89
AMISY teto Apa urairi raijo vatano Po atayao ai
Etan vatano Esrahi* apa ransyerano ananyao.
 
AMISY, Nya muinyo no tawane mamo syare kinyo rai jao ntoa nuge nuganui,
winteto Nya urairi rai mamo syo rariri tutir irati susyo merere nto mai.
Weye syo raen tugae, Nya muinyo no tawane mamo no pitawabe,
winteto Nya urairi rai mamo maisyare naumo ntindimu no tawan tutire warae ramaisy.
Amisye Winyo raura to, nyare: ‘‘Syo urairi raokae nanto vatano Syo atayao ai to.
Syo urairi raokae nanto Daud ai to, opirati Sya vatano panapatambe Rinai:
‘Indati Daud nya mbe akari titive mamo Syo raveti ntindimu,
no tawan tutiro nya susyo miridije nto mai.
Nya kursijo akari titi mamo Syo nya susyo nyo mampame inta maijaseo utantuna rai tutir ntoa nuge nuganui.’ ’’
AMISY, anakotaro ntuna no Manunggara wo Nya anainamo ndave rararimbe,
muno winteto Nya urairi rai mamo rabumbundi no anugano ndandinit awa yasyin.
Weye sya AMISY, nai naume watoamo inta po namaisye ramu,
naito ntuna no Manunggara wato nawamo inta wo namaisye ramu.
Ana akokoe una no anugano ndandinit no Manunggara ubeaje Amisye Winai,
Winyirati anaaniv weti nasyaniv dave irati ana akokoe utantuna nakijani makivan bintabo.
Sya AMISY, Winyirati Amisy mbe akarive naito munijo ntiti mai,
AMISY, arepi indati bambunin da Po namaisy? Jewena!
Muno winteto Nya urairi raijo anakotare rai tenambe.
10 Nya vambunine mo rareno mayan mpanyoane rakivan,
arono aneae ntatipu weamo Winyirati Nyo rapamo ti ntanamanin.
11 Winyirati Nyo Rahap§ rakupi ti maisyare vatane inta aubaisye wemaisy,
Nya vambunine obo mirati mo Nya marova mapinde ti mpusyek tatugadi.
12 Naume warae muno mine somamo Winya ma,
mine so muno anakotaro ntuna ama uga rai mamo Winyi Nyo ama ruke rantet.
13 Amisy Winyo ranijo wanampui muno wanansai ranari,
unato Tabor muno Hermon* yananibe ikangkamambe Nai, maisyare vatane ukangkamambe Nai wemaisy.
14 Wakoe! Amisye Winya naneme mbambunin dave,
muno Nya vambunine mbe anaanibe rave!
15 Winya mbe akarive mamo winteto moyare muno patimu mamaisye rai,
Nya muinyo no tawane omirati winteto rai ti ntavono Nai no Nya anakotaro ndave rai.
16 Kove ngkov irati vatano ubeaje AMISY Winai, ugwain umananibe rautane mai,
onawamo ujaisy weye Nya kove mbaro mai.
17 Masyote tename wepamo umananibe weye Winya ura mai,
onawamo manuga manakoeve rave weye Winyamo mbekobe mai.
18 Weye Winyirati reama vambunino ntitije ama ruke pi Winy,
muno Winya kove omirati mbewaramo reambambunin no marova rai.
19 Weye reama akari titi AMISY taune Nyo atayao, opirati maisyare vakano no reansaora;
reama Amisy ndandinit vatano Israel reambeaje Nai, Winyirati Nyo reama akari titi umaso aijaseo.
 
