19
1 Zyasa mnabeꞌ Pilat mdin xaꞌ Jesus.
2 Leꞌ re sondad mtoxkwaꞌ ti koron yis mtob xaꞌ yek Jesus, nde mtogok xaꞌ Jesus thi lar konch.
3 Nde nchab xaꞌ lo Jesus:
—¡Chan' go' Rey lo men judí!
Nde mdin bad xaꞌ lo Jesus.
4 Zyasa mbroꞌte Pilat le tedib gob nde nchab Pilat lo re xaꞌ:
—Bwiꞌ goꞌ, ncheꞌ ndenon Xaꞌ le, sa nye goꞌ nek thib yalke naꞌmzyalta na mbli mbiꞌ reꞌ.
5 Nde mbroꞌte Jesus le, ndob koron yis yek Xaꞌ nde nzoꞌb lar konch xis Xaꞌ. Zya nchab Pilat lo re men:
—¡Leꞌ mbiꞌ ncheꞌ!
6 Senꞌ re xaꞌ nak ngwleyꞌ jwanꞌ nyebeꞌ nde re xaꞌ nak sinꞌ ngenap yodoꞌ mbwi' xa' Jesus, tolo mbrez xaꞌ:
—¡Pkeꞌ go' Xaꞌ lo kruz! ¡Pkeꞌ go' Xaꞌ lo kruz!
Leꞌ Pilat nchab lo xaꞌ:
— Beꞌ go' Xaꞌ, nde pkeꞌ goꞌ Xaꞌ lo kruz, tak nek thib yalke naꞌmzyalta na mbli mbiꞌ reꞌ.
7 Leꞌ re xaꞌ judí mkab:
— Náꞌ ngeno thi ley, nde ley náꞌ nyebe' gaj Xaꞌ, tak leꞌga Xaꞌ mbez Xaꞌ na Xinꞌ Dios nak Xa'.
8 Senꞌ mbin Pilat ta mbez re men, mas mzyeb Pilat.
9 Bere ngote Pilat lenꞌ yolow tedib gob, nde nchab Pilat lo Jesus:
—¿Ploga ndea?
Leꞌ Jesús naꞌnkabta Xaꞌ lo Pilat.
10 Zyasa nchab Pilat lo Jesus:
—¿Cho kwan ndliy nakapta lu lon? ¿Cho naꞌnyed la ngenon yalnyebeꞌ keꞌn la lo kruz, nde ngenon yalnyebeꞌ tolaꞌn la?
11 Mbay Jesus mkab:
—Nek thib yalnyebeꞌ naꞌngenod la kon na, tezka Dios naꞌmda'de loa; Jwanꞌ nasa mas bro yalke nchap xa' mdaya'n loa ke lu.
12 Zyasa mchal Pilat laꞌ Pilat Jesus; per reta xaꞌ judí ne mbrez xaꞌ, nchab xaꞌ:
—¡Tez laꞌa mbiꞌ reꞌ, naꞌnakta lu xa' nzal'ta César! ¡Tak reta xaꞌ jwanꞌ ncholaꞌs ak rey, naꞌnxobyekta xaꞌ César!
13 Senꞌ mbin Pilat jwanꞌna, mbroꞌteno Pilat Jesus le, nde mdob Pilat tenꞌ ndyobka xaꞌ sa nyaꞌb xaꞌ kwent lo men, tya ndole "Nzikwaꞌ Ke" nde diꞌs hebreo ndoley "Gabata."
14 Leꞌ tedib wiz nak wiz ni chanꞌ pask, sa rolja wiza. Pilat nchab lo re xaꞌ judí:
—¡Bwiꞌ goꞌ, leꞌ Rey goꞌ ncheꞌ!
15 Leꞌ re xaꞌ mbrez, nchab xaꞌ:
—¡Bij Xaꞌ! ¡Bij Xaꞌ! ¡Pkeꞌ Xaꞌ lo kruz!
Leꞌ Pilat nchab lo re xaꞌ:
—¿Chonyea Rey goꞌ ba keꞌn lo kruz?
