21
Jesus mbroꞌto lo gaz xinꞌ teꞌd Xaꞌ
1 Ngolo jwanꞌ reꞌ, Jesus mbroꞌto tedib gob lo re xinꞌ teꞌd Xaꞌ gax ro nittoꞌ yez Tiberias. Nde cheꞌmod mbroꞌto Jesus:
2 Senꞌ thita mdyop re xaꞌ reꞌ, Simón Pedr, Max xaꞌ ndolegaꞌ Kwach, Natanael xaꞌ yez Caná lo xyon Galilea, Santyag nde Juan xinꞌ Zebedeo nde kon tedid chop xinꞌ teꞌd Jesus.
3 Leꞌ Simón Pedr nchab lo re xaꞌ:
—Leꞌn nda god mbel.
Zya mkab re xaꞌ, nchab xaꞌ:
—No náꞌ tye xis la.
Nde ngwa re xaꞌ, ngwap xaꞌ lo ti bark per nek lud mbel naꞌndenta xaꞌ yalꞌ ya.
4 Senꞌ ndetuxnila, Jesus mbroꞌto lo yux ro nittoꞌ nde leꞌ re xinꞌ teꞌd Jesus naꞌnyed xaꞌ cho Jesus sa.
5 Jesus nchab lo re xaꞌ:
—Xinꞌ bix na, ¿Cho kwan ngeno goꞌ wanꞌ?
Leꞌ re xaꞌ mkab:
Ngen cho kwan nak.
6 Jesus nchab lo xaꞌ:
—Blobi goꞌ yeꞌd lad ban bark, sa yoga mbel.
Zya mblobi xaꞌ yeꞌd, nde naꞌlitraꞌ xaꞌ gan kwe xaꞌ yeꞌd, tak bro toz mbel ngoga.
7 Zyasa leꞌ xinꞌ teꞌd Jesus, xaꞌ jwanꞌ nke toz lazoꞌ Jesus, nchab xaꞌ lo Pedr:
—¡Xaꞌ Nyebeꞌy!
Senꞌ lo mbin Simón Pedr ke Xaꞌ Nyebeꞌy, leꞌ Simón ngok xab naꞌ, (tak mbloche xaꞌ xab xaꞌ) nde ngobi xaꞌ lenꞌ nittoꞌ.
8 Laja leꞌ ti pla xinꞌ teꞌd Jesus ndeno xaꞌ bark, ndegobnyo xaꞌ yeꞌd sey nzo mbel, nde ludla lo nit ngwa xaꞌ, benꞌ tib ayoꞌ metr ngwa xaꞌ lo nit.
9 Senꞌ mzin xaꞌ ro yux, mbwi xaꞌ nzi kwiyꞌ nde ti mbel nzoꞌb lo kwiyꞌ nde no pan nzi tya.
10 Jesus nchab lo xaꞌ:
Deꞌno goꞌ pla mbel, ta ngolo mxen goꞌ ba.
11 Zyasa ngwap Simón Pedr lo bark sa mbrenga xaꞌ yeꞌd, mzina ro yux, sey nzo mbel nabiꞌ, thib ayoꞌ nzo chopsiꞌ son mbel nde tenyega layaja mbel, naꞌncheta yeꞌd.
12 Jesus nchab lo xaꞌ:
—Deꞌ goꞌ, sa wa goꞌ.
Nde nek thib xinꞌ teꞌd Jesus naꞌngoneda lazoꞌ xaꞌ nabdiꞌs xaꞌ: "¿Choga lu sa?" tak mnela xaꞌ Xaꞌ Nyebeꞌy.
13 Zyasa mbike Jesus gax, mxen Jesus pan nde mdaꞌ Xaꞌy lo re xinꞌ teꞌd Xaꞌ, nde tagaꞌ mdiꞌd Xaꞌ mbel.
14 Jwanꞌ reꞌ ngok mbyon gob mbroꞌto Jesus lo re xinꞌ teꞌd Xaꞌ, senꞌ mbroꞌxbanla Xaꞌ xij re men nguj.
Jesus mdayaꞌ re mbakxilꞌ lo Simón xaꞌ Pedr
15 Senꞌ ngolo mda re xaꞌ, Jesus nchab lo Simon Pedr:
—Simón, xinꞌ Jonás, ¿Cho mas nkeꞌ lazoꞌa na ke lo re xaꞌ reꞌ?
