77
Ransyeran weotoro Amisye anajo indamu aemeno wansai maisyare wusyinoe ramaisy
1 Masmur Asap po ratoe. Nto irati Yedutun ai, wepirati akari po vatano matayao ukiny maugavo ransyerane rai.
2 Syo Amisye winawaino inanamoto manakoe rai,
syo nawaino inanamoto manakoe rai, indamu Nyo rinaraniv.
3 Arono rino irati ana nsosobe ama uga rai, syo Akoe winakani.
No namano waravainyoe inaneme mamo mananai jewen, yara syo raijaseo tutir, indamu syo Amisye winanajo,
weramu mo inanuga so rayove ramu.
4 Ranivara syo Amisye winatantona, weamo syo winanonae,
ranivara syo ratantonave, weamo sya vambunine meweno rinai rave kobe.
5 Winyo inami raneka ti rigwaran tutir no arono naman,
inanuga so ntanamanine jewen, weti syayao kakai.
6 Syo masyoto arono wusyinoe ratantonave,
syo tumo wusyino nde nto to ratantonave akare.
7 Arono naman, syo rakaraebe,
muno syo ratantonave no inanuga, ti syo raura syare:
8 ‘‘Ntoa nuge nuganuija, Akoe ponae reansaija rao?
Muno anuga ngkovo reansai jakato ramu rao?
9 Apa muinyo no tawane mamo raumandi reansaija ntoa nuge nuganuija rako?
Beto Apa urairi rai mamo ndea nsopi to rako?
10 Amisye animari reansai ti bekobe reansai akato ramu to rako?
Indako, pari ti aemeno reansai akato ramu rao?’’
11 Weti syo raura, syare: ‘‘Ana mo inaveti inanuga njorame mamo,
Amisy Titi Rave, Apa vambunine meweno Ai to rako?’’
12 Weramu AMISY, soamo rinaemen akato Nya ana ndave rai,
syo Nya ana ndave mbe anainambe no arono wusyinoe ratantonave akare.
13 Syare syo Nya ana ndave rakaraebeve,
muno syo Nya ana ndave makokoive ratantonave.
14 Sya Amisy, Nya ana ndave mamo ndandinit!
Tugae, anawayo kotaro vatane wo masyanive nawamo inta awa vambunine mo Winya ramaisye ramu!
15 Amisy, Wibuiny irati Nyo ana mbe anainambe raroron,
Nyo Nya vambunine raroron ti susye kotare wo raen.
16 Winyi nanemo vambunine veano Nya kawasae mapaya aroo rai no Mesir,
onawirati susyo aneno Yakop muno Yusup.
17 Sya Amisy, mayane mo naen ti njani dave,
tugae, Mayano Kolsum mo naen ti ntutar,
muno nawanano ntento ntutar dave.
18 Andorame mo maru pape raveti maje,
nai naume warae katitire ngkatitibe anyi,
muno Nya ivake ratatukande maisyare atoe ratapo anyi wemaisy.
19 Nya katitire ravabari no ovaro maese uga rai,
ivake mo nuge ravabasya,
mine so mangkiki muno ntutar.
20 Nyo Nya unanui rave no mayan,
muno nyanya mayano mpanyoane umaso ama yasyine raito,
weramu Nya une inta raene ramu.
21 Nyo Nya kawasae maugav maisyare vatano po maero domba makume wemaisy,
Musa muno Harun wenairati yo maugav.