20
Mbroxban Jesus
(Mt. 28:1-10; Mr. 16:1-8; Lc. 24:1-12)
1 Wis ner xanꞌ sman, tilꞌ toz tata benꞌ nakow nya, Marí Magdalen ngwa ro baꞌ nde mbwiꞌ Marí mbyiꞌb ke jwanꞌ nowꞌ ro baꞌ.
2 Zyasa mkeꞌ ngol karrel ngwa ngol lo Simón Pedr nde lo tedib xinꞌ teꞌd Jesus, xaꞌ jwanꞌ nkeꞌ toz lazoꞌ Jesus, nde nchab ngol lo xaꞌ:
—¡Ngwaloꞌte xaꞌ Xaꞌ Nyebeꞌ lenꞌ baꞌ, nde naꞌnyed naꞌ plo mbeꞌ men Xaꞌ!
3 Zyasa mbroꞌ Pedr kon tedib Xinꞌ teꞌd Jesus, ngwa xaꞌ tenꞌ nax baꞌ.
4 Mkeꞌ rop xaꞌ karrel, per tedib xinꞌ teꞌd Jesus mas naban mde xaꞌ lo Pedr, nde ner xaꞌ mzin ro baꞌ.
5 Nde mbleng xaꞌ sa mbwiꞌ xaꞌ lenꞌ baꞌ, benꞌta lar mchal Jesus nax tya, per naꞌndlad xaꞌ lenꞌ baꞌ.
6 Xista mzin Simón Pedr, leꞌ Pedr sa ngote lenꞌ baꞌ nde mbwiꞌ Pedr benꞌta lar jwanꞌ mchal Jesus nax tya,
7 leꞌ lar jwanꞌ mpchal xaꞌ yek Jesus naduza naxa tedib lad, naꞌnaxte cho lar jwanꞌ ta mpchal xaꞌ dib Jesus.
8 Zyasa no tedib xinꞌ teꞌd Jesus, xaꞌ jwanꞌ mzin neraꞌ, ngote xaꞌ lenꞌ baꞌ nde mbwiꞌ xaꞌ jwanꞌ ngok, zyasa mbli lazoꞌ xaꞌy.
9 Tak teraꞌ yen xaꞌ jwanꞌ nchab lo xkiꞌs Dios, leꞌ Jesus ndabloga ryoꞌxban xij re men nguj.
10 Zya mbere rop xaꞌ tenꞌ nzi masraꞌ ta xaꞌ.
Jesus mbroꞌto lo Marí Magdalen
(Mr. 16:9-11)
11 Leꞌ Marí ndo yonꞌ le, gax cho baꞌ. Nde laj ndo yonꞌ Marí, zya mbleng Marí sa mbwiꞌ Marí lenꞌ baꞌ;
12 Nde mbwiꞌ Marí chop anj chanꞌ Dios nok lar nakiꞌs, thib xaꞌ ndob tenꞌ ngo'x yek Jesus nde tedib xaꞌ ndob tenꞌ ngo'x ni Jesus.
13 Nde nchab rop anj lo Marí:
—¿Cho kwan ndliy nchonꞌ la ngota?
Leꞌ Marí mkab:
—Nchonꞌ na, tak mbeꞌ xa' Xaꞌ Nyebeꞌ lon, nde naꞌnyet na plo mbeꞌ men Xaꞌ.
14 Benꞌta ngolo ta nchab Marí, mbyek Marí nde mbwiꞌ Marí cho le Jesus ndo tya, per naꞌngyolod Marí cho Jesus jwanꞌna.
15 Zyasa nchab Jesus lo Marí:
—¿Cho kwan ndliy nchonꞌ la ngota? ¿Cho nkwanꞌ la?
Leꞌ Marí mbli xgab xaꞌ nkenap ya bina, zyasa nchab Marí lo Xaꞌ:
—Tez goꞌ mbeꞌ Xaꞌ, ptej goꞌ lon plo ngwano goꞌ Xaꞌ, sa wen Xaꞌ.
16 Leꞌ Jesus nchab:
—¡Mari!
Zya mbyek Mari nde nchab Mari:
—¡Raboni! (diꞌs ya nak , Maestr).
17 Jesus nchab:
—Nagalta lu na, tak teraꞌ yan lo Xud na. Leꞌa wa lo re xinꞌ teꞌd na nde gus lo xaꞌ, leꞌn ndya lo Xud na, Xaꞌ jwanꞌ nak Xud re goꞌ, Dios na nde Xaꞌ nak Dios goꞌ.
