ETET 3
MASMUR 73-89
73
Vatano kove pe vatano mamune pe aya matam akari
1 Masmur Asap po ratoe.
Tugae rave, Amisye pamo kov dave irati Apa kawasae Israel mansai,
nanawirati vatano manuga ndandinite mai.
2 Weramu risyamo, sya kawi rantukam ti kavintare ritemaje,
kavintare umba sya anave raumandi.
3 Weye arono syo vatano mararine mansaen,
onawamo vatano mamun, weramu una kovo ana mawese rai,
weamo ribeker syo mansamaisy tavon.
4 Weye syo manyanyutamo siurije inta nande maije ramu,
manasine mamo nsauman nsev dave muno ubambunin.
5 Ana nsosobe nande vatane mansai mamo inta nande mai ramu,
muno ana mangke mo vatane makep asyo inta nande mai ramu.
6 Maisyare omaiti, wenawamo awa mararin dave raroron kakavimbe,
muno mansamuno ivuinye obo mirati raeno mai.
7 Wenawamo manugave ananuge manui obo rai ti awa ayao kakaije miridi nseo,
umba manuga ntairi awa ana udatantona ngkakai rai.
8 Wenawamo wanaikebe muno wo vatane maura tantunawi,
mansanuga rararin, wo vatano kaije matawan asyo.
9 Mansawa raijaseo wo Amisye aura tantunawi,
muno wo vatano mine so awa tame rampami vayave!
10 Weti Amisye Apa kawasae usakinav wakare utavondi vatano mamune umaso mai,
muno utataopono awa ayao wo rakere rai.
11 Vatano mamun umaso wo raura ware:
‘‘Amisye pamo pantatukambe wama ana wandave raija,
Amisy Titi Rave Opamo nanto rai ramu.’’
12 Vatano mamune umaso nanawamo
awa ananuge ama manuije merere nseo kobe,
ana nsosobe nande mai jewen, yara una mariraave obo rai tutir.
13 Syo rakarae rikovo rinanuga ndandinite rai
muno risyo ayao kakaije rapaya ra ntami wemamo ribea marudija.
14 Weye risyamo ana nsosobe obo nande rinai masyote anteter,
muno risyamo rinansewabe awatane yanteter.
15 Ranivara syo raura taije maisy,
weamo ribe tatugadi nanto irati Amisy Nya kawasae mai to ije.
16 Arono ribeker syare syo ratantona mavabe indamu rinanto rai,
weramu ana umaso nsosobe rave irati rinai.
17 No ava risiso no Yavar Amisye rai,
umba rinanto irati vatano mamune awa matam akari rai.
18 Tugae rave, Amisy, Winyo maveta una no unanuijo nsaremo rai,
umba Nyo mapaya vayave ti utaopon, muenen ti mewen.
19 Wakoe! Kavuratawe wenawamo maupaeta ti makanive wene rai,
weno mangke mbambunin dave umaso mi mo maupaeta.
20 Sya Akoe, vatano mamune umaso makanive vintabo arono winseo, Nyo maubaisy,
maisyare vatane apa nikimarije rakaniveta apa ana datantona rai arono nikija seo.
21 Arono naijeamo rinanuga so rawaive rave,
muno inanuga somamo maisyare rauwaki wemai dave.
22 Muno risyamo syantukambe rave muno rinanto rai ramu,
syananepabe vayave no Amisye Winamun, maisyare maero pananepabe vayave wemaisy.
23 Weramu risyamo syararai tutir irati Amisye Winai,
Winyo rinanem ngkove raijar.
24 Nya ananyao wemi mo rinaugav mavabe,
indati ama marane mamo Nyo kovo ntiti raunande irati rinai.
25 Amisye Winya jewen, umba arepi rati indati rinanaveano amen no munijo Manunggara?
Muno mine somamo ribekero inta raije ramu, yara Amisye Wibuinya.
26 Arono rui vayave rinanasine muno rinanuga so mayondi,
weramu Amisy Winyo rinanuga so raijaseo ti mbambunin.
Winyirati ribekero Nai tutir ntoa nuge nuganui.
27 Tugae, are nawirati ugwaravainyo Nai, indati muenen ti makanive.
Muno are nawirati makirive Nai, Nyo maupaeta ti makanive.
28 Yara taune risy, ribekero no mararaive Amisye winatavon,
Akoe AMISY, syo napatimu indamu Winyirati ndarino rinaora,
indamu syo Nya anakotaro ndave ravovo tenambe.