ, zya naban toz mzin ti mbiꞌ lo Jesús mdoxub xaꞌ nde nchab xaꞌ:
—Maestr mnen ke galꞌ nak la, na nyabdiꞌs loa. ¿Cho kwan lin sa lin gan yalnaban adiꞌ?
18 Leꞌ Jesús mkab lo xaꞌ:
—¿Cho kwan liy mbez la galꞌ nak na? Ngenta nek tib men galꞌ, benꞌta Dios nak Xaꞌ galꞌ.
19 Re jwanꞌ nyebeꞌ Dios mnea luy:
Naꞌketenod la tedib men na'nakta salꞌ la.
Na'kujta lu men.
Na'lid la yalwanꞌ.
Na'ked la yalke yek men jwanꞌ na'nakta xaꞌ.
Na'kwinꞌta lu.
Bxob yek xud la nde xnaꞌa.
20 Leꞌ xaꞌ nchab:
—Maestr, reta jwanꞌ re' axta lud nandolila nay.
21 Zya mbwiꞌ Jesús lo xaꞌ nde mblat lazoꞌ Jesús xaꞌ, nchab Jesús:
—Tipta jwanꞌ tera lia, bya, ptho reta jwanꞌ ngenoa nde ptaꞌ tmi lo re xaꞌ jwanꞌ ngenta chanꞌ naꞌ, tamod kenoa bro toz jwanꞌ lo beꞌ zyasa deꞌ, sa wea kruz la nde tyonkea xis na.
22 Zya mbli toz mbi' ya xgab senꞌ lo mbin xaꞌ diꞌs ya nde nabil ndya xaꞌ, tak bro toz jwanꞌ ngeno xaꞌ.
23 Zyasa mbwiꞌ Jesús lo re xinꞌ teꞌd Xaꞌ nde nchab Xaꞌ:
—Plopa ne naka lo re xaꞌ ngeno bro toz jwanꞌ, sa yote xaꞌ lo yalnyebeꞌ chanꞌ Dios.
24 Nzoyen toz re xaꞌ nak xinꞌ teꞌd Jesús senꞌ mbin xaꞌ re diꞌs reꞌ; leꞌ Jesús bere nchab:
—Xinꞌ na, plopa ne naka yote xaꞌ lo yalnyebeꞌ chanꞌ Dios, re xaꞌ ndob xgab naꞌ lo re jwanꞌ ngeno xaꞌ.
25 Mas naleꞌ rid ndab ti kamey xan' ye'r yagux, ke rid ti xaꞌ rik lya xaꞌ lo yalnyebeꞌ chanꞌ Dios.
26 Zya masraꞌ nzoyen re xaꞌ nde nchab xaꞌ lo ta xaꞌ:
—¿Choꞌ men li gan lyaꞌ sa?
27 Jesús mbwiꞌ lo xaꞌ nde nchab Jesús:
—Lo re men nagana, leꞌ lo Dios nakte nagan, reta jwanꞌ tak li Dios.
28 Leꞌ Pey mdobte nchab lo Jesús:
—Náꞌ reꞌ, reta jwanꞌ mblaꞌ náꞌ nde mdonke náꞌ xis la.
29 Jesús mkab nde nchab xaꞌ:
—Nipa na lo goꞌ, tez nzo men mblaꞌ liz naꞌ, wes naꞌ, ptanꞌ naꞌ, xud naꞌ, xnanꞌ, ngol naꞌ, xinꞌ naꞌ, izyon naꞌ tak ndyonke xaꞌ xis na nde ndataꞌ xaꞌ xkiꞌs Dios,
30 men ya laj naban xaꞌ kayaꞌ xaꞌy tib ayoꞌ gob masraꞌ. Kayaꞌ xaꞌ liz xaꞌ, wes xaꞌ, ptanꞌ xaꞌ, xnaꞌ xaꞌ, xinꞌ xaꞌ nde izyon xaꞌ nde noga toti men xaꞌ lo izyo reꞌ. Per sin tib wiz kayaꞌ xaꞌ yalnaban adiꞌ lo beꞌ.
31 Tak bro toz re men ta ndo ner naya yan' xa' xis, nde bro toz re xa' ndo xis ak xa' xa' ner.
Mbyon gob Jesús mdej gaj Xaꞌ
(Mt. 20:17-19; Lc. 18:31-34)
32 Zyasa ngo xaꞌ ned nda xaꞌ yez Jerusalén. Jesús nda siblo, leꞌ re xinꞌ teꞌd Xaꞌ ndanke xis anta ngan xgab xaꞌ nde masraꞌ re men anta ndake seb xaꞌ xis Jesús. Zyasa xaꞌta mbrez Jesús re xinꞌ teꞌd Xaꞌ nde ndobte mdej Xa' re jwanꞌ yote Xaꞌ, nachab Xa':
33 —Bwiꞌ goꞌ naya ndanꞌ yez Jerusalén, leꞌ Xinꞌ Mbiꞌ mbyeꞌd lo izyo reꞌ, tayaꞌ men Xaꞌ lo re ngwleyꞌ ro nde lo re xaꞌ nak maestr ndlo' ley xkiꞌs Dios, nde tya nyebeꞌ men gaj Xaꞌ nde tayaꞌ men Xaꞌ lo re men nanakta Israel,
34 nde xino men Xaꞌ, kin men Xaꞌ, suk men lo Xaꞌ nde kuj men Xaꞌ; per yoxob mbyon wiz ryoxban Xaꞌ.