Zya mkab re xaꞌ nak ngwleyꞌ jwanꞌ nyebeꞌ, nchab xaꞌ:
—¡Nangenod náꞌ tedib rey, benꞌta César nak rey náꞌ!
16 Zyasa mdayaꞌ Pilat Jesus lo re xaꞌ, sa keꞌ xaꞌ Jesus lo kruz. Mxen xaꞌ Jesus nde mbeꞌ xaꞌ Jesus.
Mke Jesus lo kruz nde nguj Xaꞌ
(Mt. 27:32-44; Mr. 15:21-32; Lc. 23:26-43)
17 Neꞌ Jesus kruz mbroꞌ Xaꞌ tya, nda xaꞌ tenꞌ ndole Sij yek men (diꞌs hebreo ndoley Gólgota).
18 Tya mkeꞌ xaꞌ Jesus lo kruz, nde kon ti chop mbiꞌ mkeꞌga xaꞌ lo kruz, thiba xaꞌ lad cho Jesus nde Jesus mke xtowꞌ.
19 Noga mnabeꞌ Pilat mkeꞌ xaꞌ letr yek kruz, jwanꞌ nchab: “JESÚS, XAꞌ YEZ NAZARET, REY LO RE MEN JUDI”.
20 Nde bro toz xaꞌ judí mblab diꞌs ta nge yek kruz, tak tenꞌ mkeꞌ xaꞌ Jesus lo kruz naka gax ro yez nde diꞌs jwanꞌ mkeꞌ xaꞌy nak diꞌs hebreo, gryeg nde latín.
21 Zyasa re xaꞌ nak ngwleyꞌ jwanꞌ nyebeꞌ lo re men judí, nchab xaꞌ lo Pilat:
—Naꞌked lay: “Rey lo re men judí.” Leꞌa pkeꞌy, “Xaꞌ jwanꞌ mbez nak Rey lo re men judí.”
22 Pilat mkab lo re xaꞌ:
—Diꞌs jwanꞌ mkeꞌa na, mkeꞌa nay.
23 Senꞌ ngolo mkeꞌ re sondad Jesus lo kruz, zyasa mxen sondad re xab Jesus, nde mdiꞌd xaꞌy xij re thap xaꞌ nde thibay mka thiba xaꞌ. Noga mxen xaꞌ lar jwanꞌ nxyob xis Jesus nde lar ya thipta bdib nzo diba xata gap nde axta la.
24 Zyasa nchab re sondad lo ta xaꞌ:
—Naꞌcheta naꞌy, mas jwin linꞌ ti jwanꞌ, kij naꞌ nyenꞌ cho yanꞌnoy.
Jwanꞌ reꞌ mbli xaꞌ sa ngok diꞌs nge lo xkiꞌs Dios, jwanꞌ nchab: “Mdiꞌd xaꞌ xab na leꞌga xij xaꞌ, Nde mdij xaꞌ nyenꞌ cho xaꞌ yanꞌno lar jwanꞌ nzyob xis na”. Nde ta mbli re sondad.
25 Gaxta tenꞌ ndoli kruz jwanꞌ nge Jesus, tya ndo xnaꞌ Jesus, nde xnit Jesus, noga Marí salꞌ Cleofas nde Marí xaꞌ yez Magdala.
26 Senꞌ mbwiꞌ Jesus lo xnaꞌ Jesus nde lo xinꞌ teꞌd Jesus xaꞌ nkeꞌ lazoꞌ Jesus nde nchab Jesus lo xnaꞌ Jesus:
—May, xaꞌ ba ak xinꞌ la.
27 Xisa, nchab Jesus lo xinꞌ teꞌd Jesus:
—Xaꞌ ba ak xnaꞌa.
Nde xata zya, leꞌ xinꞌ teꞌd Jesus ya, mbeꞌ xaꞌ Marí liz xaꞌ.
28 Ngolo jwanꞌ reꞌ, Jesus mnela reta jwan' ngokla nde sa ak jwanꞌ nchab lo xkiꞌs Dios, zya nchab Jesus:
—Nchek na.