20 No wusyinoe Amisye winarorono Nya vatano panapatambe Nai inta ai
no apa nikimarije rai, Nyo raura nyare:
‘‘Syo vambunine raugasyo anaanive inta ai to,
opamo vatano Syo atayao no kawasae umaso awa yasyin indamu Syo aijaseo be akari titive mai.
21 Rinanto Daud ai to, opamo Sya vatano panapatambe Rinai,
Syo manino ndandinit terave Rinai rauvaro akari rai indamu Syo aijaseo akari titi rai.§
22 Risya vambunine mi indati mo asopan tutir kobe,
Sya vambunine mo ausuru ti bambunin.
23 Apa marova nawamo indati wo apinde jewen,
muno vatano mamune nawamo wo atawanto jewen.
24 Apa marova nawamo indati Syo maotar ti makanive,
muno vatano are nawirati mansanuga mamuno ai nawamo Syo maubaisy.
25 Sya muinye mamo no tawano ai muno riteto Sya urairi Syo raokae nanto aije rai tutir,
muno Syo Sya vambunine veano apa be akarive rasopan ti ntindimu.*
26 Syo asopan ti indati munijo be akarive rai mamo po raijanande ti muiya nto musyo no mayane von,
muno muiya nto no mana Eprat.
27 Indati akari titi Daud umaso po rinawain, pare: ‘Winyirati sya Injaya Pi Winy,
Winyirati sya Amisy, Winyirati sya unato oram inamamavube Nai ti ripaya marova maneme rai.’
28 Indati Daud umaso pamo Sya arikainyo anui waino ai,
muno opirati akari titi Syo aijaseo ti apa tame manakoeve akari titi kaijo mine so makivan bintabo.
29 Indati Sya muinyo no tawane mamo mpaya ai jewen ntoa nuge nuganui,
muno Sya urairijo Syo raokaisyo ai mamo ntindimu tutir.
30 Indati apa kursijo akari titi mamo Syo raveti ntindimu tutir
maisyare naume warae nteto ntindimuve tutire wemaisy,
ti Syo apa susyo po mampame maveti utantuna rai tutir kobe.
31 Weramu ranivara apa susyo merere nto wo Sya anaparatote rapaya ti ntami,
muno wanya mamaisyo Sya ananyao rai jewen;
32 ranivara wo Sya anaparatote so rakanyoandi,
muno wo Sya ananyao raijar akatoe jewen,
33 weamo Risyo Sya vuga omane veano manepati weye wo Sya anaparatote rakanyoandi.
Muno Syo kaijo waije veano manepati weye wo ayao kakai rave.
34 Weramu Sya muinyo no tawane mamo indati Syo raugavo Daud aora jewen,
muno Sya urairi idaokae nande ai mamo Syo rapaya ramu, yara riteto rai tawan.
35 Sya urairi Syo raokae nanto ai mamo indati Syo inta rakanyoandi jewen,
muno Sya ana idaurairive inawa rai to mamo Syo inta ranigwane ramu.
36 Syo Sya tamo ndandinite veano Sya urairije raokae nanto Daud ai to,
omamo Syo raokae intabom dave kobe ti indati ntoa nuge nuganui;
Syo Daud aponae jewen.
37 Apa susyo po mampame nawirati indati ube akari titive tutir,
muno apa kursijo akari titi mamo no tawan tutiro mai, maisyare uma ta no tawane wemaisy.
38 Maisyare embae no tawan no naume warae wemaisy,
mo raroron kakavimbe apa be akari titive mamo no tawan.’’
 
39 Weramu, sya Amisy, soamo akari titi Winyo atayao pamo nyonae ai to,
muno Nyo avakambe marambe weye mparijo ai mangkebe.
40 Nya urairijo ndaokae nande akari titi panapatambe Nai aije mamo Nyo ransopi vintabo to,
muno Nyo augaje apa kursijo akari titi rai to.
41 Yano oram no apa munije rakijani mamo Nyo randujai vintabo,
yavaro ntindimu ndarino maora mainyamo Nyo rangkati ti ntuna.
42 Vatan tenambe nanawirati wo awa munije raideto wo awa ananuge raowenta maora,
susyo kaijo una mararaive maije useambe mai.
43 Winyo anasineko raunanto apa marova mai jakato,
muno Nyo apa marova maveti manayanambe.
44 Yara akari titi Israel umaso apa anaiyu marova mamo Nyo raveti ngkavur,
muno Nyo sopambe ai jakato no marova ama uga rai jewen.
45 Apa vambunino be akari titive mamo Nyo ransopi,
muno apa kursijo titi mamo Nyo rangkuku asyo ntami no min.
46 Nyo apa tumo ta kamurame raotar aje tumaimbe ti maisyare be vatan anuive vayave kobe wemaisy,
muno Nyo ave samaneve ti mo atatuv asyo.
 