Pedr mkab:
—Ta naka, Xaꞌ Nyebeꞌ, lu mne nkeꞌ lazoꞌn la.
Jesus nchab:
—Ptowa re mbakxilꞌ yen' na.
16 Brop gob, Jesus mnabdiꞌs tedib gob, nchab Xaꞌ:
—Simon, xinꞌ Jonas, ¿Cho nkeꞌ lazoꞌa na?
Pedr mkab lo Jesus:
—Ta naka, Xaꞌ Nyebeꞌ, lu mne nkeꞌ lazoꞌn la.
Jesus nchab:
—Pkenap re mbakxilꞌ na.
17 Ngok mbyon gob Jesus nchab:
—Simon, xinꞌ Jonas, ¿Cho nkeꞌ lazoꞌa na?
Zyasa ngo nabil lazoꞌ Pedr tak mbyonla gob mnabdiꞌs Jesus¿Cho nkeꞌ lazoꞌa na? Nde mkab Pedr lo Jesus:
—Xaꞌ Nyebeꞌ, lu mne reta jwanꞌ; lu mne nkeꞌ lazoꞌn la.
Jesus nchab:
—Pkenap re mbakxilꞌ na.
18 Nipa na loa: Senꞌ ngok la mbyo yenꞌ, nchok xab la nde ndaa plo ncholaꞌs la, per senꞌ ngok gox la, togaꞌa yaꞌa nde tedib men gok xab la nde we xaꞌ lu tenꞌ naꞌncholasta lu yaa.
19 Ta nchab Jesus, mdej Xaꞌ xamod gaj Pedr sa li naro Pedr Dios. Senꞌ ngolo jwanꞌ reꞌ, nchab Jesus lo Pedr:
—¡Btonke xis na!
Xinꞌ teꞌd Jesus jwanꞌ nkeꞌ toz lazoꞌ Xaꞌ
20 Lo mbyek Pedr, zya mbwiꞌ Pedr leꞌ xinꞌ teꞌd Jesus xaꞌ jwanꞌ nkeꞌ toz lazoꞌ Jesus ndenke tya, xaꞌ ta mxyo'bke' gax cho Jesus senꞌ lo mda rzye' xaꞌ nde mnabdiꞌs xaꞌ lo Jesus: “Xaꞌ Nyebeꞌ, ¿Cho xaꞌ jwanꞌ taꞌyaꞌa?”
21 Senꞌ mbwiꞌ Pedr xaꞌ reꞌ, nchab Pedr lo Jesus:
—Xaꞌ Nyebeꞌ, ¿Mbay xaꞌ reꞌ sa?
22 Jesus mkab lo Pedr:
—Tez ncholas na tata yanꞌ xaꞌ axta senꞌ beren tedib gob, ¿Cho xyoa jwan'na? Lu ptonke xis na.
23 Leꞌ diꞌs ta nchab Jesus, mbryaꞌsa xij reta xinꞌ teꞌd Xaꞌ, ke leꞌ xinꞌ teꞌd Jesus ya, naꞌgajta xaꞌ. Per Jesus naꞌnchapta ke naꞌgajta xaꞌ ya, diꞌs nchab Jesus nak: “Tez ncholas na tata yanꞌ xaꞌ axta senꞌ beren tedib gob, ¿Cho xyoa jwanꞌna?”
24 Leꞌga xinꞌ teꞌd Jesus ya nak xaꞌ reꞌ, xaꞌ ndaꞌ kwent re jwanꞌ reꞌ nde mkeꞌ xaꞌ re diꞌs reꞌ. Nde mnenꞌ leꞌ re jwanꞌ ndej xaꞌ jwan' liy.
25 Nde nzoraꞌ nar toz tir re jwanꞌ mbli Jesus, tez thib thibay ke lo yeꞌs, ndlin xgab pa gal lo izyo rya's reta libr jwanꞌ nge reta jwanꞌ mbli Jesus. Ta aka.