12
Kwent nabix chanꞌ pla xaꞌ narax mke sinꞌ
(Mt. 21:33-46; Lc. 20:9-19)
1 Zyasa mdobte Jesús mdej Xaꞌ re di's nabix, nchab Xaꞌ:
—Ngo ti mbiꞌ mblo bin lus ub nde mtowꞌ xaꞌ dib tenꞌ nzo bina kon ke, mtoxkwaꞌ xaꞌ ti plo tenꞌ koꞌ xaꞌ nit ub nde mtoxkwaꞌ xaꞌ ti yo ke gap toz nda'b, ’nde mtanꞌno xaꞌy lo pla men sa li men sinꞌna nde leꞌ xaꞌ ngo ned ndya tij.
2 Senꞌ ngoxo'b beꞌ mtelꞌ xaꞌ ti mos lo re xa' nge sin', sa kaya' mos ngud mke lo lus ub.
3 Leꞌ re xaꞌ ta nzo lo sin', mxen xaꞌ mos, mkeꞌ xaꞌy nde mbloned xaꞌ mos ngen kwan mtelꞌ xaꞌ.
4 Zya bere mtel' xaꞌ tedib mos, per mbwadke xaꞌ mos axta mbwiꞌy yek mos, nde noga mblo's xa' mos ndya mos.
5 Bere mtelꞌ xaꞌ tedib mos nde mos reꞌ mbij xaꞌ; taga mblino xaꞌ tipla mos jwanꞌ mtelꞌ xaꞌ nak xwanꞌ lus ub, cho mos mke xaꞌy nde cho mos mbij xaꞌ.
6 ’ Lulka ngeno xaꞌ tibnya xinꞌ xaꞌ jwanꞌ nke toz lazoꞌ xaꞌ, mtel' xa' or lo re xa' ya, nchab xaꞌ: “Te' xo'b yek xaꞌ xin' na re'.”
7 Leꞌ re xaꞌ ta mbyanꞌ no lus ub ba, nchab xaꞌ lo ta xaꞌ: “Or re' yan'no dib jwan' re'. Yeꞌd goꞌ, kuj naꞌ or sa naꞌ kayaꞌ dib jwan' re', aka chanꞌ naꞌ.”
8 Nde mxen xaꞌ or, mbij xaꞌ or nde mblobi xaꞌ or tij tenꞌ nzo'b lus ub.
9 ¿Cho kwan li xaꞌ ta nak xwanꞌ lus ub? Ye'd xaꞌ nde lu'x xaꞌ reta men ta mbyanꞌno lus ub nde tayaꞌ xaꞌy lo tedib ned men.
10 ’¿Cho nandlapta goꞌ jwanꞌ nchab lo xkiꞌs Dios?
Leꞌ ke jwanꞌ mblo'tal xaꞌ ntaꞌ yo,
ke ya ngok tib ke jwanꞌ ndenkeꞌ dib yo.
11 Dios ta mtoxkwaꞌy;
nde naya naka tib jwanꞌ nzoyen na'.
12 Zya mchal xa' nten xaꞌ Jesús, tak mne xaꞌ xis xaꞌ ndej Jesus kwent nabix. Per mzyeb xaꞌ reta men yaja mbla' xa' Jesus nde nda xaꞌ.
Mnabdiꞌs xaꞌ lo Jesús cho tyix xaꞌ lo Cesar
(Mt. 22:15-22; Lc. 20:20-26)
13 Zyasa mtelꞌ xaꞌ pla xaꞌ fariseo nde pla men Herodes, sa yana'bdiꞌs xaꞌ lo Jesús, benꞌ sa kwanꞌ xaꞌ mod keꞌ xaꞌ yalke yek Jesús.
14 Senꞌ mzin xaꞌ nchab xaꞌ:
—Maestr, mne náꞌ li re jwanꞌ ndyodiꞌs la nde nandyod la re jwanꞌ ndyodiꞌs men xis la, neka ndlia xgab cho xaꞌy, tak lu benꞌta ndloꞌa jwanꞌ li, nyenꞌ xa xo'b yek men Dios. Jwanꞌ nasa nyabdiꞌs náꞌ loa: “¿Cho ndablo kix naꞌ tmi chanꞌ izyo lo Cesar o nakixta naꞌy? ¿Taꞌ naꞌy, o nata'd naꞌy?”
15 Leꞌ Jesús mnela xgab narax jwanꞌ ndono re men ya nde nchab Jesús lo xaꞌ:
—¿Cho kwan liy nkwanꞌ goꞌ yalke keꞌ goꞌ yek na? Deꞌno goꞌ ti tmi Rom, wiꞌn.
