49
Vatano manaveano ananuge ramen marane mamo wene mo maugav
1 Masmur vatano susyo Kora wo ratoe. Nto irati akari po vatano matayao ukiny maugavo ransyerane rai ai.
2 Inya, susyo mine tename wadanide!
Inya, vatano mine tename weap, wasamarikoame rasakinav de!
3 Inya, weapirati vatano wapa tame ntiti weap
muno weapi vatano wapa tame ntiti jewen weap.
Weapirati vatano ananuge jajewembe wasai weap,
muno vatano watantuna ananuge vone rai weap.
4 Syare syo ananyao mo vatane manyao irati ana ratantona ntitije rai raura,
muno inanuga so mo ananyao kakai, kove ratantonave.
5 Syare syo ayao vari mbe ananyaobe raraniv mavabe,
syare syo itarije raeyan muno syo ayao vari nsosobe rave raura kakavimbe.
6 Risyamo janive ramu arono ino no anakotaro nsosobe ama uga rai,
muno arono marova mamune wo rinawariki.
7 Wenawirati wo awa romane obo raijaseo vombe,
muno mararin irati awa ananugo mine so rai.
8 Tugae, vatane nanawamo inta mamaisyo po romane veano apa jayaisy ti no no mine so ravae indamu anasine rapaya wene rai ramu.
Muno inta mamaisyo po romane ravae nanto Amisye Ai indamu veano apa jayaisy ti no no mine so ranigwane ramu.
9 Weye romane mamo inta mamaisyo veano vatane apa kove ravae ramu,
muno romane ama manuije mamo inta mamaisyo veano ravae jewen tavon, ntoa nuge nuganui,
10 indamu vatane nanto wene rai jinya,
yara jayaisy ti piridi to kobe.
11 Tugae, ana wamo raene mamo vatano wantatukambe nawe vatano wananepabe nawe ugwenen,
muno vatano ukov nanawirati awa ana udatantona ntiti nanawamo ugwenen tavon,
muno awa ananugo mine somamo wo rapaya ti ntuna vatano kaije mansamarom.
12 Wusyinoeamo vatano awa romane mawese weyave kopa manakoe rai,
weramu indati mantuna no kopa aipapo ti utantavainy raija ntoa nuge nuganui,
omirati awa una rai tawan tutire mijem.
13 Weti vatane inta tuna tawano apa ananugo maweso aije rautane ramu.
Yara ugwenen tavon maisyare maere kotare muenen ti makanive wemaisy.
14 Maisyare omaisy wene wemi indati vatano wantatukambe awa marane mije,
muno vatano utavondi awa ayaowe rai, wenawamo awa marane nanto wene rai tavon.
15 Onawamo Amisye Po mapatimu indamu ugwenen, maisyare maero domba mansamaisy,
indati wen akoe be akarive mai po maugav no wene ama uga rai.
Wavave wanawadi wasya no aipapo ama uga rai,
manasino kopa mamo parakam,
muno amani wemirati munijo una tawan dai kobe mijem.
16 Yara risyamo Amisye Wepi Po inavae patimuve to
indamu Po rinapaya irati wene ama vambunine rai,
weye Wepi Po rinaugav akare taune Ai.
17 Ranivara vatane inta apa ananuge manui rave,
muno apa romano yavaruga ama manui miridi nseo,
weamo vemo nanuga njoramo ai nora.
18 Weye arono wene nde ai, po inta rauga da to rautane ramu,
muno apa romane omamo no autan da pasyo no aipapo raije ramu.
19 Arono ta kove weamo pare opamo no kovo ananuge manui rai rave to,
muno vatano kaije ukangkamambe ai weye apa anakere ama ine manui.
20 Weramu opamo indati po apa aneno sinane mansarijato tavon no aipapo rai,
indati utantavainy no kaumure obo rai tutir kobea ntoa nuge nuganui.
21 Maisyare maere kotare muenene wemaisy,
vatane nanao tavon indati inta kov indamu no tawano apa ananugo maweso aije rautane ramu.