76
Amisy Po marova mataopon
1 Nto irati akari po vatano matayao ukiny maugavo ransyerane rai ai. Ukinyo rai, wo itari raeyan. Masmur Asap po ratoe. Ransyeran.
2 Vatano una no munijo Yehuda wo Amisy aen tenambe
muno Apa tame manakoe no Israel!
3 Nai Salem Apa yavare ntami rije,
Apa tuna ri rave mi Sion!
4 Nai ratuije Wepi Po marova awa ato mbadurure radaut,
muno awa vakane muno omako waravainy
muno anaiyu randamisy tenambe.
5 Wakoe! Amisy, Nya varo ngkove nggwaayan dave muno Winyi ntitito rave!
Unato akokoe so nsayae no wusyinoe,
weramu Winyi ntitijo rakivan bintabo.
6 Vatano anaaniv awa anaiyu, awa ananuge rantauno mansai to,
utaopon to, inta ubesea akato jewen.
Naito anaaniv kakui awa vambunine rakanive mai to.
7 Amisy, Winyirati reama aneno Yakop beaje Nai, Winyo mansanenen papabe,
weti vatano usea kuda mai nawe,
kuda nao ntaruran tenambe.
8 Wakoe, Wibuiny to, vatane wo nasyaniv!
Vatane nawamo inta bambunin da te no namune rai kakai
arono Nya pari mangke raugaje.
9 Amisy, wino no munijo ntiti, arono Nyo patimuge raugaje,
kawasae mine so ujani dave vintabo muno anamainitu mai.
10 Arono wimbeseo indamu Nyo mangke raugaje,
umba Nyo vatano matekarasyo no mine so maijaseo no awa siurije rai.
11 Tugae rave, vatano manuga mamun kai,
AMISY Nyo masakinav weti ukangkamambe Nai.
Muno vatano manuga pari no tawano maive onawamo indati ubevea marudija,
arono AMISY Nyo maugav akare ubeaje Nai.
12 Ranivara wapo urairije raokokaisyo AMISY Ai,
koveamo wasayae rai kobe.
Vatan tenambe wana no AMISY akijani ri weap,
koveamo wapo anakotare raugavere raunanto Ai,
weye Opi mamaisyo asyaniv.
13 Wepirati Po akari awa mangkakeraive radaut,
Wepirati anaaniv kakuiveo akari titi mine so mai.