47 Sya AMISY, winamune rangkokaibe reansaija ntoa nanduija?
Ntoa nanduija umba Nya pari maisyare tanamo mbadurure ma nsopija?
48 Syare winaemeno rinai, weye sya tumo rijaisyo rai somamo ntumainy bayavea,
vatano Nyo reansanari reamamo reamatu ra no tawane jewen.
49 Vatano arepi indati kov tutir, yara wene nde ai jewen?
Arepi indati paya irati amanija ama vambunine rai?
50 Sya Akoe Winy, Nya muinyo no tawan no manasyinoe mamo?
Namirati ndaurairive irati Daud ai nyare indati winteto rai kobe omamo?
51 Sya Akoe Winy, risyamo Nya vatano syanapatambe Nai, ti syare naemeno rinai,
weye vatano kaije wo rinaura tantunawi rave.
Susyo kaijo wanui awa ayao useambe rinai mamo mo inaveti inanuga njoram.
52 Sya AMISY, Nya marova wo akari titi Nyo atayao apa tame rambaon dave,
pare to no rui ruijamo wo aura tatugadi.
 
53 AMISY ararimbe ntoa nuge nuganui!
Tugae, syare tugae!
* 89:1 Etan vatano Esrahi: 1Raj. 4:31 89:5 2Sam. 7:12-16; 1Taw. 17:11-14; Maz. 132:11; Arakov. 2:30 89:6 anugano ndandinit: Omamo anugano no no Manunggara, weti kuruno Ayao Amisy inta wo ratantona ware omamo anugano naito Amisy. § 89:11 Rahap omamo tawae akoe ntami no mayane warave ama tame mijem. Raen no Ayub 9:13, 26:12; Yes. 51:9. Weramu kuruno Ayao Amisy inta wo ratantona Rahap mbe rarorombe munijo Mesir rai, yara kuruno kaijinta wo ratantona ware mbe rarorombe irati nugo mbe rarembe namirati ntami mine so rai arono Amisye Po ranari rainyoe. * 89:13 Tabor omamo unato no no Onae Galilea ama ranijo varet. Yara Hermon omamo unato no no munijo Israel ama ranijo wanansai. 89:14 naneme: Ayao Ibrani raijamo terave Amisye anem ngkove rai, omamo mbe rarorombe Apa vambunine rai. 89:18 Ayao Ibrani maisyare so: ‘‘Nyo reama korodowai raijaseo titive.’’ Korodowai mbe rarorombe vambunin arono marova rai. § 89:21 1Sam. 16:11-13; Arakov. 13:22. Manine mamo veano Daud atayao terave anakero akari titi rai. * 89:25 Ayao Ibrani maisyare so: ‘‘Sya tame mi mbewaramo Syo apa korodowai raijaseo titive.’’ Ama ine maisyare ratoe no naiso. 89:28 Arono wusyinoe no munijo Israel, weamo arikainyo anya anuije opirati ave kobe rave apa rijate makivan. Weti indati apa ura anakotaro manakoe rai mo apa rijate awa ura rai rakivan arono ajaya kakai. 89:40 augaje: Ayao Ibrani maisyare so: ‘‘Nyo apa kakiono emasije ratakar asyo no kopa rai ti nggwambe.’’