8
Jesús‑ni begobie ttapa mili ka benne
(Mt. 15:32-39)
1 Attu sá bedetupa ixe juisiru ka benne ata du Jesús‑ni, ttaka labí nu goke tee. Nianna tti uxie ka benne rudhetinieha nna ree ka benneha:
2 ―Ratua lasia ka benne se'e nii, kumu chiba uka tsunna ubisa se'eke len neti nna birula tee bixa goke.
3 Ganna suna anába ankake edhelhaa ke ki eyya lisike, la'ania nna ka satú leke, kumu adí ka benne‑ni idittuba dáke.
4 Ka benne rudhetinieha nna bekabike, ráke:
―¿Gála saxxíri'i nu go ka benne‑ni? Ki lo yu bisiba nuní se'eri'i.
5 Nianna ra Jesús‑ni ke:
―¿Balha yettaxtila chele?
Lake nna bekabike ráke:
―Gasirubake chetu xa.
6 Nianna benie kini bese'e ka benne tupa niha lo yu nna tti bedaxxue gasi ka yettaxtilaha nna iki de chi begwebie ixkixaru len Tata Do Yebáha, nianna tti ulha'abie lhe'e ka yettaxtilaha nna begwebie ka benne rudhetinieha kini kidhike benneha ge iyá ka benne se'e niha. Ka benne rudhetinieha nna aníha‑ba benke.
7 Ka benneha chegabake ttu chupa ka belha to nna iki de chi begwe Jesús‑ni ixkixaru len Tata Do Yebáha, nianna tti redee ka benne rudhetinieha kidhigabake ka belhaha kini go ka benne se'e niha.
8 Iyába ka benneha utobake axtaba beyielakanie nna bottuparulake a gasi ka sumi ka benne ro'o salha'a bexxaha.
9 Tu ttu ttapa mili ka benneha utoke. Nialiba nna tti bodhíbie ka benneha deyyake.
10 Lee nna beyapi ttebe lo barcuha lenie ka benne rudhetinieha nna bisinke daka Dalmanuta.
Ka fariseo‑ni rinnabakana uin Jesús‑ni ttu milagru
(Mt. 16:1-4; Lc. 12:54-56)
11 Tti bisin ka fariseo‑ni ata du Jesús‑ni, nianna udulo ttebakana uxaka lenkane. Raka lekani unie ttu milagru. Aníha ruinkana kini ku'ukane prueba ki ula'a ganna gwalí Tata Do Yebáha udhelhe bie.
12 Jesús‑ni nna benné lebie nna ree:
―¿Beaka raka le ka benne se'e nnanna ilákanie unia ttu milagru? Netiru ria: labí unia bixa ttu milagru ki ilákanie.
13 Niha‑ba bese'ebie ka fariseo‑ni nna beyapie lo barcuha. Betebie lo indaha nna besine ro'oni daka nu reha.
Jesús‑ni rabie: “Gwaluyú gele len ka fariseo‑ni”
(Mt. 16:5-12)
14 Ka benne rudhetinieha nna bixulhabakanie icheke nu goke, sunruba ttu túbi yettaxtila cheke lo barcuha.
15 Nianna ra Jesús‑ni ke:
―Gwaluyú gele ka iyietile kua dii ge ka fariseo‑ni lhe kua dii ge Herodes‑ni lhe.
16 Nianna tti ra luesike:
―Ganna de abíba yettaxtila cheri'i, de nuha‑ba nna rabie ri'i aná.
17 Ttaka Jesús‑ni nna ute dábanie nu rákeha, nianna tti ree ke:
―¿Beaka ra luesile deki labí yettaxtila tee? ¿Si itua ttu a rite denle lhe a rutte dale nu ria‑ni? ¿Laa tuttíruba yaya ikile?
18 ¿Laaba gwa yu'uba iyya lole nna a rilenle lhe gwa siaba nagale nna a riyieninle? ¿Si lagwa gwa radú lele
19 tti ulha'aya lhe'e gayu ka yettaxtila uto gayu mili ka benneha? La'ania, ¿a balha sumi besá ka yettaxtila ro'o salha'a bottupaleha?
Lake nna bekabike, ráke:
―A tsi'inu sumi (12).
20 Nianna redenee:
―Atti ulha'aya lhe'e gasi ka yettaxtila uto ttapa mili ka benneha nna, ¿a balha ka sumiha besá ka yettaxtila ro'o salha'a bottupaleha?
Lake nna bekabike, ráke:
―A gasi sumi.
21 Nianna ree ke:
―¿Ganna aníha nna beakala a rite denle?
Lhe'esi Betsaida, niha bedhali Jesús‑ni lo ttu benne xua loe
22 Tti besin ka Jesús‑ni lhe'esi Betsaida, ka benne ge niha nna bisin tteba lenke ttu benne lo xua ata du Jesús‑ni, nianna unnaba ditibake lenie kini kane ka iyya lo benneha.
