93
AMISY Opi Akarijo Titi no tawan
1 AMISY Wepirati Akarijo Titi!
Apa kovo ntiti maisyare ansun akoe Po rave,
Apa vambunine maisyare tarandino Po rave ansune rauvat.
Tugae, mine so ntet tindimuve tawan,
mangkiki jewen weye Amisye taune Po rantet.
2 AMISY, wimbambunin ntuna tawano
Nya mbe akarive rai kobe arono wusyinoe,
nai nugo pitawar Winyamo no tawan.
3 Abo AMISY, mana njam merere nseo,
mana njam ama kine merere nseo,
mana njam ama kino mpusyek merere nseo.
4 Tugae, mana njam manakoe ama kine merere nseo,
nde no rareno aneae mpanyoan,
weramu AMISY no no munijo ntiti bambunin dakivan bintabo.
5 AMISY, Nya ananyao ntindimu no tawan.
Nya yavare ndandinita nuge nuganui.