7
Nu satsa ruinri'i, nuná rutsigana ri'i arlo Tata Do Yebáha
(Mt. 15:1-20)
1 Ka fariseo‑ni lhe attu chupa ka nu rule'ekinna ka benne nu ra lo bia bennabi bodha'an Moisés‑ni, ka nuha dákana lhe'esi Jerusalén‑ni, nna ubigakana ata du Jesús‑ni.
2 Tti bilákinna tsigaba anka ná ttu chupa ka benne rudhetini Jesús‑ni tti roke yetta; delába labí utí náke, labí benke ttiba labini ka benneola ge ka nu Israel‑ni ruinkana, de nuha nna riguakana bala'ana ge ka benneha.
3 Kumu ka fariseo‑ni lhe adíru ka nu Israel‑ni, sa ruinbakana ttiba ben ka benneola gekaniha. Ka benneola gekaniha labí kwenta go ka nuha yetta ganna abíba chi utí nákani,
4 lhe anágaba tti resinkana riakana ugo'o lhe'eyya, labí kwenta gokana yetta ganna abíba chi utí nákani. Ixerugaba nu labikinna ruinkana: ttibanka teeki kíkana ka kanti lhe ka xiga [ka nu rixúkinna kini ri'iyakana lhe'ekani] lhe anágaba adíru ka nu anka ge bronce ka nu rixúkinna ki riga'akana elho lhe'ekani. [Lhe anágaba, aloba teeki kíkana ka nu rise'ekana loni tti rokana yetta.]
5 De nuha nna ka fariseo‑ni lhe ka nu rule'ekinna ka benne nu ra lo bia bennabiha, unnaba tisakana Jesús‑ni, rákane:
―¿Beakala ka nu rudhetinlu‑na labí ruinkana nu bodha'an ka benneola geri'iha uinri'i? Ka nuná itupa tsigaba anka nákani rokana.
6 Lee nna bekabie ree kana:
―Lebi'i xa fariseo, labí liinle. Delo tisaba ruinle deki ankale benne tse. Gwalíbani profeta Isaías‑ni tti unnena lo ka yetsi ge Tata Do Yebáha ge nu ruinle. Lo ka yetsi geeha rabie:
Ka nuní len ro'oruba ka nuní rákana deki ria lekani neti,
ttaka labí gwalíkinna rakakinna kia.
7 Kwentaruba rudú xibikani arloa,
kumu nu anka ge benne se'e yiesi lo yu‑niba rule'ekana,
labí nu anka kia nuná rule'ekinna ka benne.
8 Kumu lebi'i rudhanbale labíru ruinle nu bodha'an Tata Do Yebáha uinri'i, ge nu labin ka benne se'e yiesi lo yu‑nila rudoruna lele ruinle, [delába rudorulana lele rigíle ka kanti lhe ka xiga ka nu ri'iyale lhe'ekinna, lhe anágaba nna ixerugaba ka luesi nuná labinle ruinle].
9 Rágabe kana:
―¡Lebi'i, kattipa lhe'e ruinle! ¡Rigu'uba ni'ale nu bodha'an Tata Do Yebáha uinri'i nna rudorulana lele ruinle nu chi labinle ruinle!
10 Ki yule Moisés‑ni bodha'anna rana: “Tsia lele ka tata nan gele” lhe rágabana: “Nu rigena iki ka tata nan geniha, ralhaba nuha gattina.”
11 Ttaka lebi'i nna rálale: “Ttu benne gwakaba gebie gee ka tata nan geeha: Labí aka utea nu tee kia‑ni len lebi'i, kumu iyába nu dika utea len lebi'i, Tata Do Yebáha‑la chi ga'anati ugwea bie nuní.”
12 Aníha ruinle kini benneha nna abitturu utee nu daa loe ugwebie ka tata nan geeha.
13 Aná tte nuná nna rigu'u ni'ale ka tisa bodha'an Tata Do Yebáha delo ni'a ge nu rodha'an len luesile ruinle lhe anágaba nna ixeerugaba ka luesi nuní labinle ruinle.
14 Nianna tti bedeaxi Jesús‑ni ka benne saa niha attu libe nna redeabie ke:
―Gwaludo naga iyále kia nna gwalutte da nu innía‑ni.
15 Labí nu rori'i rutsigana ri'i arlo Tata Do Yebáha, sinuki nu riria lhe'e lastolari'i nuná rutsigana ri'i arlo benneha.
16 [¡Ata sia nagale, gwaludo nagale ganna gwankale nu dika iyienini!]
17 Tti bedá Jesús‑ni ata se'e ka benne tupa niha, nianna besine lhe'e yo'oha. Ka benne rudhetinieha nna unnaba tisake bie bixa diani nu utixxi'anie keha.
18 Nianna ree ke:
―¿Si anágaba lebi'i, si abittugaba rite denle nu ria‑ni? ¿Si lagwa gwa rite denle deki iyába nu rori'i‑na laa nunága nuná rutsigana ri'i arlo Tata Do Yebáha?
