98
AMISY Opi Po mine so rakom
1 Masmur.
Wakinyo ransyeran wanyine raijo AMISY Ai,
weye Po anainame rave!
Wepi Po anasineko marova mai
taune Apa vambunine rai muno anem ngkovo ndandinite rai.
2 AMISY Po anasineko raroron kakavimbe
weye Po marova mapinde.
Apa dapatimuge moyar Po raroron kakavimbe
susye kotar mine so mai tutudi.
3 Opamo aemendi Apa muinyo no tawan tutiro Israel mansai rai,
muno teto Apa anakotaro daurairive mansai rai.
Kawasae mine so wo raen to,
wama Amisye Po anasineko raunande wansai no wama ana nsosobe rai.
4 Inya, vatano mine weap, wasananibe wagwain AMISY aijaseo titive!
Wasananibe muno wakiny ransyeran marinsawan!
5 Wakiny, wapo itari veano AMISY ararin,
wakiny muno wapo itari raeyan indamu ararimbe.
6 Terompeti muno tavuna ramawisy,
wasananibe wagwain AMISY aijaseo titive,
Opamo wama Akarijo Titi pije.
7 Mayane me ama anakotar no no ama uga,
muno muni me ama anakotar ntuna no ama uga
ranamote mbeseo panyoambe tenambe.
8 Syare koveamo mana akokoe maneme rapoam,
maisyare vatano anayanambe aneme rapoam.
Muno papukame rananibe
maisyare vatane mananibe ukinyo ransyerane rai
nai AMISY Amun.
9 Weye pakare indamu Po mangke rapatimu
susye kotar mine so mansai
mamaisyo taune Apa daeno moyare rai muno tugae bo rai.