16 Zya ngwano xaꞌy, leꞌ Jesús nchab:
—¿Cho lo xa' nde cho le nke lo tmi reꞌ?
Leꞌ re xaꞌ mkab, nchab xaꞌ:
—Chan' Cesar.
17 Leꞌ Jesús nchab:
—Btaꞌ goꞌ lo Cesar jwanꞌ nak chanꞌ Cesar nde btaꞌ goꞌ lo Dios jwanꞌ nak chanꞌ Dios.
Nde nzoyen toz xaꞌ xa mkab Jesús.
Nyabdiꞌs xa' xa nak jwan' ryoxban men
(Mt. 22:23-33; Lc. 20:27-40)
18 Zyasa mbyeꞌd pla xaꞌ saduceos lo Jesús, re xaꞌ jwanꞌ mbez: “Re men nguj naryoxbanta men.” Jwanꞌ nasa mna'bdiꞌs xaꞌ lo Jesús, nchab xaꞌ:
19 —Maestr, lo ley jwanꞌ mkeꞌ Moisés nchab: “Tez ti xaꞌ biꞌ mselyaꞌ, nde naꞌnkad ngol xinꞌ xaꞌ tata nguj xaꞌ, tya sa wes thabol ndablo selyaꞌno ngol, sa tanꞌ xaꞌ bin wes xaꞌ.”
20 Ngo ti xaꞌ mkeno gaz wes naꞌ. Xaꞌ ner, mka xaꞌ ngol nde naꞌnkad ngol xinꞌ xaꞌ, tata nguj xaꞌ.
21 Tya sa xa' brop mka ngol nde taga' naꞌnkad ngol xinꞌ xaꞌ, tata nguj xaꞌ. Nde taga' ngotey kon xaꞌ byon.
22 Nde tamod ngotey kon re gaz wes xaꞌ. Nek thib xaꞌ na'mkad ngol xinꞌ xaꞌ nde ngolo mbri'd re xa' noga ngol nguj.
23 ¿Lo senꞌ ryoxban re xa', xanya xaꞌ ak salꞌ ngol, lo ta re gaz wes xaꞌ mdobno ngol?
24 Zyasa mkab Jesús, nchab Xaꞌ:
—¡Mbwan yek goꞌ! Tak nanzolot goꞌ xkiꞌs Dios neka nye goꞌ yalne chanꞌ Dios.
25 Tak senꞌ ryoxban men xij re xa' nguj, nekla selyaꞌ men, nek yo yalselya', che'la ak men xa nak re Áng ta nzi lo beꞌ ba.
26 Per jwanꞌ ta ryo'xban re xaꞌ nguja, ¿Cho na'ndlapta goꞌ yeꞌs mkeꞌ Moisés, jwan' xa mni Dios lo xaꞌ lo ya yis, ten' nchab Dios: “Na nak Dios lo Abraham, Dios lo Isaak nde Dios lo Jakob”?
27 Dios na'nakta Xaꞌ Dios chan' re men nguj, leꞌ Xaꞌ nak Dios chan' re men naban. Nde goꞌ thitane mbwan yek goꞌ.
Yalnyebeꞌ ro toz
(Mt. 22:34-40)
28 Tya ndo tib xaꞌ nak maestr ndlo' ley xkiꞌs Dios, mbin xaꞌ re jwanꞌ mdodiꞌsno Jesús xaꞌ saduceo, nde mbwiꞌ xaꞌ nawe mkab Jesús, zyasa mbike xaꞌ lo Jesús nde mnabdiꞌs xaꞌ, nchab xaꞌ:
—¿Lo reta yalnyebeꞌ jwanꞌ ngebez Dios, xanyay nak jwanꞌ ner?
29 Jesús mkab:
—Leꞌ yalnyebeꞌ ner lo retay nak: “Pto nza goꞌ, men Israel; leꞌ Dios naꞌ, Xaꞌ nyebeꞌ lonꞌ, thipta Xaꞌ.
30 Nde keꞌ lazoꞌa Dios Xa' Nyebe' loa dib nzo lazoꞌa, dib yalnaban chanꞌ la, dib xgab la nde dib yalne chanꞌ la.” Jwanꞌ reꞌ nak yalnyebeꞌ ndak toz lo retay.
31 Leꞌ yalnyebeꞌ brop lal naka: “Pkeꞌ lazoꞌa ta men la xaja nkeꞌ lazoꞌa le'ga lu.” Naꞌngentra tedib yalnyebeꞌ ro toz xa nak jwanꞌ reꞌ.