19 Kumu laa lhe'e lastogari'i dia nu rori'i, lhe'e tu'ebari'i dia nuná, delola nna rebeabari'i nuná.
Tti ra Jesús‑ni aníha, benna liie deki iyába nu rori'i ankana nari.
20 Rágabe:
―Nu riria lhe'e lastolari'i nuná rutsigana ri'i arlo Tata Do Yebáha,
21 kumu lhe'e lastolari'i nuná riria nu satsa rulaba leri'i,
lhe nágaba nuná riria nu ruinri'i ttixka rido lenri'i nu abittu anka latselari'i,
lhe nágaba nuná riria nu ruinri'i tti risári'i nu subi subi,
lhe anágaba lhe'e lastogabari'i riria nu rixegwiri'i ki ruinri'i elhutti,
22 [lhe ruinri'i ubana lhe].
Lhe anágaba lhe'e lastogabari'i nuná riria nu raka xxatta leri'i gatta geri'i,
lhe nágaba nuná riria iyá nu abittu anka tse,
lhe nágaba riria ka gwen lasi,
lhe iyá nu satsa ridá leri'i ruinri'i,
lhe anágaba, lhe'e lastogabari'i riria nu ritisin luesiri'i,
lhe nágaba nuná riria nu rinne satsari'i ge ka benne,
lhe nágaba nuná riria elha ttaba ruinri'i,
lhe nágaba nuná riria nu ruinri'i tti a re itá ikiri'i.
23 Iyá nu satsa ruinri'i‑na, lhe'e lastobari'i raka xxe nuná. Iyá nuní ruinna kini rutsigana ri'i arlo Tata Do Yebáha.
Jesús‑ni beyonie xi'iniunná ttu benne nuila abittu anke nu Israel
(Mt. 15:21-28)
24 Bedába Jesús‑ni ata dueha, nianna tti die daka Tiro lhe Sidón lhe. Tti chi bisine niha, nna ute'e lhe'e ttu yo'o. Labí uka lebie nuxa unana deki doe niha, ttaka labí uka dhoe gatsi,
25 kumu bina tteba ttu benne nuila do ttu xi'iniunne yu'u ttu espíritu satsa latini, bine deki do Jesús‑ni niha. Nianna ugía ttebe nna bedú xibie arlo Jesús‑ni.
26 Benne nuilaha nna unnaba ditibe len Jesús‑ni kini ebeabie espíritu satsa yu'u lati xi'iniunneha. Benne nuilaha labí anke nu Israel, sinuki benneha dabie daka Sirofenicia
27 Ttaka Jesús‑ni nna bekabie ge benneha, ree:
―Begwelhaxa eyielani ka xi'inia‑ni, delába ka benne Israel‑ni. Kumu labí anka tse udaxxua yettaxtila nu dika go ka xi'inia nna udelhaa na lo ka beku to‑na.
28 Benne nuilaha nna bekabie ree:
―Gwalí galenlu, xa tata. Ttaka yulu axtala ka beku to‑na gwa redigagaba ka bia to‑na ka yettaxtila ro'o yuya riginni xani'a mexa ge ka nuto‑na.
29 Jesús‑ni nna ree benneha:
―Gwalíba nu ralu‑na. De bekabilu aná, de nuha nna xen su lasi beyya, kumu chiba beria espíritu xxegwiha lati xi'iniunnáluha.
30 Atti besin benne nuilaha lisieha nna gwaxxake xi'iniunneha tena, chiba beria espíritu xxegwiha latini.
Jesús‑ni beyonie ttu benne anke kwechu
31 Tti beyeki Jesús‑ni beriabie Tiro, nianna deyye daka Sidón nna betebie daka Decápolis ki besine ro'o indatoo ge Galilea‑ni.
32 Nianna bisin lenkana ttu benne ata du Jesús‑ni. Benneha anke kwechu lhe labí rilí ro'e innee lhe. Nianna unnabakana len Jesús‑ni ki ixxua nábie iki benneha kini eyake.
33 Jesús‑ni nna bekwitta lenie benne biyúha ata se'e ka benne ixeha, nianna tti bega'a xubene lhe'e ka naga benneha. Nianna tti bettuttu xxenie lo xubene nna utane lo lhuse.
34 Nianna tti belhidha loe begíe gwetsáha nna benné lebie, nianna tti unnee, ree:
―¡Efata! ―Efata dienna innána: ¡Gwaleyali!
35 Looraha tteba beyali ka naga benneha lhe bolhána lhuseha nna tseba unnebie.
36 Jesús‑ni nna ree ka benne se'e niha:
―Nuttu nu kixxi'enle ge nu chi uka‑ni.
Ttaka meskiba bika ree ka benneha bittu kixxi'ake ge nu benieha, ttaka ka benneha nna adíla benke utixxi'abake.
37 Iyábake bebana xxattakanie nna ráke:
―¡Tseba anka iyá nu runie! ¡Redhalie naga ka benne anka kwechu lhe redhalie ro'o ka benne ankake biría lhe!