23 Lee nna bedaxxu ttebe ná benne lo xuaha nna uleabie benneha ro'o yiesiha. Nianna tti bettuttu xxenie kini utabie ka iyya lo benneha lhe uxxua nábie ikie lhe, nianna tti unnaba tise benneha, ree:
―¿Si bi gwa chi relenlu ttuxka'a to?
24 Benneha nna belannie nna ree:
―Chiba reláti ka benne, ttaka rula'abati ke ttiba ttu yaga ridá.
25 Nianna tti bedegan Jesús‑ni ka iyya lo benneha attu libe. La'anialiba nna chi beyaka ka iyya loeha nna belá tsenie iyá tte.
26 Nianna tti bedhelha Jesús‑ni benneha deyye lisie nna ree bie:
―Abittu sata'alu lhe'esi‑ni [lhe abittugaba kixxi'enlu ka benne se'e lhe'esi‑ni lhe].
Pedro‑ni rabie Jesús‑ni: “Lu ankalu Cristu”
(Mt. 16:13-20; Lc. 9:18-21)
27 Delola nna bederia Jesús‑ni dia lenie ka benne rudhetinieha, diake daka ta se'e ka yiesi to se'e daka Cesarea ge Filipo. Tti yu'uke nedaha nna unnaba tise, ree ke:
―¿Nú ra ka benne deki ankaa?
28 Ka benneha nna bekabike, ráke:
―Ttu chupa ka benne ráke deki lu ankalu Juan benne begadi indaha nna attu a chupake nna redenáke deki lu ankalu Elías, nna adíke nna ráke: “Ttu ka benne uka profeta ge Tata Do Yebáha‑ba nuná.”
29 Nianna ra Jesús‑ni ke:
―Lebi'i nna, ¿núla rale deki ankaa?
Pedro‑ni nna bekabina rana:
―Lu ankalu Cristu benne chi ga'anani Tata Do Yebáha idhelhe.
30 Jesús‑ni nna bodha'an tsitsie, ree ke:
―Anuttu nu gale deki neti ankaa Cristu.
Jesús‑ni rigixxi'abie deki teeki uttikane
(Mt. 16:21-28; Lc. 9:22-27)
31 Nianna tti udulo Jesús‑ni rabie ke:
―Neti benne daya yebáha teeki tate xxattaa uyúa elha disa. Ka benneola geri'iha lhe ka nu loni ge ka bixxudiha lhe, anágaba ka nu rule'ekinna ka benne nu ra lo bia bennabi bodha'an Moisés‑ni lhe, ka nuha ku'u ni'akani neti lhe uttikana neti lhe. Ttaka iki de chi beyonna ubisa uttiaha, la'ania nna eyaka benbaa attu libe.
32 Lhixxa rába utixxi'e nuha. Laxkala Pedro‑ni uxine attu ta subi nna utisane.
33 Ttaka lee nna bodeki loe ata se'e adí ka benne rudhetinieha nna bedhaka dise Pedro‑ni, ree na:
―¡Ubi'etta kwe'a xa nu xxegwi! Kumu lu nu anka ge ka benne se'e yiesi lo yu‑niba do ikilu; labí do ikilu nu anka ge Tata Do Yebáha.
34 Nianna tti uxie iyába ka benne se'e niha lhe ka benne rudhetinieha nna ree ke:
―Ganna nuxa ttúle raka lele etenalhale neti, teeki eria iki eria lele, meskila bixa satele nna gwaludaxxu kurusi gele nna gwaltá gwetenalha neti.
35 Kumu ttu benne ganna abittuba raka lebie bixa satebie de etenalhe neti, benneha nnittilee, delába labí aka ben benneha arlo Tata Do Yebáha. Ttaka benne eria iki eria lebie meskila bixa satebie delo ni'a kia lhe delo ni'a ge ka tisa ge Tata Do Yebáha lhe, benneha gwalálee.
36 Kumu, labí ixú nuha ganna ttixka ttu benne dhaabie uin gebie iyá nu se'e yiesi lo yu‑ni, ttaka arlo Tata Do Yebáha nna tsia nnittilee.
37 Nigaba labí aka geri'i go'ori'i elha nabani geri'i, kini anáchu aka benri'i ttu dia lii arlo Tata Do Yebáha.
38 Kumu ganna ttu benne ettunie kia lhe ettunie ge ka tisa kia‑ni arlo ka nu chi ruin satsa se'e nnanna, lhe chi rudhá ikikani Tata Do Yebáha, anágaba neti benne daya yebáha ettugabati gekani ganna chi dedáya lhe'e xiani ge Tata kiaha len ka anjeli geeha.