86
Amisye anajo indamu aemeno rinai
1 Daud apa ana danajo Amisye Ai.
Sya AMISY, syare namarikoame rasakinavo rinai muno Nyo sya ana danajo ravera mamaisy,
weye risyamo vatano mayondi muno sya ana jajewembe rinai.
2 Syare Nyo sya jayaisye so rayaranande weye risyamo inatawandi tavondi Winai tutir,
risyamo syanapatambe Nai, muno syanave Nai, weti syare Nyo inapaya kakai rai.
3 Sya Akoe, Winyirati sya Amisy, syare naemeno rinai,
weye Wibuiny irati syo nawaino masyote anteter.
4 Sya Akoe Winy, risyamo syanapatambe Nai, weti syare Nyo anayanambe raugaje inanuga so rai,
weye inanuga somamo daijaseo Winai.
5 Weye tugae, Akoe Winyamo ngkov dave muno mayaro Nyo vatane awa ayao kakai rapaya,
vatan tenambe wo nawaine nawamo, Nya muinyo no tawane mamo Nyo raveti njam tutiro mai.
6 Sya AMISY, syare Nyo sya ana danajo raraniv,
muno Nyo sya ana dawain ore so ranaun, syare naemeno rinai!
7 Arono rui rino ana nsosobe ama uga rai, risyo winawain,
weye Winyirati Nyo sya ana danajo raveti mamaisy.
8 Sya Akoe Winy, anawayo kotaro vatane wo masyanive nawamo inta wo winamaisye ramu,
muno inta umamaisyo wo ana inta ravera mo Winya ramaisye kakai.
9 Sya Akoe Winy, susye kotar tenambe Nyo manari nanawamo indati ukarimu ude,
ude ubeaje no Winamun,
muno wo naijaseo titive.
10 Weye Winyirati mbambunin muno Nya ana ndave mamo mbe anaanibe,
Wibuiny irati Amisye Pi Winy.
11 Sya AMISY, syare Nyo rinanyao Nya unanui rai,
indamu syanya mamaisyo Nya ayao tugae rai.
Syare Nyo inaveramu syo winasyaniv irati inanuga ntenami rautan.
12 Sya Akoe, Winyirati sya Amisy, syo kove raura seo irati Winai rinanuga ntenami rautan,
muno syo Nya tame rararimbea ntoa nuge nuganui.
13 Weye Nya muinyo no tawan omamo manakoeyo rinai,
muno Nyo sya jugara apaya irati wene rai ti syasyo no amani jewen.
14 Sya Amisy, vatano mararine ubesea ware umarovave rinai,
vatano usoowate inta wanugan ti ware wo rinaubaisy,
muno wo Amisy winatantona akato ramu.
15 Weramu sya Akoe, Winyirati sya Amisy, Winyamo muiny dave muno naemeno rinai;
Winyamo natawandi ngkov dave;
Nya muinyo no tawane muno winteto Nya urairije rai mamo manakoe tutir.
16 Syare namumbe de rinai muno naemeno rinai.
Risyamo syanapatambe irati Nai, weti syare Nyo vambunine raugaje rinai.
Muno risyamo, sya ingkoa mamo vatano manapatambe Winai, weti syare Nyo rinapaya irati kakai rai.
17 Sya AMISY, syare Nya kove inta raugaje rinai indamu mbe rarorombe Winyamo mbekobe irati rinai.
Wirati vatano manuga mamuno rinai wo raen muno usamane,
weye Nyo rinayaranande muno Nyo rinayove.