87
Kangkamambe Amisye Apa munijo Yerusalem rai
Ransyeran. Masmur vatano susyo Kora wo ratoe inta mi som.
 
Nai unato ndandinit, AMISY Po Apa munije rauseo nteto rai.
Munije kotaro no no Israel,
Yerusalem wemirati AMISY anuga no rai rave.
Inya, Amisye Apa munije winy ndanide,
Amisye Po ayao ngko dave raura aje Yerusalem wibuiny nai, pare:
‘‘Wakoe! Vatano Mesir* muno Babel kavinta nakato Syo maugave siso Sya vatano ubeto Rinai matavon.
Mo namije rakivan akato mamo vatano Pilistea, Tirus muno Sudan wenawamo
Syo mausiso ube munive vatano utantuna munijo Yerusalem rai matavon tenambe,
umba Syo mato siso irati kawasae Yerusalem mai tavon.’’
Munijo Sion indati vatane wo raura ware:
vatano susye kotar usisa utantuna rai tenambe, maisyare vatano ta utantuna rai to wemaisy.
Muno Amisye Titi Rave taune Po rayaranande ti ntindimu tutir.
Arono AMISY Po vatano susye kotar awa tame ratoeve,
umba Po mato siso kawasae Yerusalem matavon.
Vatano susye kotare so ukiny, usarer wo Sion rangkakivambe ware:
‘‘Sion, rikov di winui.’’§
* 87:4 Mesir: no Ayao Amisy kaijinta mo ama tamo wusyine ratoe tavon, omamo Rahab. 87:4 Sudan raura tavonamo Etiopia, omamo ntami no Mesir ama ranijo wanampui. 87:5 Sion rawain tavonamo ‘‘Yerusalem.’’ § 87:7 Ayao Ibrani ama ine naiso mbare ramu.