29 Nde tya ndob ti yet sey nzo nit ub mbyála. Zyasa mbwas xaꞌ xilꞌ lenꞌ nit ub, mdob xaꞌy ti lo ya ndole hisop, nde mdob xaꞌy ro Jesus.
30 Senꞌ nguꞌ Jesus nit ub mbyála, nchab Jesus:
—¡Seba ngolo ngok retay!
Nde mkiꞌs yek Jesus, nguj Xaꞌ.
Mched xaꞌ ro rlanꞌ Jesus
31 Leꞌ tedib wiz nak wiz ni chanꞌ pask, jwanꞌ nasa re xaꞌ judí nancholaꞌsta xaꞌ tata take re yon mbiꞌ ya lo kruz lenꞌ wiz ndryoꞌxkwen men, tak wiz yaꞌ nak ti wiz ro lo xaꞌ. Zyasa mnaꞌb xaꞌ lo Pilat, sa ya thiz xaꞌ xku re yon mbiꞌ ta nge lo kruza, sa nayen gaj xaꞌ nde la xaꞌ xaꞌ lo kruz.
32 Zyasa ngwa re sondad nde mdiꞌz xaꞌ xku xaꞌ jwanꞌ nge ner, tagaꞌ mdiꞌz xaꞌ xku tedib xaꞌ jwanꞌ nge tedib lad cho Jesus.
33 Leꞌ senꞌ mzin xaꞌ lo Jesus, mbwiꞌ xaꞌ ngujla Jesus, yaja naꞌngiꞌzta xaꞌ xku Jesus.
34 Per ti sondad jwanꞌ nzo xija, mdi'd xaꞌ ye'r ten' nak rlanꞌ Jesus kon ti yiꞌb nalé xin' nde zyaga mbroꞌ ren nde nita.
35 Leꞌ xaꞌ jwanꞌ mbwiꞌy, ndej xaꞌ jwanꞌ reꞌ nde jwanꞌ ndej xaꞌ naka jwan' li; nde mne xaꞌ li jwanꞌ ndyodiꞌs xaꞌ, sa no goꞌ li lazoꞌ goꞌy.
36 Tak reta jwanꞌ reꞌ ngoka sa ak jwanꞌ nchab lo xkiꞌs Dios: “Nek thib zij xaꞌ naꞌgasta”.
37 Nde tedib lad lo xkiꞌs Dios nchab: “Bwiꞌ goꞌ Xaꞌ jwanꞌ mdi'd men ye'r ten' nak rlanꞌ Xaꞌ.”
Mbwaꞌs Jesus
(Mt. 27:57-61; Mr. 15:42-47; Lc. 23:50-56)
38 Ngolo jwanꞌ reꞌ, José xaꞌ yez Arimatea, (ti xaꞌ jwanꞌ nagaꞌsta ndyonke xis Jesus tak nzyeb xaꞌ re xaꞌ nak sinꞌ lo men judí,) ngwanaꞌb xaꞌ lo Pilat sa taꞌ Pilat diꞌs we xaꞌ thabol Jesus, nde mdaꞌ Pilat diꞌs, zyasa ngwa xaꞌ nde mbeꞌ xaꞌ thabol.
39 Noga Nikodem, xaꞌ jwanꞌ ngwatodiꞌs lo Jesus ti yalꞌla, mbyeꞌdno xaꞌ ti galbsiꞌ kil jwanꞌ naxeꞌ, nosnoy chop ned jwanꞌ, mirra nde aloe.
40 Rop xaꞌ reꞌ, mbla xaꞌ thabol Jesus nde mchal lar xaꞌ Jesus nde taja ndogo xaꞌ jwanꞌ naxeꞌ lad lar, mod jwanꞌ ndliga re xaꞌ judí senꞌ lo nkaꞌs xaꞌ ta xaꞌ.
41 Nde plo tenꞌ mke Jesus lo kruz, tya nax ti tenꞌ nzo jwanꞌ bin, nde xij jwanꞌ bina nax ti baꞌ kub, tenꞌ nek thib thabol tera yo.
42 Tya mkaꞌs xaꞌ Jesus tak baꞌ ya ndob gax nde tak tedib wiz nakla wiz ni chanꞌ pask.