39
Wansanave Amisye amen weye wama matame mamo ntumainy bayave
1 Masmur Daud po ratoe. Nto irati akari po vatano matayao ukiny maugavo ransyerane rai ai. Nto irati Yedutun ai.
2 Syo ratantona no inanuga, syare: syo taune rinayaranande sya ana dave rai,
indamu vemo inaunane so mo ayao kakaije ratande rinai jinya.
Syo inawa so rakuvu indamu syayao inya,
arono vatano mamune ta una mararaive rinaiji.
3 Anamainitu rinai ti, syo ayao inta raura jewen,
syo ayao kove inta raura tavone jewen, rinawa ntapumi vayave,
weramu sya siuri mamo mangkeo rinai rave kobe.
4 Rinanuga raraniva ngkantebe rave,
syo ratantona akoevea inanuga so mamaun dave,
weti syo raura syare:
5 ‘‘Sya AMISY, syare Winyo sya matam akari raura rinai,
inda syo raen risyamo kov ti ino somamo ntumainy dave ti mavave nde nto.
6 Tugae, sya tumo windapatimu syanya rai omamo ta no no ire maran karisya.
Risya kov ti rino somamo ntumainy dave, ramuinyo Winai.
Vatane reamamo maisyare anawayo ta ramawita wemaisy.
7 Reama reangkove mamo maisyare ugara deto vayave ti aumandi wemaisy.
Reansamun nsariraeve anakere rai omamo reambea marudi.
Reamo ana ngkenav no mine so ratayao ti reamo ratutumbe,
weramu reamantukambe indati arepi apa ura rai jakato?
8 Sya Akoe Winy, umba animaisye mi ridanyube akato? Jewena!
Wibuiny irati inanaveano namen!
9 Syare Nyo inapaya irati sya ayao kakai rai tenambe,
vemo winaneme mpaya rinai mo vatano wananepabe wo rinambaon inya.
10 Anamainitu rinai, syonae syayaobei,
weye mangke somamo Winyi Nyo raude rinai.
11 Syare Nya mangke nde rinaije raveto marambe rinai,
weye kavintare rikakai irati Nya mangke umaso rai.
12 Winyo mangke raude vatane nanentabo mai mamo indamu Nyo manyao,
weye awa ana udave ngkove jewen.
Muno Winyo awa anakotaro ngkenav no mine so rawaumbe,
maisyare puso nsanambe ana kov dave rai wemaisy.
Tugae, vatane awa ukove mamo maisyare nanawayo ta ramawito vayave wemaisy.
13 Sya AMISY, syare Nyo sya ana danajo raraniv,
muno namarikoame rasakinavo sya anonae so rai,
vemo Nyo sya oyove so raraniv bayave inya!
Maisyare sya aneno sinane una tawane jewen no mine vone so rai mansamaisy,
risyamo vatano wanisen ta ride no vavai no Nya muni so rai.
14 Syare vemo Nyo pari raude rinai tutir inya,
indamu rinanayanambe vavai rati,
nai arono risyana kakai rainy muno inaumandi rainye so.’’