50
Wade wambeaje Amisye Ai tugaive
1 Masmur Asap po ratoe.
AMISY, Wepirati Amisy Apa vambunine ntiti rave, payao aje no mine so rai,
Po vatano mine tename so mansawainde
no ranijo wanamuram mansanan nto nanto no varet.
2 Amisy no no Unato Sion, munijo ngkov dave kaije rakivan bintabo rai,
Apa vare mujeamo mba dave maisyare uma apa vare wemaisy.
3 Wama Amisye de muno anamainitu Ai ramu yara payao.
Taname muisyeve Ai, mo nuge ranen ti mangkudi panyoambe,
muno ovaro rep panyoan nande no akijani.
4 Amisye Po naume warae me mine so me yawainde,
indamu Po ana mamaisye rapatimu irati Apa kawasae maija yo raen.
5 Po raura pare: ‘‘Syare vatano sya ura mai nanawamo mansanugande muno maugavere no Rinui,
wenawamo vatano wo urairije raokaisyo Rinai arono wo anakotare rameseno Rinai.’’
6 Naume mo Amisye Apa anuga mamaisye raroron,
weye Amisye taune Pirati Po ayao mamaisye rapatimu irati vatan tenambe mai.
7 Amisye pare: ‘‘Inya, Sya kawasae Israel weap, wapo Sya ayao raraniv!
Risyirati Amisy, wapa Amisye Pi Risy,
syare Syo anakangkivane rantuna wasai.
8 Wapo anakotare rameseno Rinai kai,
muno wapo ramesen ti ntuna tutir no inamune rai kai,
omamo Syo wasanayao dai ramu.
9 Weye Risyamo inanuga nto irati sapi anya wapo makum ti wapare wapo aunande irati Rinai inta mai ramu,
muno kambino anya wapo makume inta mai tavone ramu.
10 Weye maere kotar tenambe ntuna no anate mamo Risyi syave rai,
muno sapi ama manui nseo ribuge rakivan ntuna unate rai janyi mamo Risya ma.
11 Insani kotar tenambe ntuna no unate mamo syave rai tavon,
muno maere kotar nsyisyaube ntuna no anoko ayamuga rai mainy tenambe.
12 Ranivara kayare po rinaveamo, Syo anaisye ranajo wasai ramu,
weye mine so muno ama anakotaro ntuna no ama uga rai omamo ta Risyave rai tenambe.
13 Weapare vemo Syo wapa sapi anya apa ine raisyare?
Muno weapare vemo Risyo wapa kambine apa mavuge ramanam tavonare?
14 Risyirati Amisy Titi Rave, syare wapo kove raura seno Rinai,
omamo maisyare wapa anakotaro wapo rameseno Rinai wemaisy.
Muno syare wasayae wapa urairi wadaokaisy nande Rinai rai.
15 Syare wapo rinawain arono wana nsosobe ama uga rai,
weamo Risyo wasapaya rai,
weti wapo rinararimbe.’’
16 Weramu vatano mamune nanawamo Amisye Po raura nanto mai pare:
‘‘Veanimaibe weapo Sya ananyao raura muno wapayao Sya urairi rai?
Wakoe! Mamaisye ramu, weye weapamo waponae Rinai!
17 Weaponae wapo Risya ananyao raraniv
muno weapo Sya ayao ravakambe.
18 Ranivara weapo vatano wanaonoambe mansaen, weamo watavondi matavon.
Muno wata wasaijaro vatano wo anaerero vauname rangkate matavon.
19 Weapamo wasawa mamo mamun dave,
muno wasaunane mamo mansak.
20 Weatuna wapayao tatugadi vayave wapa arakove kaijinta mai,
muno wapo wapa arakovo isapintai ingkuja intabo rai aura tantunawi tavon.
21 Arono weapo anakotare so raveamo rituna Syo wasanyanyut bayavea,
weti waparemo Risya ana dave mo weapa ramai dako!
Weramu soa umba Syo weasanayao rai ije,
muno Syo anakangkivane rantuna wasamune rai tutudi ije.
22 Inya, weapirati wasakirive Rinai weap, wadanide,
indamu vemo Risyo mangke mo wasarisyi raugaje wasai nora,
muno indati vatane inta po wasapaya irati rai ramu.
23 Are pirati po kove raura seno Rinai maisyare apa anakotaro po rameseno Rinai wemaisy,
muno tavondi Sya unanui mamaisye obo rai,
weaveti opamo beaje Rinai toije.
Indati Risyirati Amisy, Risyo Sya vambunino Syo vatane mapaya irati kakaije rai rarorono ai.’’