75
Amisy Wepi Akari Titi Apa ana dapatimu moyar
1 Masmur Asap po ratoe. Nto irati akari po vatano matayao ukiny maugavo ransyerane rai ai. Ransyerane so ama kine mo ransyerano kaijinta ramai tavon, namirati ama akari mare: ‘‘Vemo wapo vatane maupaisy inya.’’
2 Sya Amisy, reamo kove raura seo irati Winai,
reamo kove raura seo Nai muno reamo Nya tame rawain,
muno reamo Nya ana ndave mbe anainambe ravovo.
3 Amisye Po raura pare: ‘‘Arono Sya masyoto dapatimu mamaisy,
weamo taune Risyirati Syo patimu moyare raugaje vatane mai mamaisyo awa ana udave rarijati.
4 Arono mine so mantauno vatano ntuna rai mautan,
weramu Risyirati Syo ama aji raveti ntindimu.
5 Syo vatano mansararine maura syare: ‘Vemo wasararin nora,’
muno Syo vatano mamune maura syare: ‘Vemo wasangkakeraive wapa vambunine rai nora.
6 Vemo wasangkakeraive, wapo wapa vambunine raijaseo titive inya,
muno vemo wapo wapa popane ranepat inya.’ ’’
7 Weye arono patimu maran omamo no no wanamuram muno ranijo varet umba nde ramu,
muno no no ranijo wanampui muno wanansai umba nde mo vatane maijaseo titive ramu.
8 Yara Amisye Wepi Po patimugo marane raugaje,
Po vatane inta mataopon yara Po vatano kaijinta maijaseo.
9 Weye AMISY Po Apa kapi raijar no aneme rai, ntairijo pari mangke rai,
maisyare anggurijo mpariman dave ntairi rai no no aneme rai.
No Apa kapi umaso rai, Po anggurije umaso rauvar,
indamu vatano mamun mine so
wo ramanam bintabo irati ama kapapere rautan.
10 Yara risyamo rinananibe inanamote raijaseo tutir ntoa nuge nuganui,
rikangkamambe Amisy wama aneno Yakop beaje Aije Ai.
11 Wepirati Po vatano mamune awa vambunine radaut,
yara vatano kove nanawamo Po awa vambunine raveti miridi nseo.