96
AMISY Opamo Akarijo Titi mine so rai
1 Wakinyo ransyeran wanyine raijo AMISY Ai!
Inya, vatano mine tename weap, wakinyo ransyerane rai AMISY Ai!
2 Wakinyo ransyerane rai AMISY Ai, Apa tame rararimbe,
wapo Apa kovo Po wansapaya marova mai ravovo masyote anteter.
3 Wapo Apa kovo ntiti raririjo susye kotaro mine so mai
muno Apa anainamo Po rave raura vatano mine so mai tenambe.
4 AMISY Wepi panakoeve rave, weti obo Pi mamaisyo aura titive,
Obo pirati asyaniv daveo anawayo kotaro vatane wo masyanive makivan bintabo.
5 Weye vatano mine so awa anawayo kotare nawamo mamaisye ramu tenambe,
yara wama AMISY obo pirati Po naume ranari.
6 Apa kovo ntiti mo amuman,
Opamo bambunin, muno Apa Yavare mamo ndandinit muno ngkov dave.
7 Inya, susye kotaro mine weap, wapo AMISY ararimbe,
wapo Apa kovo ntiti muno Apa vambunine rararimbe!
8 Wapo AMISY Apa tamo ntiti rararimbe,
wapo anakotaro rameseo Aije raugave ta no wanijate Yavaro Amisy!
9 AMISY Opa dandinit weti wabeaje Ai.
Inya, vatano munije tenam, watutar no Amisye Amun!
10 Wapo ravovo susye kotaro mine so mai, wapare: ‘‘AMISY Opamo Akarijo Titi!
Tugae, Wepi Po mine so ranteto tindimuve, ti mansope jewen.
Po mangke rapatimu susyo mine so mansai
mamaisyo taune Apa moyare rai.’’
11 Inya, kotaro ntuna no naum muno mine so wasanayanambe,
inya, mayane me ama anakotar no no ama uga,
wasanamote mbeseo panyoambe tenambe.
12 Inya, anok muno anakotaro ntubai rai, wasanayanambe,
inyo kotaro ayamuga wakiny wasananibe no AMISY Amun,
13 weye AMISY pakare be akarive no mine so.
Pakare indamu Po mangke rapatimu mine tename so rai.
Indati Po mangke rapatimu vatano mine so mai mamaisyo Apa moyare rai,
muno Po mangke rapatimu susye kotaro mine so mai mamaisyo Apa ayao tugae rai.