32 Zyasa xaꞌ nak maestr nteꞌd ley xkiꞌs Dios, nchab:
—¡Linka luy, maestr! ¡Li jwanꞌ ndej la! Tipta Dios nde naꞌngentra tedib Xaꞌ.
33 Leꞌ jwanꞌ keꞌ lazoꞌ men Dios, dib nzo lazoꞌ men, dib xgab men, dib yalnaban chanꞌ men nde dib yalne chanꞌ men nde keꞌ lazoꞌ men ta men axaja nke' lazoꞌ men le'ga men, re jwanꞌ reꞌ ndak toz, lo reta jwanꞌ ta ndli xaꞌ, nguj xaꞌ maꞌ sa taꞌ xaꞌ gon lo Dios.
34 Mbwiꞌ Jesús nawe mkab xaꞌ liga nchen xaꞌ xkiꞌs Dios, sa nchab Jesús lo xaꞌ:
—Nandod la tij lo yalnyebeꞌ chan' Dios.
Yaja nek thib men naꞌnabdiꞌstra xa' lo Jesús.
¿Cho lo bin nde Crist?
(Mt. 22:41-46; Lc. 20:41-44)
35 Laj ngeloꞌ Jesús xkiꞌs Dios lo men tenꞌ ndob yodoꞌ, zya mnabdiꞌs Jesús, nchab Xaꞌ:
—¿Cho kwan ndliy re xaꞌ nak maestr ndlo' ley xkiꞌs Dios, mbez xaꞌ: “Lo bin David ye'd Xaꞌ telꞌ Dios”?
36 Tak yub David mni senꞌ ndono xaꞌ Mbi Nayon chanꞌ Dios, nchab xaꞌ:
Leꞌ Dios nchab lo Xaꞌ Nyebeꞌ lon:
“Ptob lad ban na,
kebeꞌ lin sa lyayo re xaꞌ jwanꞌ nayiꞌ loa.”
37 Yub David mbez leꞌ Crist nak “Xaꞌ Nyebeꞌ lo David”. ¿Xamod yed Crist lo bin David sa?
Nde bro toz men yez, nale ngo lazoꞌ xaꞌ mbin xaꞌ xkiꞌs Jesús.
Jesús mdej xa nak re maestr ndlo' ley xkiꞌs Dios
(Mt. 23:1-36; Lc. 11:37-54; 20:45-47)
38 Xij ngetoted Jesús men, nchab Xaꞌ:
—Kenap toz goꞌ lo re xaꞌ nak maestr ndlo' ley xkiꞌs Dios, tak re xaꞌ reꞌ ndyen xaꞌ gok xaꞌ lar nolꞌ jwanꞌ ntak toz nde ndyen xaꞌ ni men dyux lo xaꞌ lo xbiꞌ.
39 Nde nkwanꞌ xaꞌ jwin' tyobzaꞌ xaꞌ lenꞌ yo tenꞌ ndyop men Israel, taga senꞌ wa xaꞌ, nkwanꞌ xaꞌ tenꞌ jwin nya tyobsa' xaꞌ.
40 Nde nkib xaꞌ liz re ngol nguj salꞌ naꞌ, taja nolꞌ toz ndyodiꞌsno xaꞌ Dios sa tyak men naxut toz nak xaꞌ. Re xaꞌ reꞌ naro toz nak yalti kayaꞌ xaꞌ.
Ti ngol prob mdaꞌ tmi yon
(Lc. 21:1-4)
41 Jesús ndob gax ro yodoꞌ tenꞌ ndob jwanꞌ ngo xaꞌ tmi yon, ndowiꞌ Jesus xa ngo re men tmi tya, nar xaꞌ rik bro tmi ngo xaꞌ tya.
42 Nde mzin ti ngol prob nguj salꞌ naꞌ, ndeno xaꞌ chop tmi jwanꞌ lud ntak nde mblo xaꞌy tya.
43 Zyasa mbrez Jesús re xinꞌ teꞌd Xaꞌ, nchab Xaꞌ:
—Nipa na lo goꞌ, ngol prob ta nguj salꞌ naꞌ reꞌ, bro toz tmi mblo xaꞌ ke lo reta men.
44 Tak reta men, tmi jwanꞌ mbroxo'b lo xaꞌ, tmi ya mdaꞌ xaꞌ. Nde ngol reꞌ, reta tmi jwanꞌ nden xaꞌ, tyuꞌ jwanꞌ wa xaꞌ, retay mdaꞌ xaꞌ.