91
Amisy Opirati darino wansaora
1 Vatano mansamamavube Amisy Titi Rave Ai,
muno ugaugambe Amisy Opirati Bambunin dave Ai,
2 wo raurato AMISY Ai ware: ‘‘Winyirati sya Amisy, Winyirati syanave Nai.
Winyirati ndarino rinaora muno mbe yambe rinaora.’’
3 Tugae, indati Amisye Po napaya irati ana ngkakai ngkokaibe ti mo namane rai,
muno waneno mangke mo wene raugavo nai rai.
4 Indati darino naora, maisyare mangkuero mo ama tuvane rarauv no pepak ate rai wemaisy.
Indati winyamo nggaugambe Ai, maisyare mangkuere tuvane ugaugambe akoe ama pepak ate rai wemaisy.
Amisy teto Apa urairi rai mamo maisyare vakano ntindimu no naora wemaisy.
5 Vemo nyo anakotaro ngkakai manya namane rai rasyaniv inya,
muno ana ngkakai nande nai papabe no mbare rai rasyaniv tavon nora.
6 Waneno mangke nande no arono namane rai mamo vemo ndasyaniv inya,
muno ana ngkakai rui vayave mo nakupi no masyote yasyine rai mamo ndasyaniv tavon nora.
7 Ranivara vatane ribuge intabo ugwenen no nya nori we,
muno ribuge abusyine mueneno nakijani kai,
weramu winyamo ngkakai tavone ramu.
8 Winyamo indati nami ntamijo
mangke rasakinavo vatano mamune maije rai.
9 Weye AMISY Opirati darino naora,
Amisy Titi Rave Opirati nyo aijaro naora.
10 Weti ana ngkakai mangke mamo inta mo narone jewen,
muno waneno mangke inta nde mararaijo nya yavare rai jewen.
11 Weye indati Amisye Po Apa naite matutir ti ude wo nayaranande,
indamu udarino naora no nya unanui anya nto no rui rui vayave rai.
12 Indati wo naijaseo maneme rai,
inda vemo najoe rantukamo orame rai jinya.
13 Indati make sivuinye pe tawae me nayamo ndatakadi vayave,
muno make sivuinyo kamurame pe tawae mamune me nayamo ngkamugaje yai vayave.
14 Amisye Po raura pare: ‘‘Tugae, vatano are pirati anuga no Rinai pamo indati Syo apaya kakaije rai,
vatano napirati po rinaen tugaeve no anuga rai pamo ridarino aora.
15 Ranivara po rinawain, weamo Syo apa bekere raveti mamaisyo ai.
Arono no irati ana nsosobe rai, weamo rituna autan.
Indati Syo apaya irati kakai rai muno Syo apa tame raijaseo vombe.
16 Indati Syo apa tume raveti nggwaravainy ti anayanambe,
muno indati Syo apaya irati kakaije rai.’’