ETET 4
MASMUR 90-106
90
Amisye Opirati no pitawabe ti mamaisyo vatane wamakata nggaugambe Ai
1 Musa, opamo vatano panapatambe Amisye Ai, apa sambaya.
Reama Akoe, Winyirati reamakaore nggaugambe Nai no arono wusyinoea ndea naiso.
2 Arono Nyo unate ranari rainy,
arono Nyo munije muno mine tename so ama anakotaro ntuna rai ranari rainy,
nai nugo pitawaroe ntoa nuge nuganui, Winyirati Amisy no pitawabe.
3 Winyo vatane maugav akasyo no kopa rai,
Nyo raura, nyare: ‘‘Vatane weap, wapakasya ra wabe kopave akato!’’
4 Weye tume ribuge intabo nde nto to omainyamo,
windaena ta maisyare masyote intabo bayave amaisy,
muno maisyare namanoe deto to amaisy.
5 Nyo vatane reama tume raotar ti mavave mewen.
Reamaisyare nikimari ta nde nto vayave wemaisy,
muno reamaisyare insumaijo ntubai wemaisy:
6 Arono awatan ngkov insumaije ntubai merere nseo,
weramu arono namandi mayon muno ngkanen akato.
7 Tugae, Nya parijo mamoane mo reansaveti reanjani dave,
muno Nya pari mo reansaupaeta ti reansakanive.
8 Reama ana ndaveti ngkakai mamo Nyo raen tenambe to,
muno reama ayao kakai reamo rangkokaibe mamo Winyo raen to.
9 Nya pari mo reama kove so raotar aje tumaimbe,
reama tumo reamanya rai no mine so nto nsopi vayave maisyare nanawayo ta ramawita wemaisy.
10 Reama tumo reanjayaisyo rai mamo nseo tename mandeij eane abusyine rai,
muno ranivara reambambunina nene wea umba nseo tename mambisye rai.
Weramu ana nsosobe muno siuri omirati reansansowave rai;
reanjaisye somamo ntumainy bayave, umba wene mo reansaugav ti reansakanive.
11 Nya pari panyoane mamo vatane inta po ama vambunine raene jewen,
tugae, Nya pari mamoane mamo mangke dave ti mamaisyo vatane reandasyaniv.
12 Reamare Nyo reansanyao indamu reamo masyoto reangkove so ratantona kobe weye manui jewen,
wirati indamu reamanya rai mamaisyo ana ratantona ntiti rai.
13 Reama AMISY, wimparijo reansai mamo ntoa nanduija?
Reamamo Nya kawasae reamanapatambe Nai,
weti reamare nyakare reansai muno naemeno reansai!
14 Reamare Nyo Nya muinyo no tawane raude mawebe reansai awatan ngkove yanteter,
indamu reansananibe muno reangkiny reansanayanambe no arono ta reangkove so.
15 Reamare Nyo anayanambe raude reansai ama masyote manui mamaisyo masyoto Nyo siuri raude reansai ama manuije ramaisy akato,
muno mamaisyo tumo reana siurije rai ama manuije ramai tavon.
16 Reamare Nya ana ndave ti mbe anaanibe raroron kakavimbe Nya kawasae reamanapatambe Nai reansai jakato,
muno Nya kovo ntiti rarorono reama susyo merere nto mai tavon.
17 Akoe, Winyirati reama Amisy, reamare Nyo kove raugaje reansai,
muno Nyo reama anakero reandaijare ravera mamaisy,
tugae, reama ana ndaijare mamo ndavera mamai tugae.