88
Ransyeran weotor Amisye anonae arono waneno mangke nande nai
1 Ransyeran. Masmur susyo Kora wo ratoe. Nto irati akari po vatano matayao ukiny maugavo ransyerane rai ai. Ukinyo rai mamaisyo ransyeran ‘‘Mahalat Leanot’’ ama kine rarijati. Heman vatano Esrahi apa ransyerano ananyao mijem.
2 Sya AMISY, Winyirati Amisy Nyo inapaya irati kakai rai,
nai arono masyot syo winawain, muno arono naman ride no Winui.
3 Syare sya sambaya so more no Winui,
syare namarikoame rasakinav de sya anonae so rai.
4 Weye anakotaro nsosobe manui rave rinai to,
muno inajo rani mamo mararaijo unsanda amanija rai to.
5 Vatane wo rinatantona maisyare vatano pasyo no atemo wen akoe rai to wemaisy,
risyamo maisyare vatano apa vambunine meweno ai to wemaisy.
6 Risyamo maisyare vatano apaya ti tami vatano ugwenen to mansatavone wemaisy,
maisyare vatano kakai rarove ti pasyo tami no aipapo rai wemaisy.
Muno maisyare vatano Amisye winanimari ai to wemaisy,
weye winaneme mpaya ai ti Nyo ayaranande akatoe ramu.
7 Winyo rinapin asyo tami no amani ama ate waraya,
no ama ate masyo rave ti ngkaumudi rai.
8 Nya pari mo rinatawan asyo mangkebe,
Nya pari mangke maisyare aneae akokoe mbumu ti mo inatatuv asyo wemaisy.
9 Nyo sya manivuvi manso ta ti ugwaravainyo rinai,
muno Nyo rinaveti ribe noanive mai.
Risyamo maisyare rimakova ti syusyo kakai,
10 risyoyov tutir ti inami ndadiri weye rino siuri rai.
Sya AMISY, masyote yanteter inaneme raijaseo syo winawain.
11 Umba indati Winyo anainame rarorono vatano ugwenen to maije? Jewena!
Indako indati raroo ubesea akato ti ukangkamambe Naije? Jewena!
12 Vatano wasya utantavainy no aipapo rai to nawamo indati wo Nya muinyo no tawane ravove ramu.
Muno vatano ugwenen ti wasya no amani rai to nawamo indati inta wo winteto Nya urairije rai rariri ramu.
13 Indati vatano utantavainy no amani ngkaumure ama uga rai wo Nya anainamo ndave raene ramu.
Munijo wene somamo indati vatane wo Nya moyare raen ramu.
14 Yara sya AMISY, risyamo Winyirati syo nawain indamu Nyo sopambe rinai,
muno awatan ngkov yanteter risambayambe Winai.
15 Sya AMISY, veanimaibe Nyo rinatugaro marambe?
Mbeanimaibe nakirive rinai?
16 Arono rimamaune wea ndea naiso yorame mo inaron tutira kavintare ikakai;
siurijo Nyo raude rinai mo rinaveti rinanuga mamaun muno ribambunin da rinatawandi rai jakatoe ramu.
17 Nya pari mamoan dave mo inatamo,
Nya pari mangke raude ti mo inaupaeto!
18 Nya pari obo mirati ndaude ti mo inatatuv tutir bayave maisyare manayame ramaisy,
mo rinatatuv kijani vintabo.
19 Sya arakov reangkavave muno vatano inanuga no mai nawamo Nyo mansop ti ugwaravainyo rinai to,
weti kaumure obo mirati soamo mbe arakobe rinai jakato.