71
Amisye anajo indamu tuna nautan no arono mbe vatan anuive
1 Sya AMISY, Wibuinyirati syakaore gaugambe Nai,
vemo Nyo rinapayamo sya marova wo inave samaneve inya.
2 Amisy, Winyamo Nya ana ndave moyar, weti syare Nyo rinapaya irati kakai rai.
Syare namarikoame rasakinavo sya ana danajo ore rai.
3 Syare Winyirati maisyare unato oram ntindimu inamamavube Nai,
muno yano oram no rinaora indamu ripaya irati kakai rai.
Tugae, Winyirati maisyare sya unato oram muno sya yano oram ntindimu.
4 Sya Amisy, syare Nyo rinapaya irati vatano mamune mansaneme rai,
Nyo inapaya irati vatano mansamuno ivuinye muno usoowate no mai awa vambunine rai.
5 Weye Akoe Winy, Wibuinyirati inanaveano namen.
AMISY, syanave Nai no arono ta ikamuramoe ndea naiso.
6 Winy irati isaroro Nai, arono rino no ingkoa ranobon ti rinavaki aje kobe we ndea naiso,
Winyo rinayaranande no arono rinano kobe we,
weti Wibuinyirati syo nararimbe tutir.
7 Winyirati ntindimu ti rigaugambe Nai,
weti ibe rarorombe indamu vatano wanui wo rinaen ware Amisye Winyi Nyo vatane reansayaranande.
8 Rikangkamambe Winai tutir,
syo Nya kovo ntiti ravovo masyote anteter.
9 Vemo Nyo rinavakambe no ibe vatan anuive so inya,
muno arono ibambunin akato jewen to, weamo vemo winaneme mpaya rinai nora.
10 Weye sya marova wanugan wayao inai,
wanyinyaube, ubeker ware wo rinaubaisy.
11 Wo raura ware: ‘‘Amisye aneme mpaya ai to,
weti wade, wamo awatan indamu wamo aijar,
weye indati inta po ayaranande akato ramu.’’
12 Amisy, syare vemo winggwaravainyo rinai nora!
Sya Amisy, syare nyavave Nyo rinaijaseo!
13 Koveamo Nyo sya marova mave samaneve muno Nyo maupaeta ramu makanive,
koveamo vatano wanakakaive rinai nawamo, Nyo awa tame ravera ngkakai ti usamane.
14 Yara risyamo Wibuinyirati inanaveano namen,
muno syo nararimbe tutir.
15 Nya ana ndaveti mamaisy muno moyar,
muno Nyo inapaya kakaije rai mamo syo ravovo masyote yanteter,
weramu risyamo mamaisyo syo rator bintabo kakai.
16 Sya Akoe AMISY Winy, rikangkamambe Nya ana ndaveti makokoive rai,
Wibuinyirati Nya ana ndaveti moyare mamo idararimbe.
17 Sya Amisy, Winyo rinanyao no arono ta rikamuramoe ndea naiso,
Nya ana ndave mbe anaanibe omamo ridavovo tutir.
18 Sya Amisy, inakarivuinye nsavu muno imaun kobe so,
syare vemo Nyo inapaya nora.
Wirati indamu syo Nya vambunine ravovo tutir irati arikainyo varoro ubeseo akato so mai,
muno susyo merere nto wo Nya vambunine ranaun tavon.
19 Sya Amisy, Nya moyare mamo ntitito rave no naume warae.
Winyirati Nyo anakotaro makokoe rave.
Sya Amisy, inta po winamaisye ramu.
20 Winyo anakotaro nsosobe manui ramayaro nande rinai,
weramu indati Nyo vambunine raugakaje rinai jakato,
muno Nyo inaijaseo ti ripaya wene rai.
21 Indati Winyo sya tame raveti manakoe,
muno Nyo rinayove akato.
22 Sya Amisy, Winyamo nteto Nya urairi rai tutir,
weti syo nararimbe, rikinyo ransyerane rai, syo itari anakoe raeyan dai.
Sya Amisy, Winyirati ndandinit ti vatano Israel ubeaje Nai,
rikinyo ransyerano kangkamane raijo Winai, syo itari mamaune raeyan dai.
23 Rinanayanambe gwain kinyo ransyerane rai,
rikiny kangkamambe Nai weye Winyo rinapaya irati kakai rai to.
24 Rinawa so mo Nya moyare ravovo masyote anteter,
weye vatano ware wo rinave pabe nanawamo,
awa ana ura mamaundi muno usamane.