99
AMISY, Akarijo Titi dandinit
1 AMISY Opamo Akarijo Titi,
weti susye kotare wapo asyaniv watutar!
AMISY de tuna no ana yatotov kerub aya yasyine rai indamu be akarive wansai,
weti mine vone so mangkiki.
2 AMISY Apa vambunine manakoe no Sion,
Opamo titi, no vombe rave kobe,
Opamo titi susyo mine so makivan.
3 Koveamo wenawamo ukiny,
wo Nya tamo namirati manakoe muno mbambunin dave rararimbe;
Winyamo ndandinit dave!
4 Winyamo Akari Titi mbambunin, nanuga no moyare rai.
Winyirati Nyo vatane manyao indamu wo ana mamaisye obo raijar.
Ananyao muno moyar no no vatano Israel awa yasyin,
Winyirati Nyo ana mamaisye raugaje.
5 AMISY aijaseo titive, Wepirati wama Amisy!
Muno wamo vukane ranteter wambeaje Ai no Apa tuna ri.
Opamo dandinit dave!
6 Musa muno Harun wenayamo yator siso syeno Amisy matavon no awa yasyin,
muno Samuel no tavon no vatano usambayambe Apa tame raije awa yasyin tavon.
Onawamo usambayambe AMISY Ai,
muno Wepirati Po awa sambaya raveti mamaisy.
7 Kamayo mo unanuije rarorone ama uga
AMISY payao nanto Israel mansai;
onao ubeta Apa ananyao rai
muno anaparatot raugaje mansaije rai.
8 AMISY reama Amisy, arono awa ana udave ngkakai,
Nyo mangke raugaje mai.
Weramu arono usambayambe Nai,
Nyo maraniv, Nyo awa ayao kakaije rapaya mai.
9 AMISY aijaseo titive, Opirati wama Amisy!
Wamo vukane ranteter wambeaje Ai no Unato Sion, Apa tuna ri ndandinit!
Weye AMISY wama Amisy opamo dandinit!