95
Wade wamo Amisye ararimbe muno wamo araniv
Wade, wangkiny wansanamoto manakoe rai AMISY Ai,
wansananibe wanggwain akoeve to irati Ai,
Opamo maisyare unato oram, Po wansapaya irati anakotaro ngkakai rai.
Wade, wanta no Amisy Amun, wamo kove raura seo Ai.
Wansananibe, wangkinyo ransyeran kangkamane raijo wansanamoto manakoe rai.
Weye AMISY Wepirati Amisy panakoeve rave,
muno be Akari Titive irati anawayo kotaro vatane wo masyanive mansakivan bintabo.
Mine ama ate waraya mamo Po raijanande vintabo,
muno papukamo ntiti wemamo Apa ura rai tenambe.
Wepi Apa ura mayane rai, weye taune Pi Po ranari,
muno yawa ntavon taune Pi Po ranari aneme rai.
 
Wade ra wamo vukane ranteter wambeaje Ai,
wade ra wamo vukane ranteter no AMISY Wepi Po wansanari Amun.
Weye Wepirati wama Amisye Pije,
muno Apa kawasae ura wansai, taune Po wansayaranande,
maisyare vatano po maero domba makume wemaisy.
 
Inya, Amisye beker pare wapo araniv no unumeso!*
Pare: ‘‘Vemo wasanuga matu nora,
maisyare wapa aneno wusyine mansamai no munijo Meriba wemaisy inya,
muno maisyare arono una no munijo Masa no anoko kanen.
Nai ratuije weapa anene wo rinatopan,
Risya ana dave mamo wo raen dave to weramu wo rinatopan.
10 Tume tename jirum nggwaravainy dave Risyamo syonae susye so mai rave to.
Weti Syo raura syare: ‘Tugae, vatane so nanawamo makirive Rinai to,
muno wenawamo wonae Risya ananyao raiji.’
11 Maisyare wemaisy Ripari syanaamatambe,
syare: ‘Wenawamo indati usisa una mariraave no munijo Syo raurairive mai rai jewen.’ ’’
* 95:7 Anemo 7d-11 ama ayao ratoe akato no Ibr. 3:7-11,15. 95:8 Kel. 17:1-7; Bil. 20:2-13; Ul. 6:16. Ayao Meriba ama ine mare ‘‘ayaowi,’’ muno ayao Masa ama ine mare ‘‘ratopan.’’ 95:10 susye so: ama tunato raije mare vatano Israel nanawirati ube vatan anuive arono wuje munijo Mesir raora.