51
Ayao kakaije raura kakavimbe no Amisye Amun
1-2 Masmur Daud po ratoe. Arono anawae Natan de po anayao weye Daud pe Batsyeba me inyaki. Nto irati akari po vatano matayao ukiny maugavo ransyerane rai ai.
3 Sya Amisy, syare naemeno rinai mamaisyo Nya muinyo no tawane rai,
syare Nyo sya ana daveti ngkakai raupae irati rinai mamaisyo Nya kovo manakoe rai.
4 Syare Nyo inanuga rarondom indamu sya ana daveti ngkakai mpaya rinai,
muno Nyo sya ayao kakai raupae bintabo.
5 Weye taune syo sya ana idaveti ngkakai raen to,
muno sya ayao kakai mamo rinaemendi rai jivae.
6 Nde irati Wibuiny Nai, risyo ayao kakaije rave irati Winai to,
muno anakotaro windaena mamun, omamo syo rave to.
Weti Winyo mangke raugaje omamo mamaisy,
muno Winya ana ndapatimuge mamo moyar.
7 Tugae ivae, ayao kakai no rinai, arono rinano aje kobe we,
muno ayao kakai no rinai kobe no arono sya ingkoa ranakeave rinautane we.
8 Tugae, Winya nanuga no irati vatano napirati anuga nsarokire ai,
weti syare Nyo ana ratantona ntiti raugasyo ntami rinanuga so rai.
9 Syare Nyo sya ayao kakaije raupaeta, wea indati inanuga ngkakavin akato,
Syare Nyo inanuga rarondom, wea indati mpoper akato irati kamayo kaipov mpope dave rakivan.
10 Ranivara winyare Nyo sya ayao kakai rapaya, weamo rinanayanambe rave,
rinanasine somamo Winyo rakupi rave to, weramu rinananibe akato kai.
11 Vemo Nyo sya ayao kakai raen tutir inya,
yara syare sya anakotaro idaveti ngkakai mamo Nyo raupaisy.
12 Sya Amisy, syare Nyo inanuga so ranari ramu mpoper,
muno Nyo inanuga ravera nggwanyin indamu ribekere ntindimu Amisye Winai.
13 Syare vemo Nyo inavakano marambe mo rigwaravainyo irati Winai jinya,
vemo Nyo Nya Anawayo Vambunine raugav akaore rinaora inya.
14 Syare Nyo rinaveramu rinanayanambe akato, weye Nyo inapaya irati kakai rai to,
syare Nyo rinaveramu inanuga rananibe ibeto irati Winai.
15 Wea indati syo Nya ananyao raveano vatano ubeta Nai jewene mansanyao,
indamu vatano wo ayao kakai rave umaso usakinav wakare irati Winai.
16 Sya AMISY, syare Nyo rinapaya irati mavugo mbe anatuvabe rinaije rai;
sya AMISY, Wibuiny irati Amisy Nyo inapaya irati kakai rai.
Weti rikiny rinanayanambe, syo Nya moyare rariri.
17 Sya Akoe, syare Nyo rinasopan da syayao,
indamu syo kangkamane raura seo Nai.
18 Yara anakotaro rameseo Naije omamo wimbekedaije ramu;
ranivara syo maere rameseo Nai, wemamo winananibe rai ramu.
19 Yara ride irati inanuga rawaumbe rave rautan no Amisye Winui, wemi wimbekedai.
Sya Amisy, ride irati inanuga rawaumbe rautan muno risakinavo sya ana daveti ngkakai rai, wemi winanayanambe rai.
20 Sya Amisy, syare Nya kove rarorono Sion rai omamo mamaisyo Winya mbekere rai,
syare Nyo ama yano mandamisye rayan kijani akato indamu vemo reama marova usisa ama uga rai jinya.
21 Arono naije maere rameseo Nai mamaisyo Nya anaparatote rai indati mo anayanambe raugavo Nai,
maere kotare ramer tantename rai, yara inta ransop inya.
Muno vatane wo sapi anya amer tavon no Nya tewa orame rai.