18 Zyasa Marí Magdalen ngwatne xaꞌy lo re xinꞌ teꞌd Jesus nchab xaꞌ ke mbwiꞌ xaꞌ Xaꞌ Nyebeꞌ nde le'ga Xa' Nyebe' nchab jwanꞌ reꞌ lo Mary.
Jesus mbroꞌto lo re xinꞌ teꞌd xaꞌ
(Mt. 28:16-20; Mr. 16:14-18; Lc. 24:36-49)
19 Leꞌga wiz ya, wiz ner xanꞌ sman, senꞌ mbla yalꞌ, leꞌ re xaꞌ nak xinꞌ teꞌd Jesus saj nowꞌ reta yala tenꞌ nzi xaꞌ tak nzyeb xaꞌ re xaꞌ judí. Zyasa xajta mbroꞌto Jesus xtowꞌ re xinꞌ teꞌd Jesus nde nchab Jesus lo xaꞌ:
—Yalnabeꞌz nzino goꞌ.
20 Senꞌ ngolo ta nchab Jesus, mbloꞌ Xaꞌ yaꞌ Xaꞌ nde ro kostin Xaꞌ tenꞌ mcheda. Leꞌ re xinꞌ teꞌd Xaꞌ nale toz ngo lazoꞌ xaꞌ, mbwiꞌ xaꞌ Xaꞌ Nyebeꞌ.
21 Zyasa nchab Jesus lo xaꞌ tedib gob:
—Yalnabeꞌz nzino goꞌ. Ta xa mtelꞌ Xud na na, taga tel na goꞌ.
22 Senꞌ ngolo ta nchab Jesus, mblabi Jesus yek xa' nde nchab Xaꞌ lo re xinꞌ teꞌd Xaꞌ:
—Pkayaꞌ goꞌ Mbi Nayon.
23 Men jwan' gab go' dyon' xken na' ton Dios xken xa' ya nde men jwan' gab go' na'dyonta xken na' na'tonta Dios xken xa' ya.
Naꞌlid lazoꞌ Max mbroꞌxban Jesus
24 Leꞌ Max, xaꞌ jwanꞌ nakwent lo re thib sen xinꞌ teꞌd Jesus, xaꞌ jwanꞌ ngole xaꞌ Kwach, naꞌngenta xaꞌ senꞌ mzin Jesus.
25 Zyasa nchab tipla ta teꞌd xaꞌ lo xaꞌ:
—Mbwiꞌ naꞌ Xaꞌ Nyebeꞌ.
Leꞌ Max nchab:
—Tez nawiꞌt na yaꞌ Xaꞌ tenꞌ mbla klab nde gon kwen yaꞌn tya nde gon yaꞌn ten' ta mched kostin Xaꞌ ya, pali lazoꞌ ney.
26 Mbridndaꞌb xon wiz, senꞌ nzi re xinꞌ teꞌd Jesus lenꞌ yo tedib gob, zya no Max ndo tya, nde saj nowꞌ ro yala nzi re xaꞌ, Jesus ngote lenꞌ yo, mdo Jesus xtowꞌ re xinꞌ teꞌd Jesus nde nchab Jesus lo xaꞌ:
—Nabeꞌz nzi goꞌ.
27 Zyaga nchab Jesus lo Max:
—Blo kwen yaꞌa ncheꞌ nde bwiꞌ yaꞌn; bzikeꞌ gax yaꞌa nde blo yaꞌa ye'r ta mched men kostin na; nde naꞌakta lu xa' ngenkwan ndli lazon', cheꞌla gok xa' ndlipa lazo'n Dios.
28 Zyasa mkab Max nde nchab Max:
—¡Xaꞌ nak Xwan' na nde Dios na!
29 Jesus nchab:
—Max, lo ta mbwiꞌa na, jwanꞌ nasa mbli lazoꞌa na. ¡Nabeꞌz toz nda re men jwanꞌ naꞌmbwid xaꞌ na, nde ndli lazoꞌ xaꞌ na.
Kwan liy sa mke yeꞌs reꞌ
30 Naꞌr toz re yalnaro mbliga' Jesus jwanꞌ mbwiꞌ re xinꞌ teꞌd Xaꞌ, nde re jwan' na nangedey lo yeꞌs reꞌ.
31 Per jwanꞌ reꞌ mkey lo yeꞌs sa li lazoꞌ goꞌ leꞌ Jesus nak Crist, Xinꞌ Dios, sa lo li lazoꞌ goꞌ Xaꞌ keno goꞌ yalnaban lo le Xa'.