94
Amisye Po patimu moyare raugaje vatane mai mamaisyo awa ana udave rai
Sya AMISY, Winyirati Amisy Nyo mangke rasakinavo vatano mamune* mai,
Amisy, mangke ndasakinavo mai mamo syare Nyo raroron kakavimbe.
Amisy Winyirati Nyo mamaisye rapatimu mine so rai, syare wimbeseo!
Syare Nyo kakai rasakinavo vatano mararine mai mamaisyo awa ana udave rai.
Sya AMISY, ntoa nandui rati umba nsopija?
Ntoa nandui rati umba vatano mamune so umananibe mamo nsopija?
Wenawamo awa ayao mbe manayambe muno manuga rararino rai,
vatan tenambe nanawirati wo ana ngkakai rave onawamo umararin dai.
Sya AMISY, vatano mamune so wo Nya kawasae matawanto,
muno wo Nya vatano Nyo matayao terave namarome matakarasyo.
Wo wanya kavini muno arikainyo wawate maubaisy,
muno vatano maran udesen una tavon no munijo Israel maubaisy tavon.
Muno wo raura tavon ware: ‘‘AMISY Opamo Po raene ramu,
Amisy aneno Yakopa beaje Ai, Opamo pantatukambe reama ana reamo rave rai.’’
 
Inya, akari weapi wapantatukambe no vatane awa yasyine weap, syare wapo raraniv!
Inya, vatano wapo ana raene ramu weap, ntoa nandui rati umba wapa ana wadatantona ngkova?!
Amisye Wepi Po vatane mansamarikoame ranari, weti ayao kakaijo wapo ratore mamo Po ranaun ivae.
Muno Po vatane mamije ranari, weti ana wapo raveti ngkove jewene mamo Po raen dirive to.
10 Wepi Po vatano susyo Yahudi jewene manayao, weti indati Po mangke raude wasai tavon aje!
Wepirati Po ana raene rave vatane manyao.
11 AMISY Po vatane awa ana wo ratantona mamo Po raen bintabo;
Pare awa ana udatantona umaso mamo maisyare ovar bayave.
 
12 Kove ngkov irati vatano AMISY Winyo manayao indamu ubeta Naije mai,
nanawirati Nyo manyao irati Nya anaparatote rai mai.
13 Indati Nyo mansapaya irati ana nsosobe rai weti una mariraave,
nto ava Nyo akari mamune mapinto atemo Nyo ratayao mansamarome rai to.
14 Weye AMISY Opamo akirive Apa kawasae mansai ramu,
Opamo Po Apa vatano Po matayao terave amarome mapaya vayave ramu.
15 Arono naije indati patimu akari wo raugaje mamo mamaisyo Amisye Apa moyare rai jakato,
muno vatan tenambe nanawirati manuga nsarokire nanawamo indati utavondi rai.
 
16 Are pirati indati be marimbe rinai irati vatano mamune mai?
Are pirati indati po rinasopan irati vatano wo ana ngkakai rave mai?
17 Ranivara AMISY Po rinayaranande jewen datire,
kavintare risyasyo no amanija ama uga rai.
18 Arono syo ratantona syare kavintare ritandupuisy ti temaje,
weramu sya AMISY, Nya muinyo no tawan wemirati mo rinasopan tindimuve.
19 Ranivara rinanuga mamaun,
weamo Winyo rinayove ti inanuga ranayanambe.
 
20 Akari mamuno wo patimu mamaisye jewene raugaje nanawamo Amisy winaijaro matavone ramu,
wenawamo manatantonave ana ngkakai obo rai mamaisyo Nya ananyao ngkove rai jewen.
21 Wenawamo wanyinyaube ware umarovave vatano ubeta Amisye Ai mai,
muno wo mangke kakai raugaje vatano awa ayao kakaije meweno maije mai.
22 Weramu AMISY Opamo sya yano oram no rinaora pije,
sya Amisy Opamo sya unato oram inamamavube Ai pije.
23 Wepi indati Po mangke rasakinav akananto akari mamune mai mamaisyo awa ayao kakaije rai,
muno indati Po maupaeta ti makanive weye awa ana udave mamun.
AMISY, Wepirati wama Amisy, indati Po maupaeta ti makanive.
* 94:1 vatano mamun wenawamo vatano wonae ubeta Amisye Apa ananyao rai muno ananyao rui vayave rai. 94:18 kavintare ritandupuisy ti temaje: Ayao so ama ine mare Pemasmur apa anave mamaun, janivo wene nande aiji. 94:18 Ayao Ibrani hesed ama ine ratoe tumaimbe naiso mare: ‘‘muinyo no tawan.’’ Ama ino manakoe mare: ‘‘Amisye Apa muinye muno Apa anakotaro Po raurairive ti no tawan tutiro Apa kawasae Israel mansai mamo Po raveti mamaisy.’’