Jakob nde Juan mna'b xaꞌ ti jwanꞌ lo Jesús
(Mt. 20:20-28)
35 Zyasa Jakob nde Juan, xinꞌ Zebedeo, mbike xaꞌ lo Jesús nde nchab xaꞌ:
—Maestr, ncholaꞌs náꞌ ke lia ti jwanꞌ nya'b náꞌ loa.
36 Leꞌ Jesús nchab lo xaꞌ:
—¿Cho kwan ncholaꞌs goꞌ lin?
37 Leꞌ rop xaꞌ nchab:
—Náꞌ ncholaꞌs senꞌ tyob la nyebeꞌa, taꞌa diꞌs tib náꞌ tyob lad ban la nde tedib náꞌ tyob lad beg la.
38 Jesús nchab lo xa':
—Na'nyed goꞌ jwanꞌ nyab goꞌ. ¿Cho tli goꞌ gan rid goꞌ re yalti, jwanꞌ rid na nde gaj goꞌ mod jwanꞌ gaj na?
39 Leꞌ rop xaꞌ mkab nde nchab xaꞌ:
—Tli náꞌ gan.
Jesús nchab lo xaꞌ:
—Lin goꞌy, reta yalti rid na jwanꞌna rid goꞌ nde taj goꞌ, mod jwanꞌ gaj na.
40 Leꞌ jwanꞌ ta nya'b goꞌ, tib goꞌ tyob lad ban na nde tedib goꞌ tyob lad beg na, nakta jwanꞌna kwent chanꞌ na, benꞌta Dios nyebeꞌ jwanꞌna.
41 Senꞌ mbin ti siꞌ xinꞌ teꞌd Xaꞌ jwanꞌ reꞌ, zya mdobte ngok nayiꞌ xaꞌ lo Juan nde lo Jakob.
42 Zyasa mbrez Jesús re xaꞌ nde nchab Jesús lo xaꞌ:
—Mnela goꞌ xamod nak re xaꞌ ta nchak sinꞌ ro, benꞌta ndob nyebeꞌ xaꞌ nde nchak naro xaꞌ lo tedib ned men.
43 Leꞌ xij goꞌ reꞌ na'nakte tamod; cheꞌla, tez nzo goꞌ ncholaꞌs ak xaꞌ ro, xaꞌ ya nerla nakinꞌ li sinꞌ lo re goꞌ.
44 Nde tez nzo goꞌ ncholaꞌs nyebeꞌ, xaꞌ ya ndablo li sinꞌ lo re men.
45 Tak na Xinꞌ Mbiꞌ mbyeꞌd lo izyo reꞌ, na'ndalta na sa li men sinꞌ lon, na ndal sa lin sinꞌ lo men nde tob na yalnaban chanꞌ na, sa lyaꞌ re men lo xken men.
Jesús mxalꞌ ngud lo Bartimeo
(Mt. 20:29-34; Lc. 18:35-43)
46 Zyasa mzin Jesús yez Jericó kon re xinꞌ teꞌd Xaꞌ. Nde senꞌ lo mbroꞌ xaꞌ yez ya kon reta men jwanꞌ ndanke xis xaꞌ, ned ndob ti xaꞌ ngwle nya'b gon ndole Bartimeo, xinꞌ Timeo.
47 Senꞌ mbin xaꞌ leꞌ Jesús, Xaꞌ yez Nazaret ndarid tya, zyaga ne mbrez xaꞌ, nchab xaꞌ:
—Jesús nde lo bin David, blat lazoꞌa na.
48 Nde nar men ngok nayiꞌ lo xaꞌ sa nakwesta xaꞌ, per zya mas ne mbrez xaꞌ:
—¡Jesús nde lo bin David, blat lazoꞌa na!
49 Zya ngoto Jesús nde nchab Xaꞌ lo men:
—Brez goꞌ xaꞌ.
Nde mbrez xaꞌ men nayiza, nchab xaꞌ:
—¡Blo nale lazoꞌa, ptoli, tak ngebez Xaꞌ lu!
50 Leꞌ men ngwle ya zyaga gotoli xaꞌ, mblobi xaꞌ lar nzob xis xaꞌ nde nda xaꞌ lo Jesús.
51 Jesús mnabdiꞌs lo xaꞌ:
—¿Cho kwan ncholaꞌs la lin loa?
Leꞌ men ngwle ya nchab:
—Maestr, na ncholas xyalꞌ ngud lon sa wiꞌn.
52 Jesús nchab lo xaꞌ:
—Bya, mbyak la lu, tak ndlipa lazoꞌa Dios.
Zyaga mxyalꞌ ngud lo xaꞌ nde mdonke xaꞌ xis Jesús.