97
AMISY Opamo Akarijo Titi
1 AMISY Opamo Akarijo Titi!
Koveamo vatano mine vone so manayanambe,
koveamo vatano utantuna no nupatimu manui rave so mananibe!
2 Andorame muno ananamane mo Amisy Apa tuna rije rakijani,
Wepi rati be akarive vatane mai, tavondi Apa mamaisye muno Apa moyare rai.
3 Taname muje no Amisy Amun
muno mo Apa marova mansanen ti mangkur bintabo.
4 Apa ivake ratatukande, ama vare mo nuge so ravabasya,
mine so wo raen muno ututar.
5 Papukame nsoyandi maisyare inunijoe no AMISY Amun,
wepirati Akoe be akarive mine tename so rai.
6 Naume mo Amisye Apa mamaisye raroron,
muno susye kotaro mine so wo Apa kovo ntiti raen tenambe.
7 Vatano ubeaje yare rai muno wo awa pinugane mararin
indati usamane weye mo kove raunande mai jewen.
Anawayo kotaro rui vayave indati ubeaje Amisye Ai.
8 Sya AMISY, vatano Sion wo ranaun muno mananibe,
vatano utantuna no munijo Yehuda mansanayanambe,
weye Winyo mangke rapatimu.
9 Winyirati AMISY Titi Rave no mine tename so.
Wibuinyi ntiti rave anawayo kotaro vatane wo masyanive makivan bintabo.
10 Inya, vatano wamuiny irati AMISY Aije weap,
ana ngkakaije mamo wapo rawatambe!
Weye AMISY Wepi Po vatano matawandi utavondi Aije awa ujayaisye rayaranande,
Wepi Po mansapaya irati vatano mamune mansaneme rai.
11 Kovo Amisy mbaro vatano ubeta Amisye Ai mai,
muno anayanambe nde irati vatano manuga ngkakavin dave mai.
12 Inya, vatano wabeta Amisye Ai weap,
wasanayanambe rave weye AMISY Apa ana dave obom mbewar.
Muno weapo kove raura seo Ai, weye Apa tame mi ndandinit.