72
Amisye anajo indamu Po kove raugaje akari titi ai
1 Masmur Salomo po ratoe.
Sya Amisy, syare Nyo Nya patimu mamaisye raveano akari titi anyao,
muno Nya moyare raveano arikainyo be akari titive umaso anyao.
2 Indamu po Nya kawasae maugav mamaisyo moyare rai,
muno po patimu mamaisye raugaje irati Nya vatano matawan asyo mansai.
3 Syare kovo ana mawese ntami unate muno papukamo munije so rai tenambe,
muno kovo saumane ntami weye kawasae wo ana ngkove rarijat.
4 Syare akari titi be marimbe irati vatano matawanto mai,
muno po vatano ananuge jajewembe mai mapaya awa siurije rai,
yara vatano wo matawan asyo nawamo po maubaisy bintabo.
5 Syare akarijo titi apa tume nggwaravainy indamu apa be akarive ntoa nugoenta,
maisyare uma pe embae me ibar tutire wemaisy.
6 Syare po kove raugavo apa kawasae mai maisyare maruge maje anare rai ti mo mane rauguje wemaisy,
maisyare maru pape maje ti nsaakop irati nawaisye rai wemaisy.
7 Syare moyare obo ntami no arono be akari titive so,
muno saumano kove muno anakotare maweso kawasae mai no tawan tutir,
maisyare embae mbar tutire wemaisy.
8 Syare apa munijo po raijare mamo maneka ti nto no mayane ama nake rai muiya nto no ama nake rai,
muno nai mana Eprat muija nto no munije ama maran.
9 Indati vatano ntuna no anoko kanene ude ubeaje ai no amun,
muno apa marova ude wo vukane ranteter wo ajo ranu, weye po anasineko mai.
10 Indati akarijo titi munijo Tarsis muno akarijo titi nupatimu wo romane raugavere ai.
Akarijo titi munijo Arap muno Etiopia ude wo romane ravae nande ai.
11 Akarijo titi nao tenambe indati ude ubeaje ai,
muno susye kotare wanapatambe irati ai.
12 Weye vatano awa ana jajewembe mai ti wanonae nawamo po mapaya irati rai,
muno vatano matawanto nanawirati inta wo sopambe mai jewene nawamo po mapaya awa siurije rai.
13 Opamo aemeno vatano umayondi mai, muno vatano awa ana jajewembe maije mansai,
vatano awa ana jajewembe mai nawamo po mapaya irati wene rai.
14 Indati po mapaya irati vatano wo mave tatugadi muno wo matawanto mai,
weye awa siuri mamo mo aveti aemeno mansai rave.
15 Koveamo indati akari titi apa tume nggwaravainy dave!
Syare indati emasijo Arap raugavere ai.
Syare indati apa kawasae usambayambe ai tutir,
wo kove ranajo indamu raugaje ai tutir!
16 Syare koveamo awa anare kasyambere ntairi awa muni rai,
ti nseo mo unate ratatuv tenambe.
Koveamo awa anare ntubai mawes maisyare anare ntubai mawebe no munijo Libanon ramaisy,
muno apa kawasae nawamo awa wanui merere nseo maisyare insumai nsani ti mo kopa ratatuv wemaisy.
17 Syare koveamo akari titi apa tame mamo vatane maemendi rai ntoa nuge nuganui,
muno apa be akari titive mamo indati vatane wo ranaune merere nto kobe maisyare uma bar tutire wemaisy.
Syare indati susye kotar tenambe ubeker ware kovo raugaje ai omamo raugaje irati mai tavon,
muno indati vatan tenambe wo aura ware opirati no irati anayanambe rai pijep.
18 Kangkamambe AMISY Ai, Opirati Amisy vatano Israel ubeaje Ai!
Obo pirati mamaisyo Po anakotaro mbe anaanibe raroron!
19 Kangkamambe Apa tamo ntiti rai jao ntoa nuge nuganui!
Syare Apa kovo ntiti ntairi mine so rai tenambe!
Tugae, syare tugae!
20 Daud, opirati Isai apa kavop, apa sambaya mainyamo ndea nsopi no naije.