92
AMISY ararimbe weye Po patimu moyare raugaje
1 Ransyeran. Masmur Israel ukiny dai no masyoto Sabat.
2 Tugae, reangkiny reamo kove raura seo AMISY Winai,
muno reamo ransyerane veano AMISY Ntiti Rave nararimbe omamo ngkov.
3 Tugae, reamo Nya muinyo no tawane ravov no awatan ngkov,
muno winteto Nya urairije rai ravov no arono naman, omamo ngkov tavon.
4 Reangkiny reamo itari ama waije abusyine raeyan dai,
muno itari anakoe me, itari mamaune me yaeyan dai tavon.
5 Weye sya AMISY, Nya ana ndave mo inanuga so raveti ranayanambe,
Nya ana ndave omirati rikiny, inananibe rai.
6 Wakoe, sya AMISY! Nya ana ndave makokoive rave,
muno Nya ana ndatantona mamo ntiti rave, weti vatane reansea rai kakai.
7 Vatano awa ana udatantona ngkove jewene unanta rai kakai,
muno vatano wantatukambe unanta rai jewen tavon.
8 Ana unanta rai jewene mamo: Nai mine vone so vatano mamune ubakipambe usea wanui,
maisyare insumai ntubai ti nseo mo muni ratatuv wemaisy,
weramu onawamo indati Amisye Po maupaeta ti makanive.
Muno unanta rai jewen tavone miso: vatano awa ana udave ngkakaije wo ana mawese ratayao mai no mine so,
weramu indati Amisye Po maupaeta vintabo ti makanive ntoa nuge nuganui.
9 Yara AMISY Winyirati mbe akari titive ntoa nuge nuganui.
10 Weye sya AMISY, Nyo Nya marova mansaen,
Nya marova umaso nawamo indati Nyo maupaeta ti makanive,
vatano awa ana udave ngkakai nawamo indati Nyo mampusyeto.
11 Winyo rinaveti ibambunin, maisyare maero banteno bambunin dave wemaisy,
muno Nyo Nya kove raugaje rinai, maisyare manino mbovov nggwanyine rauvaro inakarije rai wemaisy.
12 Syo raen Winyi Nyo anasineko sya marova mai,
arono Nyo mapinde weamo wanonae ti syo manaun.
13 Vatano ubeta Amisye Ai nawamo ujayaisy ti utubai maisyare inyo korma ramaisy,
muno utubai ti ubambunin maisyare inyo aras no no Libanon ramaisy.
14 Onawamo ujaisy muno ubambunin no AMISY Amun,
maisyare inyo matu rantet no Yavaro Amisye rai wemaisy.
15 Onawamo ube vatan anuive to weramu ubambunin muno awa ana udave ngkov tutir,
maisyare inyo njayaibe tutir muno mo mane rauguje tutire wemaisy.
16 Weti vatano kove umaso wo raura ware:
‘‘AMISY Opamo moyar,
Opirati maisyare unato oram inamamavube rai,
Opamo Apa ana dave mamo nsarokir dave.’’